മർദിച്ചു, വെടിവച്ചു, കല്ലുകൊണ്ട് തല ചതച്ചു.. മഹാരാഷ്ട്രയിൽ ദുരഭിമാനക്കൊല; കാമുകന്റെ വീട്ടിലെത്തി സിന്ദൂരം ചാർത്തി വധുവായി യുവതി

നാഗ്പൂർ: മഹാരാഷ്ട്രയിൽ ജാതിയുടെ പേരിൽ യുവാവിനെ കൊലപ്പെടുത്തിയ സംഭവത്തില്‍, മൃതദേഹത്തിന് മുന്നിൽ വിവാഹ പ്രതിജ്ഞയെടുത്ത് യുവതി. ഇരുപതുകാരനായ സക്ഷം ടേറ്റാണ് ക്രൂരമായി കൊല്ലപ്പെട്ടത്. മർദിച്ചും വെടിവെച്ചും കല്ലുകൊണ്ട് തല ചതച്ചുമാണ് യുവതിയുടെ വീട്ടുകാർ സക്ഷമിനെ കൊലപ്പെടുത്തിയത്. പിന്നാലെ സക്ഷം ടേറ്റിന്റെ കാമുകിയായ ആഞ്ചൽ വീട്ടിലെത്തി തന്റെ നെറ്റിയിൽ സിന്ദൂരം ചാർത്തി മരുമകളായി ജീവിക്കാൻ തീരുമാനിക്കുകയായിരുന്നു. മഹാരാഷ്ട്രയിലെ നന്ദേഡിലാണ് സംഭവം.

ആഞ്ചലിന്റെ സഹോദരങ്ങൾ വഴിയാണ് അവൾ സക്ഷമിനെ പരിചയപ്പെട്ടത്. പതിവായുള്ള വീട്ടിലെ സന്ദർശനങ്ങളിലൂടെ ഇരുവരും അടുക്കുകയും മൂന്ന് വർഷം നീണ്ട പ്രണയബന്ധത്തിലാവുകയും ചെയ്തു. എന്നാൽ, ഇരുവരും തമ്മിലുള്ള ജാതിവ്യത്യാസം കാരണം ആഞ്ചലിന്റെ കുടുംബം ഈ ബന്ധത്തെ ശക്തമായി എതിർത്തിരുന്നു. നിരവധി ഭീഷണികൾ ഉണ്ടായിട്ടും ആഞ്ചൽ സക്ഷമുമായുള്ള ബന്ധം തുടർന്നു.

ആഞ്ചൽ സക്ഷമിനെ വിവാഹം കഴിക്കാൻ തീരുമാനിച്ചു എന്നറിഞ്ഞതോടെ സഹോദരങ്ങളും പിതാവും ചേർന്ന് വ്യാഴാഴ്ച സക്ഷമിനെ മർദിക്കുകയും തലയിൽ വെടിവെക്കുകയും പിന്നീട് കല്ലുകൊണ്ട് തല ചതയ്ക്കുകയും ചെയ്തു. ഈ ക്രൂരമായ ആക്രമണത്തിലാണ് സക്ഷം ടേറ്റ് കൊല്ലപ്പെട്ടത്.

അന്ത്യകർമ്മങ്ങൾ നടക്കുന്നതിനിടെയാണ് ആഞ്ചൽ സക്ഷമിന്റെ വീട്ടിലെത്തിയത്. അവിടെവെച്ച് അവൾ മൃതദേഹത്തിൽ മഞ്ഞൾ തേച്ചു, തന്റെ നെറ്റിയിൽ സിന്ദൂരം ചാർത്തി മരിച്ച കാമുകന്റെ ശരീരം വിവാഹം ചെയ്തു. തുടർന്ന്, സക്ഷമിന്റെ ഭാര്യയായി അവന്റെ വീട്ടിൽ ജീവിതകാലം മുഴുവൻ കഴിയാൻ അവൾ തീരുമാനിച്ചു.

'സക്ഷമിന്റെ മരണത്തിൽ പോലും ഞങ്ങളുടെ സ്നേഹം വിജയിച്ചു, എന്റെ അച്ഛനും സഹോദരങ്ങളും തോറ്റു,' അവൾ പറഞ്ഞു. സക്ഷമിന്റെ കൊലയാളികൾക്ക് വധശിക്ഷ നൽകണമെന്നും ആഞ്ചൽ ആവശ്യപ്പെട്ടു. സക്ഷം മരിച്ചെങ്കിലും തങ്ങളുടെ പ്രണയം ജീവനോടെയുണ്ടെന്നും, അതുകൊണ്ടാണ് താൻ അവനെ വിവാഹം ചെയ്തതെന്നും അവൾ കൂട്ടിച്ചേർത്തു.

സംഭവത്തിൽ ആറ് പ്രതികൾക്കെതിരെ വിവിധ വകുപ്പുകൾ പ്രകാരം പൊലീസ് കേസെടുക്കുകയും അവരെ അറസ്റ്റ് ചെയ്യുകയും ചെയ്തിട്ടുണ്ട്.