മാഡി ഗ്രീനിന് സെഞ്ച്വറി; തിരിച്ചുവരവിന്റെ പോരാട്ടത്തിൽ ന്യൂസിലൻഡ് ജേതാക്കൾ

വെല്ലിംഗ്ടൺ: ദക്ഷിണാഫ്രിക്കയ്‌ക്കെതിരായ വനിതാ ഏകദിന പരമ്പരയിലെ നിർണ്ണായകമായ മൂന്നാം മത്സരത്തിൽ ന്യൂസിലൻഡിന് 66 റൺസ് വിജയം. ആദ്യ മത്സരത്തിൽ പരാജയപ്പെട്ട ശേഷം തകർപ്പൻ തിരിച്ചുവരവ് നടത്തിയ

കിവികൾ പരമ്പര 2-1ന് സ്വന്തമാക്കി. ടോസ് നഷ്ടപ്പെട്ട് ബാറ്റിംഗിനിറങ്ങിയ ന്യൂസിലൻഡിന് തുടക്കത്തിൽ തന്നെ വൻ തിരിച്ചടിയേറ്റെങ്കിലും മാഡി ഗ്രീനിന്റെയും ബ്രൂക്ക് ഹാലിഡേയുടെയും ഐതിഹാസിക പോരാട്ടം അവരെ കൂറ്റൻ സ്കോറിലേക്ക് നയിക്കുകയായിരുന്നു.

നാലാം ഓവറിൽ മൂന്ന് വിക്കറ്റിന് വെറും മൂന്ന് റൺസ് എന്ന അതീവ ഗുരുതരമായ അവസ്ഥയിലായിരുന്നു ന്യൂസിലൻഡ്. സൂസി ബേറ്റ്‌സ്, ജോർജിയ പ്ലിമ്മർ, അമേലിയ കെർ എന്നിവർ റണ്ണൊന്നുമെടുക്കാതെ പുറത്തായതോടെ തകർന്നടിഞ്ഞ ടീമിനെ മാഡി ഗ്രീനും ഹാലിഡേയും ചേർന്ന് രക്ഷിച്ചു. നാലാം വിക്കറ്റിൽ ഇരുവരും ചേർന്ന് 211 റൺസാണ് കൂട്ടിച്ചേർത്തത്. 141 റൺസുമായി മാഡി ഗ്രീൻ പുറത്താകാതെ നിന്നപ്പോൾ, രണ്ട് റൺസ് അകലെ ഹാലിഡേയ്ക്ക് (98) സെഞ്ച്വറി നഷ്ടമായി. നിശ്ചിത 50 ഓവറിൽ ന്യൂസിലൻഡ് 306 റൺസ് അടിച്ചുകൂട്ടി.

307 റൺസ് വിജയലക്ഷ്യവുമായി ഇറങ്ങിയ ദക്ഷിണാഫ്രിക്കയ്ക്ക് മികച്ച തുടക്കമാണ് ലഭിച്ചത്. ഓപ്പണർമാരായ ലോറ വോൾവാർട്ടും ടാസ്മിൻ ബ്രിറ്റ്‌സും ചേർന്ന് ഒന്നാം വിക്കറ്റിൽ 68 റൺസ് ചേർത്തു. വോൾവാർട്ടും ആനേരി ഡെർക്‌സണും ചേർന്ന് ടീമിനെ 150-ലേക്ക് അടുപ്പിച്ചെങ്കിലും ഇരുവരും പുറത്തായതോടെ ദക്ഷിണാഫ്രിക്കയുടെ തകർച്ച തുടങ്ങി. ക്ലോ ട്രയോൺ (29) പൊരുതി നോക്കിയെങ്കിലും പിന്തുണ നൽകാൻ മറ്റ് ബാറ്റർമാർക്കായില്ല.

ന്യൂസിലൻഡിനായി റോസ്മേരി മെയർ 50 റൺസ് വഴങ്ങി അഞ്ച് വിക്കറ്റുകൾ വീഴ്ത്തി. ടാസ്മിൻ ബ്രിറ്റ്‌സ്, ആനേരി ഡെർക്‌സൺ, ആനെക്കെ ബോഷ്, ക്ലോ ട്രയോൺ, അയാന്ത ഹ്ലുബി എന്നിവരുടെ വിക്കറ്റുകളാണ് മെയർ സ്വന്തമാക്കിയത്. ഇതോടെ ദക്ഷിണാഫ്രിക്കയുടെ ഇന്നിംഗ്‌സ് 240 റൺസിൽ അവസാനിച്ചു. പരമ്പരയിലെ ആദ്യ മത്സരത്തിൽ മാഡി ഗ്രീൻ 85 റൺസ് നേടിയിരുന്നെങ്കിലും ടീമിന് ജയിക്കാനായിരുന്നില്ല. എന്നാൽ രണ്ടാം ഏകദിനത്തിൽ അമേലിയ കെർ നേടിയ പുറത്താകാത്ത 179 റൺസ് ന്യൂസിലൻഡിന് പരമ്പരയിൽ ജീവൻ നൽകുകയായിരുന്നു.