വാട്‌സാപ്പ് ഉപയോക്താക്കൾ ജാഗ്രത; ചാരസോഫ്റ്റ്‌വെയർ ഇൻസ്റ്റാൾ ചെയ്തതായി വെളിപ്പെടുത്തൽ

മെൻലോ പാർക്ക്: ലോകമെമ്പാടുമുള്ള ഇരുന്നൂറോളം വാട്‌സാപ്പ് ഉപയോക്താക്കളെ കബളിപ്പിച്ച് ചാരസോഫ്റ്റ്‌വെയർ ഇൻസ്റ്റാൾ ചെയ്യിച്ചതായി വാട്‌സാപ്പ് വെളിപ്പെടുത്തി. ഇറ്റാലിയൻ നിരീക്ഷണ കമ്പനിയായ 'സൈ4ഗേറ്റ്' ആണ് ഈ സൈബർ ആക്രമണത്തിന് പിന്നിലെന്നാണ് റിപ്പോർട്ട്.

വ്യാജ ലിങ്കുകൾ അയച്ച് ഉപയോക്താക്കളെക്കൊണ്ട് സ്പൈവെയർ ഡൗൺലോഡ് ചെയ്യിപ്പിക്കുകയായിരുന്നു ഇവരുടെ രീതി. ഉപയോക്താക്കളുടെ സ്വകാര്യ സന്ദേശങ്ങൾ, ലൊക്കേഷൻ വിവരങ്ങൾ, ഫോൺ കോൾ റെക്കോർഡുകൾ എന്നിവ ചോർത്താൻ ഈ ചാരസോഫ്റ്റ്‌വെയറിലൂടെ സാധിക്കുമെന്ന് സുരക്ഷാ വിദഗ്ധർ മുന്നറിയിപ്പ് നൽകുന്നു.

ഔദ്യോഗിക വാട്‌സാപ്പ് സന്ദേശങ്ങളാണെന്ന് തോന്നിപ്പിക്കുന്ന വിധത്തിൽ ഉപയോക്താക്കൾക്ക് പ്രത്യേക ലിങ്കുകൾ അയച്ചു. ആപ്പ് അപ്‌ഡേറ്റ് ചെയ്യാനോ സുരക്ഷാ പരിശോധനയ്ക്കോ എന്ന വ്യാജേനയാണ് ഇവ അയച്ചത്. ഈ ലിങ്കുകളിൽ ക്ലിക്ക് ചെയ്യുന്നതോടെ ഉപയോക്താക്കൾ അറിയാതെ തന്നെ ഫോണിൽ ചാരസോഫ്റ്റ്‌വെയർ ഇൻസ്റ്റാൾ ചെയ്യപ്പെടും.

ആൻഡ്രോയിഡ്, ഐഒഎസ് പ്ലാറ്റ്‌ഫോമുകളെ ഇത് ബാധിച്ചിട്ടുണ്ട്. ആക്ടിവിസ്റ്റുകൾ, മാധ്യമപ്രവർത്തകർ, രാഷ്ട്രീയ നേതാക്കൾ എന്നിവരെ ലക്ഷ്യം വെച്ചാണ് ഇത്തരം നീക്കങ്ങൾ നടക്കാറുള്ളതെന്ന് വാട്‌സാപ്പ് സൂചിപ്പിച്ചു. ഈ സൈബർ ആക്രമണത്തെക്കുറിച്ച് അന്വേഷിക്കാൻ സൈബർ സുരക്ഷാ ഏജൻസികളുടെ സഹായം വാട്‌സാപ്പ് തേടിയിട്ടുണ്ട്.

ഇത്തരം വ്യാജ ലിങ്കുകളിൽ ക്ലിക്ക് ചെയ്യരുതെന്നും ആപ്പുകൾ ഔദ്യോഗിക സ്റ്റോറുകളിൽ നിന്ന് മാത്രം ഡൗൺലോഡ് ചെയ്യണമെന്നും കമ്പനി നിർദ്ദേശിച്ചു. നേരത്തെ ഇസ്രയേലി കമ്പനിയായ എൻഎസ്ഒ ഗ്രൂപ്പിന്റെ പെഗാസസ് സോഫ്റ്റ്‌വെയർ ഉപയോഗിച്ചുള്ള ചോർത്തലുകൾ ആഗോളതലത്തിൽ വലിയ വിവാദമായിരുന്നു.

അതിന് പിന്നാലെയാണ് ഇറ്റാലിയൻ കമ്പനിയുടെ ഭാഗത്തുനിന്നും സമാനമായ നീക്കം ഉണ്ടായിരിക്കുന്നത്. ഉപയോക്താക്കളുടെ സ്വകാര്യത സംരക്ഷിക്കാൻ എൻഡ്-ടു-എൻഡ് എൻക്രിപ്ഷൻ ഉണ്ടെങ്കിലും ഇത്തരം സ്പൈവെയറുകൾ ഫോണിന്റെ നിയന്ത്രണം തന്നെ ഏറ്റെടുക്കുന്നതിനാൽ വലിയ സുരക്ഷാ ഭീഷണിയാണ് ഉയർത്തുന്നത്.