പ്ലാസ്റ്റിക്ക്‌ പാക്കേജിങ്ങിന്‌ ബദൽ; ബയോ - പോളിമർ സാങ്കേതികവിദ്യ കൈമാറി സിഎസ്ഐആർ - നിസ്റ്റ്

ന്യൂ‍ഡൽഹി : പ്ലാസ്റ്റിക്ക്‌ പാക്കേജിങ്ങിന്‌ ബദലായി വികസിപ്പിച്ച ബയോ - പോളിമർ അധിഷ്ഠിത പാക്കേജിങ്‌ സാങ്കേതിക വിദ്യ പുണെ ആസ്ഥാനമായ മൃദ പോളിമേഴ്‌സിന്‌ കൈമാറി തിരുവനന്തപുരത്തെ സിഎസ്‌ഐആർ - നിസ്റ്റ്‌. ഡൽഹിയിൽ നടക്കുന്ന ശാസ്‌ത്ര കോൺക്ലേവായ എമർജിങ്‌ സയൻസ്‌, ടെക്‌നോളജി ആൻഡ്‌ ഇന്നൊവേഷൻ കോൺക്ലേവിലാണ്‌(എസ്റ്റിക്‌ 2026) കൈമാറ്റം നടന്നത്‌. സിഎസ്ഐആർ - നിസ്റ്റ് ഡയറക്ടർ ഡോ. സി ആനന്ദരാമകൃഷ്ണനിൽ നിന്ന്‌ മൃദ പോളിമേഴ്‌സ്‌ അധികൃതർ രേഖകൾ കൈമാറി. കേന്ദ്ര ശാസ്‌ത്ര, സാങ്കേതിക വിദ്യമന്ത്രി ജിതേന്ദ്ര സിങ്‌ പങ്കെടുത്തു.

പ്രകൃതിക്ക്‌ ദോഷമില്ലാതെ സ്വാഭാവികമായി നശിച്ചുപോകുന്ന പാക്കേജിങ്‌ സാധനങ്ങൾ സിഎസ്‌ഐആർ - എൻഐഐഎസ്‌ടി കൈമാറിയ സാങ്കേതിക വിദ്യ വഴി വികസിപ്പിക്കാനാകും. ചോളം, കരിമ്പ്, മരച്ചീനി, ബീറ്റ്‌റൂട്ട് എന്നിവ ഉപയോഗിച്ചാണ്‌ പാക്കേജിങ്ങിനുള്ള സാധനങ്ങൾ നിർമിക്കുന്നത്‌. ‘ബയോ - പോളിമർ ബോട്ടിൽ സാങ്കേതികവിദ്യ’യും ഇതിലുൾപ്പെടും. ഇ‍ൗ സാങ്കേതിക വഴി ഉൽപാദിപ്പിക്കുന്ന ഉറപ്പുള്ളതും സുതാര്യവുമായ കുപ്പികൾ ജൈവപരമായി നശിക്കും. കുപ്പികളെ വളമാക്കി മാറ്റാനും സാധിക്കും. കുടിവെള്ളം, എണ്ണ, ശീതള പാനീയങ്ങൾ‍, ശുചീകരണ ഉൽപന്നങ്ങൾ‍ തുടങ്ങിയവ ഇ‍ൗ കുപ്പികളിൽ സൂക്ഷിക്കാം.