ഓർമയ്‌ക്ക്‌ സല്യൂട്ട്‌ ; കേരള പൊലീസ് ഫുട്ബോൾ ടീമിന് 40

തിരുവനന്തപുരം : കേരള പൊലീസ് ഫുട്ബോൾ ടീമിന്റെ വീരഗാഥയ്‌ക്ക്‌ 40 വർഷം തികഞ്ഞ ആഘോഷവേളയിൽ കളിക്കളത്തിലെ പഴയ പടക്കുതിരകൾ ഒത്തുചേർന്നു. ഐ എം വിജയനും യു ഷറഫലിയും പാപ്പച്ചനും ഉൾപ്പെടെ മുപ്പതോളം മുൻതാരങ്ങൾ പഴയ ജേഴ്സിയിൽ അണിനിരന്നു.

കുരികേശ് മാത്യു, ഐ എം വിജയൻ, കെ ടി ചാക്കോ, പി പി തോബിയാസ്‌, ഹബീബ്‌ റഹ്‌മാൻ തുടങ്ങിയവർ അണിനിരന്ന പൊലീസ് ടീം വി പി ഷാജിയും സേവിയർ പയസും ഉൾപ്പെട്ട കേരള ഇലവനെ 2–-1ന്‌ തോൽപ്പിച്ചു. ബഷീറും സക്കീറും പൊലീസിനായി ഗോളടിച്ചു. ആശ്വാസഗോൾ രഞ്‌ജിത്‌ കുന്നുമ്മലിന്റേതാണ്‌.

ചന്ദ്രശേഖരൻനായർ സ്‌റ്റേഡിയത്തിൽ ഒത്തുചേരലും വാർഷികാഘോഷവും മന്ത്രി വി ശിവൻകുട്ടി ഉദ്ഘാടനം ചെയ്തു. ഐ എം വിജയൻ, മുൻ പരിശീലകരായ എ എം ശ്രീധരൻ, ഗബ്രിയേൽ ജോസഫ്, മുൻ മാനേജർ ഡി വിജയൻ എന്നിവർക്കൊപ്പം അന്നത്തെ ടീം സഹായി സാബുവിനെയും ആദരിച്ചു.