'ഡിജിറ്റൽ അറസ്റ്റ്': എഴുപത്തിയൊന്നുകാരന് നഷ്ടമായത് 1.92 കോടി രൂപ; ഹൈദരാബാദിൽ മൂന്ന് പേർ അറസ്റ്റിൽ

ഹൈദരാബാദ്: 'ഡിജിറ്റൽ അറസ്റ്റ് തട്ടിപ്പിനിരയായ 71 കാരന് നഷ്ടമായത് 1.92 കോടി രൂപ. ആധാർ കാർഡ് ദുരുപയോഗം ചെയ്‌തതുമായി ബന്ധപ്പെട്ട് കേസ് രജിസ്റ്റർ ചെയ്തിട്ടുണ്ടെന്ന് വിശ്വസിപ്പിച്ചായിരുന്നു തട്ടിപ്പ്. സംഭവത്തിൽ സൈബർ ക്രൈം പൊലീസ് മൂന്ന് പ്രതികളെ അറസ്റ്റ് ചെയ്തു. ഹൈദരാബാദ് സ്വദേശികളായ പാണ്ഡു വിനിത് രാജ്, ജി തിരുപ്പതയ്യ, ഗൗണി വിശ്വനാഥം എന്നിവരാണ് അറസ്റ്റിലായത്.

സിബിഐ ഓഫീസർമാരാണെന്ന് പരിചയപ്പെടുത്തിയാണ് പ്രതികൾ ഇദ്ദേഹത്തെ സമീപിച്ചത്. മുംബൈയിലെ കാനറാ ബാങ്കിൽ ആധാർ കാർഡ് ഉപയോഗിച്ച് ഒരു അക്കൗണ്ട് തുറന്നിട്ടുണ്ടെന്ന് തട്ടിപ്പുകാർ പറഞ്ഞു. ഇതിന്റെ തെളിവായി കാനറാ ബാങ്ക് എടിഎം കാർഡിന്റെ ചിത്രവും, ഡൽഹി ക്രൈം ബ്രാഞ്ചിന്റെ വ്യാജ എഫ്ഐആറും വീഡിയോ കോളിലൂടെ തട്ടിപ്പുകാർ കാണിച്ചുനൽകി.

കേസ് അവസാനിപ്പിക്കാൻ പണം ആവശ്യപ്പെട്ടതോടെ, നവംബർ 7 മുതൽ 14 വരെയുള്ള ദിവസങ്ങളിലായി വൃദ്ധൻ 1,92,50,070 രൂപ വിവിധ ബാങ്ക് അക്കൗണ്ടുകളിലേക്ക് നിക്ഷേപിച്ചു. താൻ കബളിപ്പിക്കപ്പെട്ടെന്ന് മനസ്സിലായതോടെ അദ്ദേഹം പൊലീസിൽ പരാതി നൽകുകയായിരുന്നു.

രാജ്യത്തുടനീളം ഇവർ ഉൾപ്പെട്ട അഞ്ച് കേസുകൾ കണ്ടെത്തിയിട്ടുണ്ട്. അതിൽ രണ്ടെണ്ണം തെലങ്കാനയിലാണ്. കേസിലെ മുഖ്യപ്രതിയായ സനീപ് (അലക്‌സ്) ഒളിവിലാണ്. വിനിത് രാജ് അക്കൗണ്ടുകൾ നൽകിയ ആളും, തിരുപ്പതയ്യയും വിശ്വനാഥവും ജോയിന്റ് അക്കൗണ്ട് ഉടമകളുമാണ്.

ഇന്ത്യൻ നിയമത്തിൽ "ഡിജിറ്റൽ അറസ്റ്റ്" എന്നൊരു നിയമപരമായ രീതി നിലവിലില്ലെന്ന് പൊലീസ് വ്യക്തമാക്കി. പൊലീസ് വീഡിയോ കോളിലൂടെ ആരെയും അറസ്റ്റ് ചെയ്യില്ല. ഒരു അറസ്റ്റ് യഥാർത്ഥത്തിൽ നടക്കുമ്പോൾ, ഉദ്യോഗസ്ഥർ കൃത്യമായ വാറന്റുമായി സ്ഥലത്ത് നേരിട്ട് എത്തുമെന്നും പൊലീസ് അറിയിച്ചു.