അതിരുകൾ കടന്ന സ്വപ്നം; വീണ്ടും പന്തുതട്ടി അഫ്ഗാൻ വനിതകൾ

ഓക്‌ലൻഡ് : താലിബാൻ ഭരണത്തിന് കീഴിൽ സ്വന്തം മണ്ണിൽ ഫുട്‌ബോൾ വിലക്കപ്പെട്ട അഫ്​ഗാൻ വനിതകൾ പ്രവാസ ജീവിതത്തിനിടെ മൈതാനത്തിലേക്ക് തിരിച്ചുവരികയാണ്. ന്യൂസിലാൻഡിലെ ഓക്‌ലൻഡിൽ കുക്ക് ഐലൻഡ്സിനെതിരെ സൗഹൃദ മത്സരത്തിൽ വീണ്ടും കളത്തിലറങ്ങിയതോടെയാണ് 'അഫ്ഗാൻ വുമൺ യുണൈറ്റഡ്' എന്ന അഭയാർഥി ഫുട്‌ബോൾ ടീം ലോകശ്രദ്ധയാകർഷിച്ചത്. രണ്ട് മത്സരങ്ങളിലും പരാജയപ്പെട്ടെങ്കിലും അതിജീവനത്തിന്റെയും പോരാട്ടത്തിന്റെയും പ്രതീകമായി മാറുകയാണ് അഫ്​ഗാൻ വനിതകൾ.

2021 ആഗസ്തിൽ താലിബാൻ അഫ്​ഗാനിസ്ഥാന്റെ അധികാരം പിടിച്ചെടുത്തതോടെ സ്ത്രീകൾക്ക് കായികമുൾപ്പടെ പല മേഖലകളിലും വിലക്കേർപ്പെടുത്തിയിരുന്നു. തുടർന്ന് ഓസ്ട്രേലിയ, യുകെ തുടങ്ങിയ രാജ്യങ്ങളിലേക്ക് പലായനം ചെയ്ത ദേശീയ വനിതാ ടീമിലെ അം​ഗങ്ങൾ ചേർന്നാണ് 'അഫ്ഗാൻ വുമൺ യുണൈറ്റഡ്' എന്ന ടീമിന് രൂപം നൽകിയത്. ഭാവിയിൽ ഔദ്യോ​ഗികമായി അഫ്​ഗാനിസ്ഥാനെ പ്രതിനിധീകരിക്കാമെന്ന് ഏപ്രിലിൽ ഫിഫ വ്യക്തമാക്കിയിരുന്നു.

ആദ്യമായാണ് വിദേശ രാജ്യങ്ങളിൽ കഴിയുന്ന 23 അഫ്​ഗാൻ വനിതാ താരങ്ങൾ ഒരുമിക്കുന്നത്. ഒളിമ്പിക്സ്, ലോകകപ്പ് തുടങ്ങിയ വേദികൾ ലക്ഷ്യമിട്ടുള്ള മുന്നൊരുക്കങ്ങളുടെ ഭാ​ഗമാണ് ഈ തിരിച്ചുവരവ്. പ്രതിസന്ധികളെയും വിലക്കുകളെയും അതിജീവിച്ചാണ് പല താരങ്ങളും വേദിയിലെത്തിയത്. പരാജയപ്പെട്ടെങ്കിലും വർഷങ്ങൾ നീണ്ട അനിശ്ചിതത്വങ്ങൾക്കൊടുവിൽ ബൂട്ടണിഞ്ഞ ആത്മവിശ്വാസത്തിലാണ് ഈ വനിതകൾ. തോൽവികൾക്കും വിലക്കുകൾക്കും തങ്ങളുടെ ആത്മവീര്യം തകർക്കാനാവില്ലെന്ന അടയാളപ്പെടുത്തൽ കൂടിയാണിത്.