കോഹ്‍ലിക്ക് 83-ാം സെഞ്ചുറി; രോഹിത്തിന് അർധ സെഞ്ചുറി: ഇന്ത്യ മികച്ച നിലയിൽ

റാഞ്ചി: മുൻ ക്യാപ്റ്റന്മാർ മുന്നിൽ നിന്ന് നയിച്ചപ്പോൾ ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ ആദ്യ മത്സരത്തിൽ ഇന്ത്യ മികച്ച നിലയിൽ. 38 ഓവറിൽ നാലു വിക്കറ്റ് നഷ്ടത്തിൽ 233 റൺസെന്ന നിലയിലാണ് ഇന്ത്യ. വിരാട് കോഹ്‍ലി സെഞ്ചുറിയുമായി നിറഞ്ഞാടിയപ്പോൾ രോഹിത് ശർമ അർധസെഞ്ചുറി നേടി. 102 പന്തിൽ നിന്നാണ് കോഹ്‍ലി തന്റെ കരിയറിലെ 83-ാം സെഞ്ചുറി നേടിയത്.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് തുടക്കത്തിൽ തന്നെ ഓപ്പണർ യശസ്വി ജയ്‌സ്വാളിനെ നഷ്ടമായി. എന്നാൽ പിന്നീട് രോഹിതും വിരാട് കോഹ‍്‍ലിയും ചേർന്ന് ഇന്ത്യൻ ടീമിനെ മുന്നോട്ട് നയിക്കുകയായിരുന്നു. പത്തോവർ അവസാനിക്കുമ്പോൾ 80-1 എന്ന നിലയിലായിരുന്നു ഇന്ത്യ. പിന്നീട് രോഹിത്തും കോഹ്‍ലിയും അർധസെഞ്ചുറി തികച്ചതോടെ ഇന്ത്യ സ്കോറും ഉയർന്നു. ടീം സ്‌കോർ 161 ൽ നിൽക്കേയാണ് രോഹിത്ത് പുറത്തായത്. അഞ്ചുഫോറുകളും മൂന്ന് സിക്‌സറുമടങ്ങുന്നതായിരുന്നു രോഹിത്തിന്റെ ഇന്നിങ്‌സ്.

ഏകദിന ക്രിക്കറ്റിൽ ഏറ്റവും കൂടുതൽ സിക്സറുകൾ നേടുന്ന താരമെന്ന റെക്കോഡും രോഹിത് സ്വന്തമാക്കി. കരിയറിൽ 352 സിക്സറുകളാണ് താരം പറത്തിയത്. പാകിസ്ഥാൻ മുൻ ക്യാപ്റ്റൻ ഷാഹിദ് അഫ്രീദിയെ (351) ആണ് രോഹിത് മറികടന്നത്.