മെസിയെ മറികടക്കാൻ എംബാപ്പെ; ചരിത്ര നേട്ടത്തിലേക്ക് ഒരു ​ഗോൾ ദൂരം

മയാമി: ലോകകപ്പ് സെമിയിൽ കലിടറിയെങ്കിലും ​ഗോൾ നേട്ടത്തിൽ ലയണൽ മെസിയെ കിലിയൻ എംബാപ്പെ മറികടക്കുമോ എന്ന ആകാംക്ഷയിലാണ് ആരാധകർ. നിലവിൽ എട്ട് ​ഗോൾ നേടിയ ഫ്രഞ്ച്‌ ക്യാപ്‌റ്റൻ ഗോൾഡൻ ബൂട്ടിനായുള്ള മത്സരത്തിൽ മെസിക്ക്‌ പിറകിലാണ്‌. എട്ട്‌ ഗോളും മൂന്ന്‌ അവസരവുമാണ്‌ എംബാപ്പെ ലോകകപ്പിൽ നേടിയത്. മെസിക്ക്‌ എട്ട്‌ ഗോളാണെങ്കിലും നാല്‌ അവസരമുണ്ട്‌. ഇരുവർക്കും ശേഷിക്കുന്ന ഏക മത്സരം നിർണായകമാണ്‌.

ലൂസേഴ്‌സ്‌ ഫൈനൽ ഇം​ഗ്ലണ്ടിനെതിരെ ഒരു ​ഗോൾ നേടിയാൽ രണ്ട് നേട്ടങ്ങളാണ് എംബാപ്പെയെ കാത്തിരിക്കുന്നത്. ഒമ്പതു ​ഗോളുമായി അർജന്റീനൻ ക്യാപ്റ്റനെ മറികടക്കാനും ലോകകപ്പ് ചരിത്രത്തിൽ 21 ​ഗോളുമായി ഒപ്പമെത്താനും താരത്തിന് കഴിയും. കഴിഞ്ഞ തവണ എട്ടു ​ഗോളുമായി ​ഗോൾഡൻ ബൂട്ട് എംബാപ്പെയാണ് സ്വന്തമാക്കിയത്.

സെമിയിൽ സ്‌പെയ്‌നിനോട്‌ രണ്ട്‌ ഗോളിന്‌ തോറ്റതാണ്‌ ഫ്രാൻസ്‌ മടങ്ങയത്. അതുവരെ ഗോളടിച്ചും എതിരാളിയെ തകർത്തും മുന്നേറിയ കിലിയൻ എംബാപ്പെയ്‌ക്കും കൂട്ടർക്കും സ്‌പെയ്‌നിന്റെ അച്ചടക്കമുള്ള കളിയിൽ ശ്വാസംമുട്ടി. പൊരുതാതെയായിരുന്നു കീഴടങ്ങൽ.

നാളെ പുലർച്ചെ 2.30ന്‌ മയാമി സ്‌റ്റേഡിയത്തിലാണ്‌ ലൂസേഴ്‌സ്‌ ഫൈനൽ. നിരാശയിലാണെങ്കിലും യൂറോപ്യൻ ടീമുകൾ തമ്മിലുള്ള പോരാട്ടം കടുത്തതാകും. മൂന്നാം സ്ഥാനവുമായി അഭിമാനപൂർവം നാട്ടിലേക്ക്‌ മടങ്ങുകയെന്നതാകും ലക്ഷ്യം. കഴിഞ്ഞ ലോകകപ്പ്‌ ക്വാർട്ടറിൽ ഇരുടീമുകളും ഏറ്റുമുട്ടിയപ്പോൾ ഫ്രാൻസ്‌ 2–1ന്‌ ജയിച്ചു.