അറസ്‌റ്റ്‌ ഭയന്ന്‌ രാഹുൽ മാങ്കൂട്ടത്തിലിനെ കോൺഗ്രസ്‌ ഒളിപ്പിക്കുന്നു: എം വി ഗോവിന്ദൻ

കോഴിക്കോട്‌: നിർബന്ധിത ഗർഭഛിദ്രം, ലൈംഗികപീഡനം തുടങ്ങിയ ഗുരുതര കുറ്റകൃത്യങ്ങളിൽ പ്രതിയായ യൂത്ത്‌ കോൺഗ്രസ്‌ മുൻസംസ്ഥാന പ്രസിഡന്റ്‌ രാഹുൽ മാങ്കൂട്ടത്തെ അറസ്‌റ്റ്‌ ഭയന്ന്‌ കോൺഗ്രസ്‌ ഒളിപ്പിക്കുകയാണെന്ന്‌ എന്ന്‌ സിപിഐ എം സംസ്ഥാന സെക്രട്ടറി എം വി ഗോവിന്ദൻ. രാഹുൽ മാങ്കൂട്ടത്തിന്റെ ചെയ്‌തികളിൽ കോൺഗ്രസിന്റെ ജീർണ സംസ്‌കാരമാണ്‌ വെളിപ്പെട്ടത്‌. ഇക്കാര്യത്തിൽ കോൺഗ്രസിൽ ഭിന്നത ശക്തമാണെന്നും അദ്ദേഹം പറഞ്ഞു. കോഴിക്കോട്‌ പ്രസ്‌ ക്ലബ്‌ സംഘടിപ്പിച്ച ‘മീറ്റ്‌ ദ ലീഡർ’ പരിപാടിയിൽ സംസാരിക്കുകയായിരുന്നു അദ്ദേഹം.

കുറ്റകൃത്യവുമായി ബന്ധപ്പെട്ട ഇരയുടെ വെളിപ്പെടുത്തലും പരാതികളും കേരളം വളരെ ഗ‍ൗരവത്തോടെയാണ്‌ ചർച്ചചെയ്യുന്നത്‌. കേവലം രാഷ്‌ട്രീയനേട്ടത്തിനുള്ള വിഷയമല്ലിത്‌. കേരളത്തിന്റെ മനസാക്ഷിയുടെ മുന്നിൽ ഇതുപോലൊരു പ്രശ്‌നം സമീപകാലചരിത്രത്തിലൊന്നും ഉണ്ടായിട്ടില്ല. കോൺഗ്രസ്‌ നേതാക്കൾക്കുപോലും ഇക്കാര്യം എതിർക്കാൻ സാധിക്കില്ല. ജനങ്ങൾ എല്ലാം വ്യക്തമായി മനസിലാക്കിയിട്ടുണ്ട്‌. മുൻകൂർ ജാമ്യാപേക്ഷയിൽ കൃത്യം തെളിയിക്കത്തക്ക വിധത്തിലുള്ള കുറ്റസമ്മതംകൂടിയാണ്‌ രാഹുൽ മാങ്കൂട്ടം നടത്തിയത്‌. ഇത്തരത്തിലൊരാൾക്ക്‌ തക്കതായ ശിക്ഷകിട്ടണമെന്നാണ്‌ ഇന്ന്‌ ഏവരും ചർച്ചചെയ്യുന്നത്‌. അതിന്‌ ഉചിതമായ നിയമനടപടികളാണ്‌ കൈക്കൊള്ളുന്നതെന്നും എം വി ഗോവിന്ദൻ പറഞ്ഞു.