വാണിജ്യ സംപ്രേഷണാവകാശം തങ്ങളുടെ ബാധ്യതയല്ല; ലോകകപ്പ് അനിശ്ചിതത്വത്തിൽ കൈമലർത്തി പ്രസാർ ഭാരതി

ന്യൂഡൽഹി: ഇന്ത്യൻ പ്രീമിയർ ലീഗിന്റെ ആവേശം പൂർത്തിയാകുന്നതോടെ കായികപ്രേമികൾ കാത്തിരിക്കുന്ന ഫിഫ ലോകകപ്പ് 2026-ന് ജൂൺ 12-ന് പന്തുരുളും. ചരിത്രത്തിലാദ്യമായി 48 ടീമുകൾ മാറ്റുരയ്ക്കുന്ന ഈ മെഗാ ടൂർണമെന്റിനായി ഇന്ത്യയിലെ ഫുട്ബോൾ പ്രേമികൾ വലിയ തയ്യാറെടുപ്പുകൾ തുടങ്ങിക്കഴിഞ്ഞു.

എന്നാൽ, ടൂർണമെന്റ് ആരംഭിക്കാൻ വെറും മൂന്നാഴ്ച മാത്രം ബാക്കിനിൽക്കെ, ഇന്ത്യയിൽ ടെലിവിഷനിലോ ഡിജിറ്റൽ പ്ലാറ്റ്‌ഫോമുകളിലോ മത്സരങ്ങൾ തത്സമയം കാണാൻ ഏത് ബ്രോഡ്കാസ്റ്ററെയാണ് സമീപിക്കേണ്ടതെന്ന കാര്യത്തിൽ ഇതുവരെ അന്തിമ തീരുമാനമായിട്ടില്ല.

ഈ ആശങ്കകൾ വർദ്ധിപ്പിച്ചുകൊണ്ട്, ലോകകപ്പിന്റെ ഇന്ത്യൻ സംപ്രേഷണാവകാശം സ്വന്തമാക്കുക എന്നത് തങ്ങളുടെ ഉത്തരവാദിത്തമല്ലെന്ന് പൊതുസംപ്രേഷകരായ പ്രസാർ ഭാരതി ഡൽഹി ഹൈക്കോടതിയെ ഔദ്യോഗികമായി അറിയിച്ചു. ഇതോടെ പ്രസാർ ഭാരതി ഈ സംപ്രേഷണാവകാശ മത്സരത്തിൽ നിന്നും പൂർണ്ണമായി പിന്മാറിയിരിക്കുകയാണ്.

ഇന്ത്യ-അഫ്ഗാനിസ്ഥാൻ പരമ്പരയിലൂടെ ക്രിക്കറ്റ് ആവേശം തുടരുമെങ്കിലും, ലോകമെമ്പാടുമുള്ള ഫുട്ബോൾ പ്രേമികളെപ്പോലെ ലോകകപ്പ് ആവേശത്തിലേക്ക് ആഴ്ന്നിറങ്ങാൻ കാത്തിരിക്കുന്ന മലയാളി ആരാധകർ ഉൾപ്പെടെയുള്ള ദശലക്ഷക്കണക്കിന് ഇന്ത്യൻ ഫുട്ബോൾ പ്രേമികളെ ഈ അനിശ്ചിതത്വം വലിയ നിരാശയിലാക്കുന്നു.

ഇന്ത്യൻ ഫുട്ബോൾ ടീമിന്റെ ഫിഫ റാങ്കിങ് നിലവിൽ പുരുഷ വിഭാഗത്തിൽ 136-ാം സ്ഥാനത്താണെങ്കിലും, ലോകകപ്പ് കാലമായാൽ രാജ്യത്തുടനീളം വലിയ ഫുട്ബോൾ ലഹരിയാണ് ദൃശ്യമാകാറുള്ളത്. കേരളം, ഗോവ, കൊൽക്കത്ത, കർണാടക, പഞ്ചാബ് തുടങ്ങിയ പരമ്പരാഗത ഫുട്ബോൾ കേന്ദ്രങ്ങളിൽ മാത്രമല്ല, ഇന്ത്യയിലാകെ ഈ ആവേശം പ്രകടമാകും.

കഴിഞ്ഞ 2022-ലെ ഖത്തർ ലോകകപ്പ് സമയത്ത് ഇന്ത്യയിൽ വിവിധ പ്ലാറ്റ്‌ഫോമുകളിലായി ഏകദേശം 74.5 കോടി പ്രേക്ഷകരാണ് മത്സരങ്ങൾ തത്സമയം കണ്ടത്; ആഗോളതലത്തിൽ ടെലിവിഷൻ കാഴ്ചക്കാരുടെ എണ്ണത്തിൽ ചൈനയ്ക്ക് തൊട്ടുപിന്നിൽ മുൻനിരയിലുള്ള 10 രാജ്യങ്ങളിൽ ഒന്നായിരുന്നു ഇന്ത്യ.

ഇത്തവണ അമേരിക്ക, കാനഡ, മെക്സിക്കോ എന്നീ മൂന്ന് രാജ്യങ്ങളിലെ 16 നഗരങ്ങളിലായി 104 മത്സരങ്ങളാണ് അരങ്ങേറുന്നത്. ഇന്ത്യയിലെ മീഡിയ അവകാശങ്ങൾ ഇതുവരെ വിറ്റുപോകാത്തതിന് പ്രധാന കാരണം മത്സരങ്ങളുടെ സമയക്രമമാണെന്നാണ് വിദഗ്ധർ ചൂണ്ടിക്കാണിക്കുന്നത്.

ജൂലൈ 20-ന് നടക്കുന്ന ഫൈനൽ ഉൾപ്പെടെയുള്ള ഭൂരിഭാഗം മത്സരങ്ങളും ഇന്ത്യൻ സമയം അർദ്ധരാത്രിക്ക് ശേഷമാണ് ആരംഭിക്കുക. ആകെ മത്സരങ്ങളിൽ വെറും 14 എണ്ണം മാത്രമാണ് ഇന്ത്യൻ സമയം അർദ്ധരാത്രിക്ക് മുൻപായി ആരംഭിക്കുന്നത് എന്നതിനാൽ വലിയ തുക മുടക്കാൻ മുൻനിര ഇന്ത്യൻ ബ്രോഡ്കാസ്റ്റർമാർ മടിക്കുന്നതാണ് ഈ പ്രതിസന്ധിക്ക് കാരണം