Deshabhimani

നാല് രാജ്യങ്ങളിലും ഓപ്പണറായി ടെസ്റ്റ് സെഞ്ചുറി; ചരിത്രം കുറിച്ച് കെഎൽ രാഹുൽ, നേട്ടം സ്വന്തമാക്കുന്ന ആദ്യ ഇന്ത്യൻ താരം

KL Rahul

കെ എൽ രാഹുൽ | Photo: BCCI

വെബ് ഡെസ്ക്

Published on Nov 21, 2026, 10:14 AM | 2 min read

വെല്ലിങ്ടൺ : ഇന്ത്യൻ ക്രിക്കറ്റിൽ ചരിത്രം കുറിച്ച് കെഎൽ രാഹുൽ. ദക്ഷിണാഫ്രിക്ക, ഇംഗ്ലണ്ട്, ന്യൂസിലൻഡ്, ഓസ്‌ട്രേലിയ എന്നീ നാല് സെന (SENA) രാജ്യങ്ങളിലും ഓപ്പണറായി ടെസ്റ്റ് സെഞ്ചുറി നേടുന്ന ആദ്യ ഇന്ത്യൻ താരമെന്ന റെക്കോഡാണ് രാഹുൽ സ്വന്തമാക്കിയത്. ന്യൂസിലൻഡിനെതിരായ ഒന്നാം ടെസ്റ്റിന്റെ മൂന്നാം ദിനം 207 പന്തിൽ സെഞ്ചുറി നേടിയതോടെയാണ് താരം ഈ അപൂർവ നേട്ടത്തിലെത്തിയത്. ടെസ്റ്റ് കരിയറിലെ രാഹുലിന്റെ 13-ാം സെഞ്ചുറിയാണിത്.


നാല് SENA രാജ്യങ്ങളിലും ടെസ്റ്റ് സെഞ്ചുറി നേടിയ എട്ടാമത്തെ ഏഷ്യൻ താരമാണ് 34കാരനായ രാഹുൽ. ഈ നേട്ടം കൈവരിക്കുന്ന അഞ്ചാമത്തെ ഇന്ത്യൻ താരവും. മുഹമ്മദ് അസ്ഹറുദ്ദീൻ, സച്ചിൻ ടെൻഡുൽക്കർ, രാഹുൽ ദ്രാവിഡ്, വിരാട് കോഹ്‌ലി എന്നിവരാണ് പട്ടികയിലെ മറ്റ് ഇന്ത്യക്കാർ. പാകിസ്ഥാന്റെ സയീദ് അൻവർ, യൂനിസ് ഖാൻ, ശ്രീലങ്കയുടെ കുമാർ സംഗക്കാര എന്നിവരാണ് നേട്ടം സ്വന്തമാക്കിയ മറ്റ് ഏഷ്യൻ താരങ്ങൾ.


നാല് രാജ്യങ്ങളിലും ഓപ്പണറായി സെഞ്ചുറി നേടിയവരുടെ പട്ടികയിൽ രാഹുലിനൊപ്പം പാകിസ്ഥാന്റെ സയീദ് അൻവറും മാത്രമാണുള്ളത്. ന്യൂസിലൻഡ് മണ്ണിലെ ആദ്യ ടെസ്റ്റ് സെഞ്ചുറിയോടെയാണ് രാഹുൽ നാല് SENA രാജ്യങ്ങളിലും സെഞ്ചുറി തികച്ചത്. ഇതോടെ വിദേശ മൈതാനങ്ങളിൽ 10 സെഞ്ചുറികളും സ്വന്തം നാട്ടിൽ മൂന്ന് സെഞ്ചുറികളുമായി താരത്തിന്റെ ആകെ ടെസ്റ്റ് സെഞ്ചുറികളുടെ എണ്ണം 13 ആയി.


2021നുശേഷം ടെസ്റ്റിൽ ഓപ്പണറായി ഏഴ് സെഞ്ചുറികളാണ് രാഹുൽ നേടിയത്. ബെൻ ഡക്കറ്റ്, യശസ്വി ജയ്‌സ്വാൾ, ദിമുത് കരുണരത്നെ എന്നിവർക്കൊപ്പമാണ് ഈ നേട്ടത്തിൽ താരം. 2025-27 ലോക ടെസ്റ്റ് ചാമ്പ്യൻഷിപ്പ് സൈക്കിളിൽ ഓപ്പണർമാരുടെ സെഞ്ചുറി പട്ടികയിലും നാല് സെഞ്ചുറികളുമായി രാഹുൽ മുന്നിലുണ്ട്. ടോം ലാഥവും ട്രാവിസ് ഹെഡും ഇതേ നേട്ടം സ്വന്തമാക്കിയിട്ടുണ്ട്.


ഇന്ത്യൻ ഓപ്പണർമാരുടെ ടെസ്റ്റ് സെഞ്ചുറി പട്ടികയിൽ 12 സെഞ്ചുറികളുമായി മുരളി വിജയ്‌ക്കൊപ്പമെത്താനും രാഹുലിനായി. 33 സെഞ്ചുറികളുമായി സുനിൽ ഗവാസ്‌കറാണ് പട്ടികയിൽ ഒന്നാമത്. വിരേന്ദർ സെവാഗിന് 22 സെഞ്ചുറികളുണ്ട്. ഗൗതം ഗംഭീറും രോഹിത് ശർമയും ഒൻപത് സെഞ്ചുറികൾ വീതം നേടിയിട്ടുണ്ട്.


ന്യൂസിലൻഡിനെതിരായ മത്സരത്തിൽ രണ്ടാം ദിനം അർധസെഞ്ചുറി പിന്നിട്ട രാഹുൽ മൂന്നാം ദിനവും മികച്ച ബാറ്റിങ് തുടർന്നാണ് സെഞ്ചുറിയിലെത്തിയത്. ദേവ്ദത്ത് പടിക്കലിനൊപ്പം മികച്ച കൂട്ടുകെട്ടുണ്ടാക്കിയ താരം ഇന്ത്യയുടെ നില ഭദ്രമാക്കി. ന്യൂസിലൻഡിന്റെ ഒന്നാം ഇന്നിങ്‌സ് സ്കോറായ 368 റൺസിന് മറുപടിയായി ഇന്ത്യയുടെ ഇന്നിങ്‌സിന് കരുത്തുപകരുന്നതായിരുന്നു രാഹുലിന്റെ പ്രകടനം.



deshabhimani section

Related News

View More
0 comments
Sort by

Deshabhimani
Home