ഐപിഎൽ 2026; പഞ്ചാബ് കിംഗ്‌സിൽ ജോഷ് ഇംഗ്ലിസിന് പകരക്കാരനായി മൂന്നാം നമ്പറിൽ കൂപ്പർ കോണോളി

ചണ്ഡീഗഡ്: ഐപിഎൽ 2026 സീസൺ ആരംഭിക്കാനിരിക്കെ പഞ്ചാബ് കിങ്‌സ് നേരിട്ട പ്രധാന ചോദ്യത്തിന് ഉത്തരമായി. ടീമിലെ വിശ്വസ്തനായ മൂന്നാം നമ്പർ ബാറ്റർ ജോഷ് ഇംഗ്ലിസിന് പകരക്കാരനായി മറ്റൊരു ഓസ്‌ട്രേലിയൻ യുവതാരം കൂപ്പർ കോണോളി എത്തുമെന്ന് ഏകദേശം ഉറപ്പായി.

സീസണിലുടനീളം ലഭ്യമാകില്ലെന്ന കാരണത്താൽ ലേലത്തിന് മുൻപ് ഇംഗ്ലിസിനെ പഞ്ചാബ് ഒഴിവാക്കിയിരുന്നു. നിലവിൽ ലഖ്‌നൗ സൂപ്പർ ജയന്റ്‌സിന്റെ ഭാഗമാണ് ഇംഗ്ലിസ്.

കഴിഞ്ഞ സീസണിൽ മുംബൈ ഇന്ത്യൻസിനെതിരെ നേടിയ മത്സരം വിജയിപ്പിച്ച ഇന്നിങ്സ് (73 റൺസ്) ഉൾപ്പെടെ പഞ്ചാബിന്റെ കുതിപ്പിൽ ഇംഗ്ലിസ് നിർണ്ണായക പങ്കുവഹിച്ചിരുന്നു. അദ്ദേഹത്തിന്റെ അഭാവം ടീമിന് വലിയ നഷ്ടമാണെങ്കിലും, വെസ്റ്റ് ഓസ്‌ട്രേലിയൻ താരം കോണോളിയിലൂടെ ആ വിടവ് നികത്താമെന്നാണ് പരിശീലകൻ റിക്കി പോണ്ടിങ്ങിന്റെ കണക്കുകൂട്ടൽ. എന്നാൽ, ബാറ്റിങ്ങിൽ നിലവിൽ അത്ര മികച്ച ഫോമിലല്ല എന്നത് കോണോളിക്ക് വെല്ലുവിളിയാണ്.

ബാറ്റിങ്ങിലെ ഫോമില്ലായ്മയ്ക്ക് പുറമെ പരിക്കിന്റെ ആശങ്കയും താരത്തെ അലട്ടുന്നുണ്ട്. പുറംവേദനയിൽ നിന്ന് പൂർണ്ണമായും മുക്തനാകാത്തതിനാൽ ഏപ്രിൽ അവസാനം വരെ കോണോളി പന്തെറിയില്ലെന്ന് ക്രിക്കറ്റ് ഓസ്‌ട്രേലിയയുടെ മെഡിക്കൽ ടീം നിർദ്ദേശിച്ചിട്ടുണ്ട്.

അതിനാൽ സീസണിന്റെ ആദ്യ പകുതിയിൽ ഒരു സ്പെഷ്യലിസ്റ്റ് ബാറ്ററായി മാത്രമായിരിക്കും താരം കളത്തിലിറങ്ങുക. ബിഗ് ബാഷ് ലീഗിലും ലോകകപ്പിലും ഉൾപ്പെടെ കഴിഞ്ഞ 15 ഇന്നിങ്ങ്സുകളിൽ മികച്ച പ്രകടനം പുറത്തെടുക്കാൻ കോണോളിക്ക് സാധിച്ചിട്ടില്ല.

ശ്രേയസ് അയ്യർ നയിക്കുന്ന പഞ്ചാബ് കിങ്‌സ് തങ്ങളുടെ ആദ്യ അങ്കത്തിന് ഇന്ന് ഇറങ്ങുകയാണ്. ന്യൂ ചണ്ഡീഗഡിലെ മഹാരാജ യാദവീന്ദ്ര സിങ് സ്റ്റേഡിയത്തിൽ നടക്കുന്ന മത്സരത്തിൽ ശുഭ്മാൻ ഗില്ലിന്റെ ഗുജറാത്ത് ടൈറ്റൻസാണ് പഞ്ചാബിന്റെ എതിരാളികൾ. ഇംഗ്ലിസിന് പകരക്കാരനായി എത്തുന്ന കോണോളിക്ക് ഈ മത്സരത്തിൽ എത്രത്തോളം സ്വാധീനം ചെലുത്താനാകുമെന്ന് ആരാധകർ ഉറ്റുനോക്കുന്നു.