കെസിഎ - എൻഎസ്കെ ട്വൻ്റി 20 ചാമ്പ്യൻഷിപ്പ്: വിജയക്കുതിപ്പ് തുടർന്ന് തിരുവനന്തപുരം

തിരുവനന്തപുരം: കേരള ക്രിക്കറ്റ് അസോസിയേഷൻ സംഘടിപ്പിക്കുന്ന എൻഎസ്കെ ട്രോഫി ട്വൻ്റി 20 ടൂർണമെന്റിലെ ഗ്രൂപ്പ് ബി മത്സരങ്ങളിൽ തിരുവനന്തപുരത്തിനും കാസർകോടിനും വിജയം. കാസർകോട് ഒൻപത് റൺസിന് തൃശൂരിനെ തോൽപ്പിച്ചപ്പോൾ തിരുവനന്തപുരം 77 റൺസിനാണ് കോട്ടയത്തെ തക‍ർത്തത്. ടൂർണമെന്റിൽ തിരുവനന്തപുരത്തിന്റെ തുടർച്ചയായ മൂന്നാം വിജയമാണിത്.

കോട്ടയത്തിനെതിരെ ആദ്യം ബാറ്റ് ചെയ്ത തിരുവനന്തപുരം 20 ഓവറിൽ അഞ്ച് വിക്കറ്റ് നഷ്ടത്തിൽ 207 റൺസെടുത്തു. 41 പന്തുകളിൽ 60 റൺസെടുത്ത കൃഷ്ണപ്രസാദാണ് ടോപ് സ്കോറർ. ഷോൺ റോജർ 27 പന്തുകളിൽ 54ഉം അഭിജിത് പ്രവീൺ 25 പന്തുകളിൽ 34ഉം റൺസെടുത്തു. അവസാന ഓവറുകളിൽ 15 പന്തുകളിൽ നാല് സിക്സും രണ്ട് ഫോറുമടക്കം 41 റൺസുമായി പുറത്താകാതെ നിന്ന കൃഷ്ണദേവനാണ് തിരുവനന്തപുരത്തിന്റെ സ്കോർ 200 കടത്തിയത്. കോട്ടയത്തിന് വേണ്ടി സിജോമോൻ ജോസഫ് രണ്ട് വിക്കറ്റ് വീഴ്ത്തി. മറുപടി ബാറ്റിങ്ങിന് ഇറങ്ങിയ കോട്ടയത്തിന് 20 ഓവറിൽ എട്ട് വിക്കറ്റ് നഷ്ടത്തിൽ 130 റൺസ് മാത്രമാണ് നേടാനായത്. 44 റൺസെടുത്ത ആസിഫ് അലിയും 33 റൺസെടുത്ത സിജോമോൻ ജോസഫും മാത്രമാണ് കോട്ടയത്തിന് വേണ്ടി തിളങ്ങിയത്. തിരുവനന്തപുരത്തിന് വേണ്ടി അഭിജിത് പ്രവീൺ നാലും കെ അജീഷ് മൂന്നും വിക്കറ്റുകൾ വീഴ്ത്തി.

തൃശൂരിനെതിരെ ആദ്യം ബാറ്റ് ചെയ്ത കാസർകോട് ക്യാപ്റ്റൻ മുഹമ്മദ് അസ്ഹറുദ്ദീന്റെ തകർപ്പൻ ഇന്നിങ്സിന്റെ മികവിൽ 20 ഓവറിൽ ഏഴ് വിക്കറ്റ് നഷ്ടത്തിൽ 193 റൺസെടുത്തു. അസ്ഹറുദ്ദീൻ 27 പന്തുകളിൽ ഒരു ഫോറും ഏഴ് സിക്സുമടക്കം 58 റൺസെടുത്തു. ഇഷ്തിയാഖ് ഹുസൈൻ 42ഉം ബി കെ തുഷാർ 41ഉം റൺസ് നേടി. ആഷിഖ് അലി 10 പന്തുകളിൽ 22 റൺസുമായി പുറത്താകാതെ നിന്നു. തൃശൂരിന് വേണ്ടി സി വി വിനോദ് കുമാർ മൂന്ന് വിക്കറ്റ് വീഴ്ത്തി. മറുപടി ബാറ്റിങ്ങിന് ഇറങ്ങിയ തൃശൂരിന് 20 ഓവറിൽ ഏഴ് വിക്കറ്റ് നഷ്ടത്തിൽ 184 റൺസ് മാത്രമാണ് നേടാനായത്. 38 പന്തുകളിൽ 61 റൺസെടുത്ത ഉജ്ജ്വൽ കൃഷ്ണയും 29 പന്തുകളിൽ 44 റൺസെടുത്ത വത്സൽ ഗോവിന്ദുമാണ് തൃശൂരിനായി തിളങ്ങിയത്. കാസർകോടിന് വേണ്ടി ആഷിഖ് അലി, കെ ആദർശ്, അബ്ദുൾ ഫാഹിസ് എന്നിവർ രണ്ട് വിക്കറ്റ് വീതം വീഴ്ത്തി.