ഭൂമി ചുട്ടുപഴുക്കും; ആഗോള താപനില 1.5 ഡിഗ്രി സെല്‍ഷ്യസ് മറികടന്നേക്കും - മുന്നറിയിപ്പ്

2025-2029 കാലയളവിൽ ആഗോള താപനില ഉയരാൻ സാധ്യത. താപനില 1.5 ഡിഗ്രി സെൽഷ്യസിൽ കൂടുതൽ ഉയരാനുള്ള സാധ്യത 70 ശതമാനമാണെന്ന്‌ ലോക കാലാവസ്ഥാ സംഘടന (ഡബ്ല്യൂഎംഒ) ബുധനാഴ്ച പ്രസിധീകരിച്ച റിപ്പോർട്ടിൽ പറയുന്നു.

ഇതുവരെ രേഖപ്പെടുത്തിയതിൽ വച്ച് ഏറ്റവും ചൂടേറിയ വർഷമായിരുന്നു 2024. 1850-1900 കാലഘട്ടത്തിനേക്കാൾ 1.5 ഡിഗ്രി സെൽഷ്യസിൽ കൂടുതൽ ആഗോള ശരാശരി താപനില രേഖപ്പെടുത്തിയതും കഴിഞ്ഞ വർഷവുമായിരുന്നു. 1850-1900 കാലഘട്ടം ഫോസിൽ ഇന്ധനങ്ങൾ കത്തിക്കുന്നത് പോലുള്ള മനുഷ്യന്റെ പ്രവർത്തനങ്ങൾ കാലാവസ്ഥയെ സാരമായി ബാധിക്കാൻ തുടങ്ങുന്നതിനു മുമ്പുള്ള സമയമായിരുന്നു.

കാലാവസ്ഥാ വ്യതിയാനത്തിന്റെ പ്രത്യാഘാതങ്ങൾ ഒഴിവാക്കാൻ 2015 ലെ പാരീസ് ഉടമ്പടിയിൽ രാജ്യങ്ങൾ എടുത്ത തീരുമാനമായിരുന്നു 1.5 ഡിഗ്രി സെൽഷ്യസ് പരിധി. ശരാശരി ആഗോള താപനില 2 °C (3.6 °F) ന് താഴെയായി വ്യാവസായിക വിപ്ലവത്തിനു മുമ്പുള്ള നിലയേക്കാൾ താഴെയായി നിലനിർത്തുക, ഒപ്പം വർധന 1.5 °C (2.7 °F) ആയി പരിമിതപ്പെടുത്തുക എന്നതായിരുന്നു പാരീസ് ഉടമ്പടിയുടെ ലക്ഷ്യം.

പാരീസ് ഉടമ്പടിയിൽ വ്യക്തമാക്കിയിട്ടുള്ള 1.5 ഡിഗ്രി സെൽഷ്യസ് പരിധിയുടെ സ്ഥിരമായ ലംഘനം 20 അല്ലെങ്കിൽ 30 വർഷത്തെ ദീർഘകാല താപനത്തെ സൂചിപ്പിക്കുന്നു. ആഗോളതാപനം 1.5 ഡിഗ്രി സെൽഷ്യസിൽ താഴെ തുടരുന്നതിന്, 2030 ആകുമ്പോഴേക്കും ഉദ്‌വമനം ഏകദേശം 50% കുറയ്ക്കേണ്ടതുണ്ട്. ഇത് ഓരോ രാജ്യത്തിന്റെയും നിശ്ചയിച്ചിട്ടുള്ള സംഭാവനകളുടെ ആകെത്തുകയാണ്. 2031-2035 കാലയളവിലേക്കുള്ള ദേശീയതലത്തിൽ നിശ്ചയിച്ചിട്ടുള്ള സംഭാവനകൾ അല്ലെങ്കിൽ ദേശീയ കാലാവസ്ഥാ പദ്ധതികൾ ഈ വർഷം തന്നെ രാജ്യങ്ങൾ യുഎന്നിനു സമർപ്പിക്കേണ്ടതുണ്ട്.

ആഗോള താപനില വർധനവ് 1.5 ഡിഗ്രി സെൽഷ്യസായി പരിമിതപ്പെടുത്തുക എന്നതാണ് ദേശീയ കാലാവസ്ഥാ പദ്ധതിയുടെ കൂട്ടായ ലക്ഷ്യം. 2025 നും 2029 നും ഇടയിൽ ഓരോ വർഷവും ആഗോള ശരാശരി താപനില ഉയരുകയാണ്‌. ഇത്‌ 1850 നും 1900 നും ഇടയിൽ ഉണ്ടായിരുന്നതിനേക്കാൾ 1.2 മുതൽ 1.9 ഡിഗ്രി സെൽഷ്യസ് വരെ കൂടുതലായിരിക്കുമെന്ന് ഡബ്ല്യൂഎംഒ റിപ്പോർട്ട് പറയുന്നു.

2015-ൽ പാരീസിൽ നടന്ന ഐക്യരാഷ്ട്രസഭയുടെ കാലാവസ്ഥാ ഉച്ചകോടിയിൽ പങ്കെടുത്ത പ്രതിനിധികൾ

ഈ കാലയളവിൽ കുറഞ്ഞത് ഒരു വർഷത്തേക്കെങ്കിലും താപനില 1850-1900 ലെ ശരാശരിയേക്കാൾ 1.5 ഡിഗ്രിയിൽ കൂടുതലായിരിക്കാനുള്ള സാധ്യത 86 ശതമാനമാണ്. "രേഖപ്പെടുത്തിയിട്ടുള്ളതിൽ വച്ച് ഏറ്റവും ചൂടേറിയ 10 വർഷങ്ങൾ നമ്മൾ ഇപ്പോൾ അനുഭവിച്ചു കഴിഞ്ഞു. നിർഭാഗ്യവശാൽ യുഎൻ റിപ്പോർട്ട് വരും വർഷങ്ങളിൽ ആശ്വാസത്തിന്റെ ഒരു സൂചനയും നൽകുന്നില്ല ഡബ്ല്യൂഎംഒ ഡെപ്യൂട്ടി സെക്രട്ടറി ജനറൽ കോ ബാരറ്റ് പറഞ്ഞു.

ദക്ഷിണേഷ്യയിൽ സമീപ വർഷങ്ങളിൽ പതിവിലും കൂടുതൽ മഴ ലഭിച്ചിട്ടുണ്ടെന്നും (2023 ഒഴികെ) 2025 നും 2029 നും ഇടയിൽ ഈ പ്രവണത തുടരുമെന്നും ഡബ്ല്യൂഎംഒ പറഞ്ഞു. ഇന്ത്യൻ കാലാവസ്ഥാ വകുപ്പിന്റെ( ഐഎംഡി) കണക്കനുസരിച്ച്, കഴിഞ്ഞ അഞ്ച് വർഷങ്ങളിൽ നാലെണ്ണത്തിലും ഇന്ത്യയിൽ മൺസൂൺ കാലത്ത് സാധാരണയേക്കാൾ കൂടുതൽ മഴ ലഭിച്ചു. ഈ വർഷം സാധാരണയിൽ കൂടുതൽ മഴ ലഭിക്കുമെന്ന് ഐഎംഡി പ്രവചിച്ചു.

പ്രതീകാത്മക ചിത്രം

നവംബർ മുതൽ മാർച്ച് വരെയുള്ള അഞ്ച് ശൈത്യകാലങ്ങളിൽ (അടുത്ത അഞ്ച് ശൈത്യകാലങ്ങളിൽ) ആർട്ടിക് മേഖലയിലെ താപനില ലോകത്തിന്റെ മറ്റു ഭാഗങ്ങളെ അപേക്ഷിച്ച് 2.4 ഡിഗ്രി സെൽഷ്യസ് വർദ്ധിക്കുമെന്ന് ഡബ്ല്യൂഎംഒ അറിയിച്ചു. ഇത് ആഗോള ശരാശരിയുടെ മൂന്നര ഇരട്ടിയിലധികം വരും.

2025 നും 2029 നും ഇടയിൽ ബാരന്റ്സ് കടൽ, ബെറിംഗ് കടൽ, ഒഖോത്സ്ക് കടൽ തുടങ്ങിയ ആർട്ടിക് ഭാഗങ്ങളിൽ കടൽ മഞ്ഞു കൂടുതൽ ഉരുകാൻ സാധ്യതയുണ്ട്. 2025-2029 കാലയളവിൽ മെയ് മുതൽ സെപ്‌തംബർ വരെ, സഹേൽ, വടക്കൻ യൂറോപ്പ്, അലാസ്ക, വടക്കൻ സൈബീരിയ തുടങ്ങിയ ചില സ്ഥലങ്ങളിൽ പതിവിലും കൂടുതൽ മഴ ലഭിക്കുമെന്ന് പ്രതീക്ഷിക്കുന്നു. അതേസമയം ആമസോൺ സാധാരണയേക്കാൾ വരണ്ടതായിരിക്കുമെന്ന് ഡബ്ല്യൂഎംഒ അറിയിച്ചു.