ഏഷ്യൻ ഗെയിംസ്: ടെക്‌ബോളിൽ ഇരട്ട തിരിച്ചടി; ഷൂട്ടിം​ഗിൽ ഇന്ത്യക്ക് മെഡൽ പ്രതീക്ഷ

ന​ഗോയ : ഏഷ്യൻ ​ഗെയിംസിൽ ടെക്‌ബോൾ വനിതാ സിംഗിൾസ് വെങ്കല മെഡൽ മത്സരത്തിൽ ഇന്ത്യയുടെ ക്വിംസി ജോക്വിം ഡിസൂസയുടെ പ്രതീക്ഷയും അവസാനിച്ചു. ജപ്പാന്റെ യുയിന സകാമോട്ടോയോട് ആദ്യ സെറ്റിൽ (11-12) പരാജയപ്പെട്ട് ക്വിംസി പുറത്തായി. മിക്സഡ് ഡബിൾസ് ടെക്ബോളിലും ഇന്ത്യയുടെ വെങ്കല മെഡൽ പ്രതീക്ഷ അവസാനിച്ചു. വിയറ്റ്നാമീസ് താരങ്ങളോടാണ് ക്വിംസി ഡിസൂസ - മുഹമ്മദ് അനസ് ബെഗ് സഖ്യം പരാജയപ്പെട്ടത്.

ഏഷ്യൻ ​ഗെയിംസിൽ ഇന്ത്യയുടെ പോരാട്ടങ്ങൾക്ക് തുടക്കമിടാൻ സാധ്യതയുണ്ടായിരുന്നെങ്കിലും വുഷുവിൽ സൂരജ് സിം​ഗും പുറത്തായി. പുരുഷന്മാരുടെ ഷെങ്ഖൻ ഫൈനലിൽ മത്സരിച്ച സൂരജ് സിം​ഗ് 9.683 ആകെ സ്‌കോറോടെ 11ാം സ്ഥാനത്താണ് ഫിനിഷ് ചെയ്തത്.

ഷൂട്ടിം​ഗിൽ വനിതകളുടെ 10 മീറ്റർ എയർ റൈഫിൾ വ്യക്തിഗത, ടീം മത്സരങ്ങളാണ് നടക്കുന്നത്. മെഡൽ പ്രതീക്ഷയോടെയാണ് ഇന്ത്യ ഷൂട്ടിം​ഗിനിറങ്ങിയത്. 10 മീറ്റർ എയർ റൈഫിൾ വ്യക്തിഗത മത്സരത്തിൽ സോനം മസ്കർ മൂന്നാം സ്ഥാനത്തോടെ ഫൈനലിലേക്ക് യോ​ഗ്യത നേടി. മലയാളി താരം വിദർശ വിനോദ് 630.4 പോയിന്റുമായി ഒമ്പതാം സ്ഥാനത്തെത്തി. ടീം ഇവന്റിൽ ഇന്ത്യയും ജപ്പാനും 1264.5 പോയിന്റുമായി ഒപ്പത്തിനൊപ്പമാണ്.