ഗോളടി തുടർന്ന്‌ ക്രിസ്‌റ്റ്യാനോ റൊണാൾഡോ

റിയാദ്‌: സൗദി പ്രൊ ലീഗിൽ ഗോളടി തുടർന്ന്‌ ക്രിസ്‌റ്റ്യാനോ റൊണാൾഡോ. വെള്ളിയാഴ്ച നടന്ന മത്സരത്തില്‍ അൽ ഫൈസാലിയ്ക്കെതിരെ ​ഗോൾ നേടിയതോടെ ആയിരം ​ഗോളുകളെന്ന നേട്ടത്തിലേക്ക് താരം ഒരുപടി കൂടെ അടുത്തു. കളിജീവിതത്തിൽ ആകെ 982 ഗോളായി. ആയിരത്തിലെത്താൻ 18 എണ്ണം കൂടി മതി.

മത്സരത്തിൽ അൽ നസർ 3-1നാണ് അൽ- ഫൈസാലിയെ തകർത്തത്. മത്സരത്തിന്റെ രണ്ടാം പകുതിയിലായിരുന്നു റൊണാൾഡോ ​ഗോൾ നേടിയത്. ജോവോ ഫെലിക്സ് നൽകിയ ക്രോസിൽ നിന്നും തകര്‍പ്പന്‍ ഹെഡറിലൂടെയാണ് റൊണാൾഡോ ​ഗോൾ നേടിയത്. അൽ നസറിനായി അൽ-ഹംദാനും ആഞ്ചലോ ഗബ്രിയേലും ​ഗോൾ നേടി. അൽ ഫൈസാലിക്കായി ബോംഗോണ്ട ആശ്വാസ ​ഗോൾ നേടി.