പശ്ചിമ ബംഗാളിൽ യുവതി ആത്മഹത്യ ചെയ്തു; എസ്ഐആർ നടപടികൾ കാരണം സമ്മർദത്തിലായിരുന്നുവെന്ന് കുടുംബം

കൊൽക്കത്ത: പശ്ചിമ ബംഗാളിൽ യുവതി തീകൊളുത്തി ആത്മഹത്യ ചെയ്തു. എസ്ഐആർ സമ്മർദം കാരണം മാനസിക സംഘർഷം അനുഭവിച്ചിരുന്നെന്നും ഇതേത്തുടർന്നാണ് യുവതി ആത്മഹത്യ ചെയ്തതെന്നും കുടുംബം ആരോപിച്ചു. പുർബ ബർധമാൻ ജില്ലയിൽ നിന്നുള്ള ഖാതൂൺ കാസി (40) എന്ന യുവതിയാണ് വെള്ളിയാഴ്ച രാത്രി തീകൊളുത്തി മരിച്ചത്.

2022-ലെ വോട്ടർ പട്ടികയിൽ മുസ്താര കാസിയുടെ പേര് ഉൾപ്പെട്ടിരുന്നെങ്കിലും, നിലവിലെ SIR നടപടിയിൽ തന്റെ പേര് ഒഴിവാക്കപ്പെടുമോ എന്ന ഭയം കടുത്ത ഉത്കണ്ഠയ്ക്ക് കാരണമായിരുന്നു എന്ന് പൊലീസ് പറയുന്നു.

സംഭവത്തിൽ മുസ്താരയുടെ കുടുംബം കേന്ദ്ര സർക്കാരിനെതിരെ ഗുരുതര ആരോപണമുയർത്തി. എസ്ഐആറിനെക്കുറിച്ചുള്ള ഭയമാണ് മകൾ ആത്മഹത്യ ചെയ്യാൻ കാരണമെന്നും, അവളുടെ മരണത്തിന് കേന്ദ്ര സർക്കാരാണ് ഉത്തരവാദിയെന്നും മുസ്താരയുടെ ബന്ധുവായ കാസി സബീറുൾ ഇസ്ലാം പറഞ്ഞു.

തൃണമൂൽ കോൺഗ്രസ് എംപി സായോനി ഘോഷ് ശനിയാഴ്ച രാത്രി മുസ്താരയുടെ വീട്ടിലെത്തി കുടുംബാംഗങ്ങളെ കണ്ടു. സായോനി ഘോഷും സംഭവത്തിൽ ബിജെപിയെ കുറ്റപ്പെടുത്തി. എസ്ഐആർ നടപടി മൂലം കഴിഞ്ഞ ഒരു മാസത്തിനുള്ളിൽ നാല് ബ്ലോക്ക് ലെവൽ ഓഫീസർമാർ ഉൾപ്പെടെ 40 പേർ മരിച്ചതായി തൃണമൂൽ കോൺഗ്രസ് അവകാശപ്പെടുന്നുണ്ട്.

അതേസമയം പശ്ചിമ ബംഗാളിലെ വോട്ടർ പട്ടികാ ശുദ്ധീകരണ നടപടിയായ എസ്ഐആറിന്റെ ആദ്യ ഘട്ടം അവസാനിക്കുകയാണ്. നവംബർ 29 വരെ, നിലവിലെ പട്ടികയിലുണ്ടായിരുന്ന 18.70 ലക്ഷം മരിച്ച വോട്ടർമാരെ ഒഴിവാക്കിയതായി തിരഞ്ഞെടുപ്പ് കമ്മീഷൻ അറിയിച്ചു.

സംസ്ഥാനത്തെ എസ്ഐആർ നടപടിയെ തൃണമൂൽ കോൺഗ്രസ് ശക്തമായി എതിർത്തിരുന്നു. മുഖ്യമന്ത്രി മമത ബാനർജി ഈ നടപടിയെ 'വോട്ട്ബന്ദി' (വോട്ട് നിരോധനം) എന്ന് വിശേഷിപ്പിക്കുകയും, വോട്ടർമാരുടെ അവകാശങ്ങൾ സംരക്ഷിക്കുമെന്നും പ്രഖ്യാപിച്ചിരുന്നു. ഡിസംബർ 1 തിങ്കളാഴ്ച ആരംഭിക്കുന്ന പാർലമെന്റിന്റെ ശീതകാല സമ്മേളനത്തിൽ പ്രതിപക്ഷം ഈ വിഷയം ഉന്നയിക്കാൻ സാധ്യതയുണ്ട്.