അഴിക്കുന്നു, 
അഭിമാനക്കുപ്പായം ; ഐ എം വിജയന്‌ 
ഇന്ന്‌ യാത്രയയപ്പ്‌

മലപ്പുറം : ജീവിതം അത്ഭുതകരമായി മാറ്റിമറിച്ച കേരള പൊലീസിന്റെ കുപ്പായം ഐ എം വിജയൻ ഇന്ന്‌ അമ്പത്താറാം പിറന്നാൾ ദിവസം അഴിച്ചുവയ്‌ക്കുന്നു. മലപ്പുറത്ത്‌ എംഎസ്‌പി അസി. കമാൻഡന്റ്‌ ആയ വിജയന്‌ പൊലീസ്‌ സേന യാത്രയയപ്പ്‌ നൽകും. ഇന്ന്‌ രാവിലെ എട്ടിന്‌ നടക്കുന്ന ഫെയർവെൽ പരേഡിൽ സേനാംഗങ്ങളിൽനിന്ന്‌ സല്യൂട്ട്‌ സ്വീകരിക്കുന്നതോടെ വി പി സത്യനും യു ഷറഫലിയും സി വി പാപ്പച്ചനും കെ ടി ചാക്കോയും കുരികേശ്‌ മാത്യുവും പി പി തോബിയാസും അടക്കമുള്ള കേരള പൊലീസ്‌ ഫുട്‌ബോൾ ടീമിലെ സുവർണ നിരയിലെ അവസാന കണ്ണിയും പടിയിറങ്ങും. 30നാണ്‌ സർവീസ്‌ കാലാവധി പൂർത്തിയാവുക.

1969 എപ്രിൽ 25ന്‌ തൃശൂർ കോലോത്തുംപാടം അയനിവളപ്പിൽ മണിയുടെയും കൊച്ചമ്മുവിന്റെയും മകനായി ജനനം. 1986ൽ കേരള പൊലീസിൽ അതിഥി താരമായി. 1987ൽ പതിനെട്ട്‌ വയസ്സ്‌ പൂർത്തിയായപ്പോൾ പൊലീസ്‌ കോൺസ്‌റ്റബിളായി ജോലിയിൽ പ്രവേശിച്ചു. 1991ൽ പൊലീസ്‌ വിട്ട്‌ കൊൽക്കത്ത മോഹൻബഗാനിലേക്ക്‌ കളിക്കാൻ പോയി. 1992ൽ പൊലീസിൽ തിരിച്ചെത്തി. 1993ൽ വീണ്ടും പൊലീസ്‌ വിട്ട വിജയൻ മോഹൻ ബഗാൻ, ഈസ്‌റ്റ്‌ ബംഗാൾ, ജെസിടി മിൽസ്‌ ഫഗ്‌വാര, എഫ്‌സി കൊച്ചിൻ, ചർച്ചിൽ ബ്രദേഴ്‌സ്‌ ക്ലബ്ബുകളിൽ കളിച്ചു.

1991 മുതൽ 2003 വരെ 12 വർഷം ഇന്ത്യൻ ഫുട്‌ബോൾ ടീമിലെ സ്ഥിര സാന്നിധ്യമായിരുന്നു. 2000–-2004 കാലത്ത്‌ ഇന്ത്യൻ നായക കുപ്പായവും അണിഞ്ഞു. 88 കളിയിൽ 39 ഗോളുകളും നേടി. 2006ൽ കൊൽക്കത്ത ഈസ്റ്റ്‌ ബംഗാളിൽനിന്ന്‌ ഇറങ്ങിയതോടെ പ്രൊഫഷണൽ ഫുട്‌ബോളിൽനിന്ന്‌ വിടവാങ്ങി.

എഎസ്‌ഐ ആയാണ്‌ തിരികെ പൊലീസിൽ പ്രവേശിക്കുന്നത്‌. 2021ൽ എംഎസ്‌പി അസി. കമാൻഡന്റ്‌ ആയി. 2002ൽ അർജുനയും 2025ൽ പത്മശ്രീയും നൽകി രാജ്യം ആദരിച്ചു.

സ്‌നേഹമാണ്‌ 
വിജയൻ (അന്തരിച്ച വി പി സത്യന്റെ 
ഭാര്യ അനിത)

എന്റെയും സത്യേട്ടന്റെയും വിവാഹം നിശ്ചയിച്ചിരുന്ന സമയം. 1992 കോയമ്പത്തൂർ സന്തോഷ്‌ ട്രോഫിയിൽ സത്യട്ടേന്റെ ക്യാപ്റ്റൻസിയിൽ കേരളം ജേതാക്കളായി. ആ സമയത്താണ്‌ വിജയനെ ആദ്യം കാണുന്നത്‌. അന്ന്‌ ബംഗാളിനുവേണ്ടിയാണ്‌ വിജയൻ കളിച്ചിരുന്നത്‌. ഐശ്വര്യവുമായിട്ടാണല്ലോ വന്നുകയറിയത്‌ എന്നുപറഞ്ഞാണ്‌ എന്നെ പരിചയപ്പെടുന്നത്‌. മോഹൻബഗാന് കളിക്കാൻ കൊൽക്കത്തയിൽ പോയപ്പോൾ ഞങ്ങളുടെ കൂടെയായിരുന്നു വിജയന്റെ താമസം. ‘നീ കുറച്ചുകൂടി സീരിയസാവണ’മെന്നുപറഞ്ഞ്‌ സത്യേട്ടൻ പലപ്പോഴും ദേഷ്യപ്പെടുമെങ്കിലും ഭയങ്കര സ്‌നേഹമായിരുന്നു രണ്ടുപേരും.‘ചേച്ചീ ചോറും പരിപ്പുകറിയും ആയോ’ എന്ന്‌ ചോദിച്ചുവരുന്ന വിജയനാണ്‌ ഇന്നും മനസ്സിലുള്ളത്‌. എന്റെ പാചകപരീക്ഷണങ്ങളുടെ ഇരകളായിരുന്നു സത്യേട്ടനും വിജയനും.

കളത്തിൽ ചടുലനീക്കങ്ങൾ 
(യു ഷറഫലി)

വിജയൻ പൊലീസ്‌ ടീമിൽ കളിക്കാൻ വന്ന ചിത്രം ഇപ്പോഴും മനസ്സിലുണ്ട്‌. മെലിഞ്ഞ്‌ ഒട്ടിയ ശരീരം. പതിനെട്ട്‌ തികഞ്ഞിട്ടില്ല. 1986ൽ സെലക്‌ഷനായി കോച്ച്‌ ചാത്തുണ്ണി സാർ പറഞ്ഞിട്ടാണ്‌ വരവ്‌. കോച്ച്‌ ശ്രീധരൻ സാറും ഡിജിപി എം കെ ജോസഫും കൂടി ആലോചിച്ച്‌ ഞങ്ങൾ സീനിയേഴ്‌സിന്റെ കൂടെ നിർത്തി. ഒരുവർഷംകൊണ്ട്‌ കളിയിൽ മാറ്റമുണ്ടായി. ആദ്യ ഇലവനിൽ പിടിച്ചുനിൽക്കാൻ കഠിനാധ്വാനംചെയ്‌തു. കളിക്കളത്തിൽ മനസ്സുറച്ച കളിക്കാരനാണ്‌. ഉയർന്ന നിലവാരമുള്ള കളിവൈഭവവും ചടുലനീക്കവുമാണ്‌ സവിശേഷത.

അസാമാന്യ ഫിനിഷർ 
(സി വി പാപ്പച്ചൻ)

എപ്പോൾ കളിച്ചാലും കളത്തിൽ ഞങ്ങൾ തമ്മിൽ ഒരു ധാരണയുണ്ടായിരുന്നു. അത്‌ പരിശീലനം നടത്തി ഉണ്ടാക്കിയതല്ല. ഒരുമിച്ച്‌ കളി തുടങ്ങിയ കാലം മുതൽ അതുണ്ട്‌. ഞങ്ങൾക്കിടയിൽ ഒരു കെമിസ്‌ട്രിയുണ്ട്‌. ഞാൻ കൊടുക്കുന്ന പാസ്‌ അവന്‌ അറിയാം, അവൻ തരുന്ന പാസ്‌ എനിക്കും. അവന്റെ പാസിലാണ്‌ ഞാൻ കൂടുതൽ ഗോൾ അടിച്ചിട്ടുള്ളത്‌. എന്റെ പാസിലാണ്‌ അവനും കൂടുതൽ ഗോൾ അടിച്ചിട്ടുള്ളത്‌. പന്ത്‌ നിയന്ത്രണത്തിൽ നിർത്താൻ ഒരു പ്രത്യേക കഴിവുണ്ട്‌. അവന്റെ ഫൈനൽ ടച്ച്‌ മനോഹരമാണ്‌. അസാമാന്യ ഫിനിഷർ.

പൊലീസ്‌ വഴിത്തിരിവായി 
(കുരികേശ്‌ മാത്യു)

പൊലീസ്‌ ടീമിൽ വന്നതാണ്‌ 
വിജയന്റെ ജീവിതത്തിൽ വഴിത്തിരിവായത്‌. പൊലീസിന്റെ ട്രയൽസിന്‌ വന്ന സമയത്ത്‌ ഡ്രിബിൾ ചെയ്യുന്നത്‌ കണ്ടവർക്കെല്ലാം കഴിവ്‌ മനസ്സിലായി. പൊലീസിലെ കൃത്യമായ പരിശീലനവും ഭക്ഷണവും മറ്റ്‌ സൗകര്യങ്ങളും പിന്നീടുള്ള വളർച്ചക്ക്‌ സഹായകരമായി. ചെറുപ്പത്തിൽ സീനിയർ താരങ്ങൾക്കൊപ്പം കളിക്കാൻ അവസരം ലഭിച്ചതും ഗുണകരമായി. ഭാവിയിലേക്കുള്ള കളിക്കാരനാണെന്ന്‌ തുടക്കത്തിലെ പ്രകടനം കൊണ്ട്‌ തെളിയിച്ചു. പിന്നീട്‌ അത്‌ തുടരാനായി. ഞങ്ങൾ ഒരുമിച്ചും എതിർടീമിലും കളിച്ചിട്ടുണ്ട്‌.

തുടക്കം ജയത്തോടെ 
(കെ ടി ചാക്കോ)

പൊലീസിൽ ആദ്യം ജോലിയിൽ പ്രവേശിച്ചത്‌ ഞാനാണെങ്കിലും ഒരു പ്രധാന ടൂർണമെന്റിൽ കളിക്കാനിറങ്ങിയത്‌ ഒന്നിച്ചാണ്‌. 1988ൽ തിരുവനന്തപുരം ചന്ദ്രശേഖരൻ നായർ സ്‌റ്റേഡിയത്തിൽ നടന്ന അഖിലേന്ത്യാ പൊലീസ്‌ ഗെയിംസ്‌. 
ബിഎസ്‌എഫുമായിട്ടായിരുന്നു ഫൈനൽ. രണ്ടാം പകുതിയിൽ ബിഎസ്‌എഫ്‌ ആദ്യം ഗോളടിച്ചു. പന്തുമായി മുന്നേറിയ വിജയനെ ഇടിച്ചുവീഴ്‌ത്തിയതിന്‌ കിട്ടിയ പെനൽറ്റി രാജേന്ദ്രൻ ഗോളാക്കി. അതോടെ ബഹളമായി. ഇരുടീമുകളെയും ജേതാക്കളായി പ്രഖ്യാപിച്ചു. ടീം ആദ്യമായി ഒരു ടൂർണമെന്റിൽ ജയിച്ചു.

ടീമിലെ ബേബി 
(പി പി തോബിയാസ്‌)

പ്രതിഭാധനനായ താരമായിരുന്നു വിജയൻ. പൊലീസിൽ വരുമ്പോൾ 18 വയസ്സ്‌ തികഞ്ഞിരുന്നില്ല. ടീമിലെ ബേബിയായിരുന്നു. ആ ബേബിയാണ്‌ പിന്നീട്‌ ഇന്ത്യ കണ്ട ഏക്കാലത്തെയും മികച്ച കളിക്കാരിലൊരാളായി മാറിയത്‌. കഷ്ടപ്പാടുകളിലൂടെ വന്ന ചെറുപ്പക്കാരനാണ്‌ വിജയൻ. കഠിനപ്രയത്നംകൊണ്ട്‌ മാത്രമാണ്‌ അർജുന അവാർഡും പത്മ പുരസ്‌കാരവുമൊക്കെ തേടിയെത്തിയത്‌. ഗ്രൗണ്ടിലിറങ്ങിയാൽ ഫോർവേഡ്‌ ആണെങ്കിലും എല്ലാ പൊസിഷനിലും വന്നു കളിക്കുമായിരുന്നു. സിസർകട്ടും ഡൈവിങ്‌ ഗോളുമെല്ലാം അനായാസം നേടിയിരുന്നു.

കളിക്കാരനാവാൻ ജനിച്ചവൻ (കോച്ച്‌ എ എം ശ്രീധരൻ)

കളിക്കാരനാകാൻ ജനിച്ചവനായിരുന്നു വിജയൻ. ശരിക്കും നാച്ചുറൽ പ്ലെയർ. ഒരു ഫുട്‌ബോൾ താരം ആകണമെന്ന അടങ്ങാത്ത ആഗ്രഹമാണ്‌ അവനെ ഒരു വലിയ താരമാക്കിയത്‌. എന്റെ സുഹൃത്തായ കോച്ച്‌ ടി കെ ചാത്തുണ്ണിയാണ്‌ ഇങ്ങനെയൊരു പയ്യനുണ്ടെന്നും പൊലീസിൽ എടുക്കാൻ പറ്റുമോയെന്ന്‌ നോക്കാൻ പറയുന്നതും. ആദ്യ കാഴ്‌ചയിൽ ആരോഗ്യസ്ഥിതിയൊന്നും അത്ര മെച്ചമായിരുന്നില്ല. സ്‌കിൽ കണ്ടപ്പോൾ ടീമിനൊപ്പം നിർത്തി. പരിശീലനസമയം കഴിഞ്ഞാലും വിജയൻ പന്തുമായി ഗ്രൗണ്ടിൽ തുടരും. കുറഞ്ഞകാലംകൊണ്ടുതന്നെ സ്ഥിരസ്ഥാനം നേടിയെടുത്തു.