പഠനം ഇനി കൂടുതൽ സ്മാർട്ട്; ജെമിനി നോട്ട്ബുക്കിൽ ഇനി സൗജന്യ പാഠപുസ്തകങ്ങൾ

വാഷിങ്ടൺ: വിദ്യാർഥികളുടെ പഠനം കൂടുതൽ എളുപ്പമാക്കുന്നതിനായി ജെമിനി നോട്ട്ബുക്കിൽ പുതിയ ഫീച്ചറുമായി ഗൂഗിൾ. വിദ്യാർഥികൾക്ക് ഇനി പ്രമുഖ പ്രസാധകരുടെ നൂറുകണക്കിന് പാഠപുസ്തകങ്ങൾ യാതൊരു നിരക്കുമില്ലാതെ സൗജന്യമായി പ്രയോജനപ്പെടുത്താം.

എസ് ചന്ദ് പബ്ലിഷിംഗ്, ഓപ്പൺസ്റ്റാക്സ്, ഓപ്പൺ ടെക്സ്റ്റ്ബുക്ക് ലൈബ്രറി തുടങ്ങിയവയുടെ പുസ്തകങ്ങൾ ഇതിൽ ലഭ്യമാണ്. പാഠപുസ്തകങ്ങളിലെ വിവരങ്ങൾ ഉപയോഗിച്ച് വിദ്യാർഥികൾക്ക് ആവശ്യാനുസൃതമായ സ്റ്റഡി ഗൈഡുകൾ തനിയെ തയ്യാറാക്കാനും ഇത് സഹായിക്കും.

ചേർത്തിട്ടുള്ള പാഠപുസ്തകങ്ങളെക്കുറിച്ച് വിദ്യാർഥികൾക്ക് ചോദ്യങ്ങൾ ചോദിക്കാം. ജെമിനി നോട്ട്ബുക്ക് യഥാർഥ ഉറവിടത്തിലേക്കുള്ള ലിങ്കുകൾ സഹിതം ഉത്തരങ്ങൾ നൽകും. വിവരങ്ങൾ കൃത്യമാണോ എന്ന് ഉറവിടം നോക്കി പരിശോധിക്കാൻ ഇത് വിദ്യാർഥികളെ സഹായിക്കുന്നു.

പാഠപുസ്തകങ്ങളിൽ നിന്ന് പ്രാക്ടീസ് ക്വിസുകൾ, ഫ്ലാഷ് കാർഡുകൾ എന്നിവ നിർമ്മിക്കാനും ഈ ടൂളിന് സാധിക്കും. ഇത് പഠനവസ്തുക്കൾ റിവൈസ് ചെയ്യാൻ വിവിധ മാർഗ്ഗങ്ങൾ നൽകുന്നു.

ഈ പുസ്തകങ്ങൾ ആക്സസ് ചെയ്യാൻ, ഒരു നോട്ട്ബുക്ക് തുറന്ന് സോഴ്സുകൾ ചേർക്കുന്ന ഓപ്ഷനിൽ നിന്ന് 'Textbooks' തിരഞ്ഞെടുക്കുക. ലഭ്യമായ പുസ്തകങ്ങൾ പരിശോധിച്ച ശേഷം ആവശ്യമുള്ളവ നോട്ട്ബുക്കിലേക്ക് ചേർക്കാം. മുൻപ് ചേർത്ത മറ്റ് മെറ്റീരിയലുകൾക്കൊപ്പം തന്നെ ഈ പാഠപുസ്തകങ്ങളെയും ജെമിനി നോട്ട്ബുക്കിൽ സോഴ്സുകളായി ഉപയോഗിക്കാൻ ഈ ഫീച്ചർ വിദ്യാർത്ഥികളെ അനുവദിക്കുന്നു.

പുസ്തകങ്ങൾ എങ്ങനെ ഉപയോഗിക്കാം:

1. ജെമിനി നോട്ട്ബുക്കിൽ നിങ്ങളുടെ നോട്ട്ബുക്ക് തുറക്കുക.

2. “Add sources” എന്ന ഓപ്ഷനിൽ ക്ലിക്ക് ചെയ്യുക.

3. അതിൽ നിന്ന് “Textbooks” തെരഞ്ഞെടുത്ത് ലഭ്യമായ പുസ്തകങ്ങളുടെ കാറ്റലോഗ് ആക്സസ് ചെയ്യാവുന്നതാണ്.