കാലാവസ്ഥാ വ്യതിയാനം; ഒലിവ് റിഡ്‌ലി കടലാമകൾ ജന്മം നൽകുന്നതിൽ കൂടുതലും പെൺകുഞ്ഞുങ്ങൾ

ന്യൂഡൽഹി: കാലാവസ്ഥാ വ്യതിയാനം മൂലം താപനില ഉയരുന്നതിനാൽ കടലാമകൾ കൂടുതലും പെൺ കുഞ്ഞുങ്ങൾക്ക് ജന്മം നൽകുന്നതായി കണ്ടെത്തൽ. ഒഡീഷ തീരത്ത് കൂടുകൂട്ടുന്ന ഒലിവ് റിഡ്‌ലി കടലാമകളാണ്‌ കൂടുതലും പെൺ കുഞ്ഞുങ്ങൾക്ക്‌ ജന്മം നൽകുന്നതെന്ന്‌ ബംഗളൂരുവിലെ പരിസ്ഥിതി ശാസ്ത്രജ്ഞർ കണ്ടെത്തി.

15 വർഷത്തിലേറെയായുള്ള നിരീക്ഷണത്തിൽ നിന്നാണ്‌ ഈ കണ്ടെത്തൽ. മുട്ട വിരിഞ്ഞിറങ്ങുന്ന കുഞ്ഞുങ്ങളുടെ ലിംഗാനുപാതം നോക്കുമ്പോൾ ശരാശരി 71 ശതമാനം പെൺ ആമകളാണെന്ന്‌ ശാസ്ത്രജ്ഞർ പറഞ്ഞു. ചില വർഷങ്ങളിൽ വിരിഞ്ഞിറങ്ങുന്ന കുഞ്ഞുങ്ങളിൽ 80 ശതമാനത്തിലധികവും പെൺകുഞ്ഞുങ്ങളായിരുന്നു.

ബംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസും ഒഡീഷ വനം വകുപ്പിന്റെ പിന്തുണയോടെ ദക്ഷിണ ഫൗണ്ടേഷൻ എന്നിവിടങ്ങളിലെ ചില പരിസ്ഥിതി സംരക്ഷകരും ചേർന്ന്‌ പുറത്തിറക്കിയ റിപ്പോർട്ടിൽ 2011-ൽ വിരിഞ്ഞിറങ്ങിയ കുഞ്ഞുങ്ങളിൽ 97 ശതമാനവും 2012-ൽ 83 ശതമാനവും 2015-ൽ 89 ശതമാനവും 2020-ൽ 97 ശതമാനവും പെണ്ണായിരുന്നു.

കാലാവസ്ഥാ വ്യതിയാനം കടലാമകളുടെ ലിംഗാനുപാതത്തെ ബാധിക്കാൻ സാധ്യതയുണ്ട്‌. ലെതർബാക്ക് പോലുള്ള മറ്റ് കടലാമകളിലും സമാനമായ പ്രവണത പ്രതീക്ഷിക്കുന്നതായി ശാസ്ത്രജ്ഞർ പറഞ്ഞു. ഓസ്‌ട്രേലിയ, യുഎസ്എ എന്നീ രാജ്യങ്ങളിൽ നടത്തിയ പഠനങ്ങളിലും ആഗോള താപനിലയിലെ വർധനവ് കടലാമകൾ കൂടുതൽ പെൺകുഞ്ഞുങ്ങൾക്ക്‌ ജന്മം നൽകാൻ കാരണമാകുന്നതായി പറയുന്നുണ്ട്‌. കാലാവസ്ഥാ വ്യതിയാനം ഏറ്റവും പെട്ടന്ന്‌ ബാധിക്കുന്ന ജീവികളാണ്‌ ആമകൾ.