സൂര്യവംശിയും ജയ്‌സ്വാളും നേരിടുന്നത് ബുംറയെ; ഗുവാഹത്തിയിൽ ഇന്ന് തീപാറുന്ന പോരാട്ടം

ഗുവാഹത്തി: ഐപിഎൽ 2026 സീസണിലെ ആവേശകരമായ മത്സരത്തിൽ ഇന്ന് രാജസ്ഥാൻ റോയൽസ് മുംബൈ ഇന്ത്യൻസിനെ നേരിടും. ആദ്യ രണ്ട് മത്സരങ്ങളും വിജയിച്ച പരാഗും സംഘവും ഇന്നത്തെ മത്സരം വിജയിച്ചു പോയിന്റ് പട്ടികയിൽ രാജസ്ഥാനെ ഒന്നാമതെത്തിക്കാൻ ലക്ഷ്യമിട്ടാണ് ഇറങ്ങുന്നത്.

മറുവശത്ത്, ഡൽഹി ക്യാപിറ്റൽസിനോട് തോൽവി വഴങ്ങിയ മുംബൈ ഇന്ത്യൻസ്, ക്യാപ്റ്റൻ ഹാർദിക് പാണ്ഡ്യയുടെ തിരിച്ചുവരവോടെ വിജയവഴിയിൽ തിരിച്ചെത്താമെന്ന പ്രതീക്ഷയിലാണ്.

സൂര്യവംശിയും ജയ്‌സ്വാളും; രാജസ്ഥാന്റെ കരുത്ത്

സീസണിലെ ആദ്യ രണ്ട് മത്സരങ്ങളിലും തകർപ്പൻ ബാറ്റിംഗ് പ്രകടനം കാഴ്ചവെച്ച വൈഭവ് സൂര്യവംശിയും യശസ്വി ജയ്‌സ്വാളും ചേർന്ന ഓപ്പണിങ് കൂട്ടുകെട്ടാണ് രാജസ്ഥാന്റെ പ്രധാന കരുത്ത്. 17 പന്തിൽ 52 റൺസ് നേടിയ സൂര്യവംശിയുടെ ഫോം മുംബൈ ബൗളർമാർക്ക് വലിയ വെല്ലുവിളിയാകും.

നായകൻ റിയാൻ പരാഗ് ബാറ്റിങ്ങിലും, ജോഫ്ര ആർച്ചർ, തുഷാർ ദേശ്പാണ്ഡെ എന്നിവർ ബൗളിങ്ങിലും മികച്ച ഫോമിലാണ്. കഴിഞ്ഞ മത്സരത്തിൽ ഗുജറാത്ത് ടൈറ്റൻസിനെതിരെ നേടിയ ആവേശകരമായ വിജയം ടീമിന് വലിയ ആത്മവിശ്വാസം നൽകുന്നുണ്ട്.

തിരിച്ചുവരവിനൊരുങ്ങി ഹാർദിക് പാണ്ഡ്യ

അസുഖം മൂലം കഴിഞ്ഞ മത്സരം നഷ്ടമായ ക്യാപ്റ്റൻ ഹാർദിക് പാണ്ഡ്യ പരിശീലനം പുനരാരംഭിച്ചു. അദ്ദേഹം ഇന്ന് ടീമിൽ തിരിച്ചെത്തുമെന്നാണ് റിപ്പോർട്ടുകൾ. പാണ്ഡ്യ വരുന്നതോടെ ടീമിന്റെ മധ്യനിരയ്ക്കും ബൗളിംഗിനും കൂടുതൽ കരുത്ത് ലഭിക്കും.

ദീപക് ചാഹറിന് പകരം പാണ്ഡ്യയും, കോർബിൻ ബോഷിന് പകരം ട്രെന്റ് ബോൾട്ടും ടീമിലേക്ക് തിരിച്ചെത്തിയേക്കും. രോഹിത് ശർമ്മ, സൂര്യകുമാർ യാദവ് എന്നിവരുടെ ഫോം മുംബൈയ്ക്ക് നിർണ്ണായകമാണ്.

ബുംറ & സൂര്യവംശി: തീപാറുന്ന പോരാട്ടം

മത്സരത്തിലെ ഏറ്റവും വലിയ ആകർഷണം ലോകത്തെ മികച്ച ബൗളറായ ജസ്പ്രീത് ബുംറയും യുവതാരം വൈഭവ് സൂര്യവംശിയും തമ്മിലുള്ള പോരാട്ടമായിരിക്കും. പവർപ്ലേയിൽ ബുംറയെ നേരിടുക എന്നത് സൂര്യവംശിക്ക് വലിയ പരീക്ഷണമായിരിക്കും. ബുംറയെ എങ്ങനെ നേരിടുന്നു എന്നതിനെ ആശ്രയിച്ചിരിക്കും രാജസ്ഥാന്റെ സ്കോർ. അതേസമയം, ആർച്ചർക്കെതിരെ മികച്ച റെക്കോർഡുള്ള തിലക് വർമ്മയിലൂടെ മധ്യ ഓവറുകളിൽ ആധിപത്യം സ്ഥാപിക്കാനാണ് മുംബൈയുടെ ശ്രമം.

പിച്ച് റിപ്പോർട്ടും കാലാവസ്ഥയും

ഗുവാഹത്തിയിലെ ബർസപര സ്റ്റേഡിയത്തിൽ ഫാസ്റ്റ് ബൗളർമാർക്ക് മികച്ച പിന്തുണ ലഭിക്കാനാണ് സാധ്യത. മഴയ്ക്ക് സാധ്യതയുണ്ടെങ്കിലും മത്സരസമയത്ത് കാലാവസ്ഥ തെളിഞ്ഞേക്കും. മുംബൈ ഇന്ത്യൻസ് ചരിത്രത്തിലാദ്യമായാണ് ഈ സ്റ്റേഡിയത്തിൽ ഒരു ഔദ്യോഗിക മത്സരം കളിക്കുന്നത്. ടോസ് നേടുന്ന ടീം ഫീൽഡിംഗ് തിരഞ്ഞെടുക്കാനാണ് സാധ്യത.