സ്ഥിരത= ജഡേജ

ലണ്ടൻ

സുവർണ തലമുറയുടെ അവസാനകണ്ണിയെന്നായിരുന്നു രവീന്ദ്ര ജഡേജയുടെ വിശേഷണം. ഇന്ത്യയുടെ നിരവധി ടെസ്​റ്റ്​ജയങ്ങളിൽ പങ്കാളിയായിരുന്ന ജഡേജ ഇംഗ്ലണ്ടിലെത്തുമ്പോൾ യുവനിരയ്ക്കൊപ്പം ഒന്നിച്ചുനീങ്ങുമോ എന്ന സംശയമുണ്ടായിരുന്നു. ലീഡ്സിലെ ആദ്യ ടെസ്​റ്റിൽ ബാറ്റിലും പന്തിലും മുപ്പത്താറുകാരൻ നിരാശപ്പെടുത്തി. കാലംകഴിഞ്ഞുവെന്ന വിമർശം ശക്തമായി. 

ഇന്ത്യ ജയിച്ച രണ്ടാം ടെസ്​റ്റിൽ അതിനുള്ള മറുപടി വന്നു. ഒന്നാം ഇന്നിങ്​സിൽ 89 റൺ. രണ്ടാം ഇന്നിങ്സിൽ പുറത്താകാതെ 69. ഒരു വിക്കറ്റും. തുടർന്നുള്ള മൂന്ന്​ ടെസ്​റ്റിലും ബാറ്റിൽ ക്യാപ്​റ്റൻ ശുഭ്​മാൻ ഗില്ലിനെക്കാളും സ്ഥിരത കാട്ടി. ലോർഡ്​സിൽ ജഡേജയുടെ പോരാട്ടവീര്യത്തിന്​ പിന്തുണ കിട്ടിയില്ല. 22 റണ്ണിന്​ ഇന്ത്യ തോറ്റ കളിയിൽ 61 റണ്ണുമായി ഓൾറ‍ൗണ്ടർ ഒരറ്റത്തുണ്ടായിരുന്നു.

അഞ്ച്​ ടെസ്​റ്റിൽ 516 റണ്ണുമായി പട്ടികയിൽ നാലാമൻ. ഒരു സെഞ്ചുറി ഉൾപ്പെടെ ആറ്​ ഇന്നിങ്​സിലാണ്​ 50ന്​ മുകളിൽ റൺ നേടിയത്. ​പുറത്താകാതെ നേടിയ 107 റണ്ണാണ്​ ഉയർന്ന സ്​കോർ. ​ ഏഴ്​ വിക്കറ്റും ഇടംകൈയൻ സ്​പിന്നർ സ്വന്തമാക്കി. 85 ടെസ്​റ്റ്​കളിച്ച ജഡേജ 3886 റണ്ണും 330 വിക്കറ്റും സ്വന്തംപേരിൽ കുറിച്ചു.