നോക്കൗട്ട് പ്രതീക്ഷ നിലനിർത്താൻ പരാഗ്വെയും തുർക്കിയും നാളെ നേർക്കുനേർ

കാലിഫോർണിയ: ലോകകപ്പ് ഗ്രൂപ്പ് ഡിയിലെ ആദ്യ മത്സരങ്ങളിൽ പരാജയം ഏറ്റുവാങ്ങിയ പരാഗ്വെയ്ക്കും തുർക്കിക്കും ശനിയാഴ്ച നടക്കുന്ന പോരാട്ടം നിർണ്ണായകമാണ്. ടൂർണമെന്റിന്റെ നോക്കൗട്ട് പ്രതീക്ഷകൾ നിലനിർത്താൻ ഇരുടീമുകൾക്കും വിജയം അനിവാര്യമാണ്. ഇന്ത്യൻ സമയം രാവിലെ 8 .30 നാണു മത്സരം.

ആദ്യ മത്സരത്തിൽ തുർക്കി ഓസ്‌ട്രേലിയയോട് 2-0 ന് ഞെട്ടിപ്പിക്കുന്ന തോൽവി വഴങ്ങിയപ്പോൾ, സഹ ആതിഥേയരായ അമേരിക്കയോട് 4-1 എന്ന കനത്ത സ്കോറിനാണ് പരാഗ്വെ പരാജയപ്പെട്ടത്.

വെള്ളിയാഴ്ച ഗ്രൂപ്പിലെ മറ്റ് രണ്ട് ടീമുകളായ അമേരിക്കയും ഓസ്‌ട്രേലിയയും തമ്മിലും മത്സരമുള്ളതിനാൽ സാൻ ഫ്രാൻസിസ്കോ ബേ ഏരിയ സ്റ്റേഡിയത്തിൽ കളി ആരംഭിക്കുന്നതിന് മുമ്പ് തന്നെ ഗ്രൂപ്പ് ഡിയിലെ ചിത്രം കൂടുതൽ വ്യക്തമാകും. എങ്കിലും, ഈ മത്സരത്തിൽ വീണ്ടുമൊരു പരാജയം ഏറ്റുവാങ്ങേണ്ടി വരുന്നത് ഇരുടീമുകളുടെയും മുന്നോട്ടുള്ള പ്രയാണത്തെ കടുത്ത പ്രതിസന്ധിയിലാക്കും.

പ്രതീക്ഷയോടെ തുർക്കി

24 വർഷത്തിന് ശേഷം ലോകകപ്പിലേക്ക് തിരിച്ചെത്തിയ തുർക്കി, നായകൻ ഹാക്കാൻ ചൽഹാനോഗ്ലു, 21-കാരനായ റയൽ മാഡ്രിഡ് താരം അർദ ഗുലർ എന്നിവരുടെ കരുത്തിൽ ഗ്രൂപ്പിൽ അമേരിക്കയ്ക്ക് കടുത്ത വെല്ലുവിളി ഉയർത്തുമെന്ന് പ്രതീക്ഷിക്കപ്പെട്ടിരുന്ന ടീമാണ്.

എന്നാൽ ഓസ്‌ട്രേലിയക്കെതിരെയുള്ള മത്സരത്തിൽ നിരന്തരമായ ആക്രമണത്തിൽ മുന്നിട്ടുനിന്നിട്ടും, ഓസീസിന്റെ കടുത്ത പ്രതിരോധ കോട്ട തകർക്കാൻ കഴിയാത്തത് കോച്ച് വിൻസെൻസോ മോണ്ടെല്ലയെ നിരാശനാക്കിയിരുന്നു. ആ കുറവ് നികത്താനാകും തുർക്കി ഇന്ന് ശ്രമിക്കുക.

അച്ചടക്കമില്ലായ്മയും വിലക്ക് ഭീഷണിയും

16 വർഷത്തിന് ശേഷം ലോകകപ്പിലേക്ക് മടങ്ങിയെത്തിയ പരാഗ്വെയ്ക്ക് ആദ്യ മത്സരം കടുത്ത വേദനയാണ് നൽകിയത്. പ്രതിരോധക്കളിക്ക് പേരുകേട്ട ലാറ്റിനമേരിക്കൻ കരുത്തരായ പരാഗ്വെയുടെ പ്രതിരോധത്തെ അമേരിക്കൻ പട തകർത്തെറിഞ്ഞിരുന്നു.

സൂപ്പർ താരം മിഗുവേൽ അൽമിറോൺ ഉൾപ്പെടെ അഞ്ച് പരാഗ്വെ കളിക്കാരാണ് കഴിഞ്ഞ മത്സരത്തിൽ അച്ചടക്കമില്ലായ്മയ്ക്ക് മഞ്ഞക്കാർഡ് കണ്ടത്. അതിനാൽ തുർക്കിക്കെതിരെ അവർക്ക് അതീവ ജാഗ്രത പുലർത്തേണ്ടി വരും.

ഇവർക്ക് വീണ്ടുമൊരു മഞ്ഞക്കാർഡ് ലഭിച്ചാൽ ഓസ്‌ട്രേലിയക്കെതിരെയുള്ള അവസാന ഗ്രൂപ്പ് മത്സരത്തിൽ വിലക്ക് നേരിടേണ്ടി വരും.

തുർക്കിയെ എങ്ങനെ പരാജയപ്പെടുത്താം എന്നതിന്റെ വ്യക്തമായ തന്ത്രം ഓസ്‌ട്രേലിയ കാണിച്ചുതന്നിട്ടുണ്ട്. എന്നാൽ അത്തരമൊരു അട്ടിമറി ജയം നേടാനുള്ള പ്രതിരോധ അച്ചടക്കം പരാഗ്വെയ്ക്കുണ്ടോ എന്ന് കണ്ടറിയണം.

ലോകകപ്പിലേക്കുള്ള നീണ്ട നാളത്തെ കാത്തിരിപ്പിന് ശേഷമുള്ള മടങ്ങിവരവിൽ കളിക്കാർ വൈകാരിക സമ്മർദ്ദത്തിലായതാകാം ആദ്യ മത്സരത്തിലെ തോൽവിക്ക് കാരണമെന്ന് പരാഗ്വെ കോച്ച് ഗുസ്താവോ അൽഫാരോ പറഞ്ഞു.

"ലോകകപ്പ് പോലുള്ള വേദികളിൽ വികാരങ്ങൾ മാറ്റിവെച്ച്, കൃത്യമായ തീരുമാനങ്ങൾ എടുക്കുന്നതിലും കളിയിൽ ശ്രദ്ധ കേന്ദ്രീകരിക്കുന്നതിലുമാണ് ശ്രദ്ധിക്കേണ്ടത്," അൽഫാരോ വ്യക്തമാക്കി.