ആ റെക്കോഡും ഹിറ്റ്മാന് സ്വന്തം; മറികടന്നത് പാക് താരത്തെ

റാഞ്ചി: ദക്ഷിണാഫ്രിക്കയ്‌ക്കെതിരായ ഏകദിന ക്രിക്കറ്റ് പരമ്പരയിൽ പുതിയ റെക്കോഡിട്ട് ഇന്ത്യൻ മുൻ ക്യാപറ്റൻ രോഹിത് ശർമ. ഏകദിന ക്രിക്കറ്റിൽ ഏറ്റവും കൂടുതല്‍ സിക്സറുകൾ നേടുന്ന താരമെന്ന് റെക്കോഡാണ് താരം സ്വന്തമാക്കിയത്. കരിയറിൽ 352 സിക്സറുകളാണ് താരം പറത്തിയത്. പാകിസ്ഥാൻ മുൻ ക്യാപ്റ്റൻ ഷാഹിദ് അഫ്രീദിയെ (351) ആണ് രോഹിത് മറികടന്നത്.

ദക്ഷിണാഫ്രിക്കയ്ക്കെതിരെ അർധസെഞ്ചുറി നേടിയ (57) താരം മൂന്ന് സിക്സുകളാണ് മത്സരത്തിൽ നേടിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് തുടക്കത്തിൽ തന്നെ ഓപ്പണർ യശസ്വി ജയ്‌സ്വാളിനെ നഷ്ടമായി. എന്നാൽ പിന്നീട് രോഹിതും വിരാട് കോഹ‍്‍ലിയും ചേർന്ന് ഇന്ത്യൻ ടീമിനെ മുന്നോട്ട് നയിക്കുകയായിരുന്നു.

പത്തോവർ അവസാനിക്കുമ്പോൾ 80-1 എന്ന നിലയിലായിരുന്നു ഇന്ത്യ. പിന്നീട് രോഹിത്തും കോഹ്‍ലിയും അർധസെഞ്ചുറി തികച്ചതോടെ ഇന്ത്യ സ്കോറും ഉയർന്നു. ടീം സ്‌കോർ 161 ൽ നിൽക്കേയാണ് രോഹിത്ത് പുറത്തായത്. അഞ്ചുഫോറുകളും മൂന്ന് സിക്‌സറുമടങ്ങുന്നതായിരുന്നു രോഹിത്തിന്റെ ഇന്നിങ്‌സ്.