2026 ഫിഫ ലോകകപ്പ്; ഫ്രാൻസ് ടീമിന് മുൻതൂക്കമില്ലെന്ന യമാലിന്റെ പ്രസ്താവന, മറുപടിയുമായി ജൂൾസ് കുണ്ടെ

മെക്സിക്കോ സിറ്റി: 2026 ലെ ഫിഫ ലോകകപ്പിൽ ഫ്രാൻസ് ടീമിന് മുൻതൂക്കമില്ലെന്ന സ്പെയിൻ താരം ലമീൻ യമാലിന്റെ പരാമർശത്തിൽ പ്രതികരണവുമായി ഫ്രഞ്ച് ഡിഫൻഡർ ജൂൾസ് കുണ്ടെ.

യമാലിന്റെ അഭിപ്രായങ്ങൾ തന്നെ ഒട്ടും അലോസരപ്പെടുത്തുന്നില്ലെന്നും, ഇതൊരു ടൂർണമെന്റ് മാത്രമാണെന്നും കുണ്ടെ വ്യക്തമാക്കി. ഫ്രഞ്ച് മാധ്യമമായ 'ലെക്വിപ്പ്'ആണ് ഈ വാർത്ത റിപ്പോർട്ട് ചെയ്തത്.

ബാഴ്‌സലോണയിലെ തന്റെ സഹതാരം കൂടിയായ യമാലിനെക്കുറിച്ച് കുണ്ടെ ഇങ്ങനെ പറഞ്ഞു: "അവനെ എനിക്ക് വളരെ അടുത്തറിയാം. വളരെ കരുത്തനും തന്റെ അഭിപ്രായങ്ങൾ തുറന്നുപറയാൻ മടിക്കാത്തവനുമായ ഒരു കളിക്കാരനാണ് അവൻ.

ഒരു ടൂർണമെന്റിൽ ഫേവറിറ്റുകൾ എന്ന് വിളിക്കപ്പെടുന്നത് കാര്യമായ ഗുണമൊന്നും ചെയ്യുന്നില്ല. അവന്റെ പരാമർശങ്ങൾ എന്നെ അലോസരപ്പെടുത്തുന്നില്ല, മറിച്ച് ഒരു ചിരിയാണ് അത് നൽകിയത്."

നേരത്തെ, 'എൽ പാർട്ടിഡാസോ ഡി കോപെ'യുമായുള്ള അഭിമുഖത്തിൽ, ഫ്രാൻസ് മികച്ച ഫോമിലാണെന്ന വാദത്തെ യമാൽ തള്ളിക്കളഞ്ഞിരുന്നു.

യൂറോ കപ്പിന് ശേഷം ഫ്രാൻസ് തങ്ങളെ തോൽപ്പിച്ചിട്ടില്ലെന്നും, ഗ്രൂപ്പ് ഘട്ടത്തിലെ പ്രകടനത്തേക്കാൾ ഉപരിയായി നോക്കൗട്ട് ഘട്ടത്തിലെ സമ്മർദ്ദമാണ് പ്രധാനമെന്നും യമാൽ ചൂണ്ടിക്കാട്ടിയിരുന്നു.

ഈ ലോകകപ്പിൽ ഇരു ടീമുകളും തോൽവി അറിയാതെയാണ് പ്രീ ക്വാർട്ടറിലേക്ക് പ്രവേശിച്ചിരിക്കുന്നത്. ഗ്രൂപ്പ് ഘട്ടത്തിൽ വമ്പൻ വിജയം സ്വന്തമാക്കിയ ഫ്രാൻസ് ജൂലൈ 4-ന് പരാഗ്വേയെ നേരിടും. അതേസമയം, ക്രിസ്റ്റ്യാനോ റൊണാൾഡോ നയിക്കുന്ന പോർച്ചുഗലുമായി ജൂലൈ 6-നാണ് സ്പെയിനിന്റെ നോക്കൗട്ട് മത്സരം നടക്കുക.