ഏഷ്യൻ ഗെയിംസിൽ ചരിത്രനേട്ടവുമായി ഷഫാലി; വനിതാ ക്രിക്കറ്റിൽ സെഞ്ചുറി നേടുന്ന ആദ്യ താരം

നിസ്സിൻ : ഏഷ്യൻ ഗെയിംസ് വനിതാ ക്രിക്കറ്റിൽ ചരിത്രം കുറിച്ച് ഇന്ത്യയുടെ ഷഫാലി വർമ്മ. ബംഗ്ലാദേശിനെതിരായ രണ്ടാം സെമിയിൽ 49 പന്തിൽ പുറത്താകാതെ 100 റൺസ് നേടിയ ഷഫാലി, ഏഷ്യൻ ഗെയിംസിൽ വനിതാ ക്രിക്കറ്റിൽ സെഞ്ചുറി നേടുന്ന ആദ്യ താരമായി. വൈറ്റ്-ബോൾ ക്രിക്കറ്റിലെ ഷഫാലിയുടെ ആദ്യ സെഞ്ചുറിയാണിത്.

ടോസ് നേടി ആദ്യം ബാറ്റ് ചെയ്ത ഇന്ത്യക്കായി ഷഫാലി തുടക്കം മുതൽ ആക്രമണാത്മക ബാറ്റിങ് പുറത്തെടുത്തു. സ്മൃതി മന്ദാനയ്ക്കൊപ്പം ആദ്യ വിക്കറ്റിൽ 72 റൺസിന്റെ കൂട്ടുകെട്ടുണ്ടാക്കി. മന്ദാന 37 റൺസെടുത്തു. ജി കമലിനി 10 പന്തിൽ മൂന്ന് റൺസെടുത്ത് പുറത്തായി.

ക്യാപ്റ്റൻ ഹർമൻപ്രീത് കൗറിനൊപ്പം മൂന്നാം വിക്കറ്റിൽ 94 റൺസിന്റെ കൂട്ടുകെട്ടാണ് ഷഫാലി പടുത്തുയർത്തിയത്. ഹർമൻപ്രീത് 33 പന്തിൽ 40 റൺസെടുത്തു. അവസാന ഓവറുകളിൽ ബംഗ്ലാദേശ് ബൗളർമാരെ കടന്നാക്രമിച്ച ഷഫാലി ഒമ്പത് സിക്സും മൂന്ന് ഫോറും സഹിതമാണ് സെഞ്ചുറി പൂർത്തിയാക്കിയത്.

ഇന്ത്യൻ ഇന്നിങ്സിന്റെ അവസാന പന്തിലാണ് ഷഫാലി സെഞ്ചുറി തികച്ചത്. ഷോർണ അക്തറിന്റെ പന്തിൽ സിംഗിൾ നേടിയാണ് 100 റൺസിലെത്തിയത്. ഇതോടെ ഇന്ത്യ 20 ഓവറിൽ നാല് വിക്കറ്റ് നഷ്ടത്തിൽ 195 റൺസെടുത്തു.

ഏഷ്യൻ ഗെയിംസിൽ പുരുഷ-വനിതാ വിഭാഗങ്ങളിലായി സെഞ്ചുറി നേടുന്ന രണ്ടാമത്തെ ഇന്ത്യൻ താരവുമാണ് ഷഫാലി. 2023ലെ ഏഷ്യൻ ഗെയിംസിൽ നേപ്പാളിനെതിരെ 100 റൺസ് നേടിയ യശസ്വി ജയ്‌സ്വാളാണ് ഇതിന് മുമ്പ് ഈ നേട്ടം കൈവരിച്ച ഇന്ത്യൻ താരം. ഏഷ്യൻ ഗെയിംസിൽ ആദ്യമായി സെഞ്ചുറി നേടിയത് 2010ൽ ചൈനയ്ക്കെതിരെ പാകിസ്ഥാന്റെ ഖാലിദ് ലത്തീഫാണ്.

ട്വന്റി20 രാജ്യാന്തര ക്രിക്കറ്റിൽ സെഞ്ചുറി നേടുന്ന മൂന്നാമത്തെ ഇന്ത്യൻ വനിതാ താരമായും താരം മാറി. സ്മൃതി മന്ദാന രണ്ട് സെഞ്ചുറിയും ഹർമൻപ്രീത് കൗർ ഒരു സെഞ്ചുറിയും നേടിയിട്ടുണ്ട്.

2026ലെ വനിതാ ട്വന്റി20 രാജ്യാന്തര ക്രിക്കറ്റിൽ ഏറ്റവും കൂടുതൽ റൺസ് നേടിയ താരങ്ങളുടെ പട്ടികയിലും ഷഫാലി രണ്ടാം സ്ഥാനത്തെത്തി. സെഞ്ചുറിക്ക് പിന്നാലെ ഈ വർഷം 815 റൺസാണ് ഷഫാലിയുടെ സമ്പാദ്യം. ദക്ഷിണാഫ്രിക്കയുടെ ലോറ വോൾവാർട്ടിനേക്കാൾ ഒമ്പത് റൺസ് മാത്രം പിന്നിലാണ് ഷഫാലി.

വനിതാ ട്വന്റി20 യിൽ ഏറ്റവും കൂടുതൽ സിക്സുകൾ നേടുന്ന താരമെന്ന റെക്കോഡും ഷഫാലി സ്വന്തമാക്കി. 2026ൽ ഇതുവരെ 35 സിക്സുകളാണ് താരം നേടിയത്. 2024ൽ ശ്രീലങ്കയുടെ ചമരി അത്തപ്പത്തുവിന്റെ 32 സിക്സുകളെന്ന റെക്കോഡാണ് ഷഫാലി മറികടന്നത്.

ഇന്ത്യ-ബംഗ്ലാദേശ് സെമിഫൈനലിലെ വിജയികൾ ചൊവ്വാഴ്ച സ്വർണമെഡൽ പോരാട്ടത്തിൽ ശ്രീലങ്കയെ നേരിടും. ആദ്യ സെമിഫൈനലിൽ പാകിസ്ഥാനെ എട്ട് വിക്കറ്റിന് തോൽപ്പിച്ചാണ് ശ്രീലങ്ക ഫൈനലിലെത്തിയത്.