സഞ്ജു സാംസൺ ആറ് റൺസിന് പുറത്ത്; ചെന്നൈയ്ക്ക് ബാറ്റിങ്ങ് തകർച്ച

ഗുവാഹത്തി: ഗുവാഹത്തിയിലെ ബാർസ്പര സ്റ്റേഡിയത്തിൽ രാജസ്ഥാൻ റോയൽസിനെതിരായ ഐപിഎൽ പോരാട്ടത്തിൽ ചെന്നൈ സൂപ്പർ കിംഗ്‌സിന് ബാറ്റിംഗ് തകർച്ച. എംഎസ് ധോണിയുടെ അഭാവത്തിൽ യുവനിരയുമായി ഇറങ്ങിയ സിഎസ്കെ 19.4 ഓവറിൽ വെറും 127 റൺസിന് പുറത്തായി. രാജസ്ഥാൻ ബൗളർമാരുടെ തീപ്പൊരി ബൗളിംഗിന് മുന്നിൽ ചെന്നൈയുടെ മുൻനിരയും മധ്യനിരയും ഒരുപോലെ തകർന്നടിയുന്ന കാഴ്ചയാണ് ഗുവാഹത്തിയിൽ കണ്ടത്.

സഞ്ജുവിനും ഋതുരാജിനും മോശം തുടക്കം

മഞ്ഞക്കുപ്പായത്തിലെ സഞ്ജു സാംസണിന്റെ (6) അരങ്ങേറ്റം ആരാധകരെ നിരാശയിലാഴ്ത്തി. രണ്ടാം ഓവറിലെ അവസാന പന്തിൽ നന്ദ്രെ ബർഗർ സഞ്ജുവിനെ ക്ലീൻ ബൗൾഡാക്കി. തൊട്ടുപിന്നാലെ മൂന്നാം ഓവറിൽ നായകൻ ഋതുരാജ് ഗെയ്‌ക്‌വാദും (6) പുറത്തായി. ജോഫ്ര ആർച്ചറുടെ വേഗതയേറിയ പന്തിൽ ബൗൾഡായിട്ടായിരുന്നു നായകന്റെ മടക്കം. മൂന്നാമനായി എത്തിയ യുവതാരം ആയുഷ് മാത്രെ നേരിട്ട ആദ്യ പന്തിൽ തന്നെ വിക്കറ്റ് കീപ്പർ ധ്രുവ് ജുറലിന് ക്യാച്ച് നൽകി സംപൂജ്യനായി മടങ്ങി.

പതറിപ്പോയ മധ്യനിര; ജാമി ഓവർട്ടന്റെ ഒറ്റയാൾ പോരാട്ടം

പവർ പ്ലേ അവസാനിക്കുന്നതിന് തൊട്ടുമുമ്പ് മാത്യു ഷോർട്ടും (2) പുറത്തായതോടെ ചെന്നൈ നാലിന് 41 എന്ന നിലയിലായി. സന്ദീപ് ശർമ്മയുടെ സ്ലോവർ പന്തിൽ യശസ്വി ജയ്‌സ്വാളിന് ക്യാച്ച് നൽകിയാണ് താരം മടങ്ങിയത്. തകർച്ചയിൽ നിന്ന് കരകയറാൻ ശ്രമിച്ച സർഫറാസ് ഖാൻ (17), ശിവം ദുബെ (6), കാർത്തിക് ശർമ്മ (18) എന്നിവരും അധികം വൈകാതെ കൂടാരം കയറി.

ഒരറ്റത്ത് വിക്കറ്റുകൾ വീഴുമ്പോഴും 43 റൺസെടുത്ത ജാമി ഓവർട്ടൻ മാത്രമാണ് ചെന്നൈ നിരയിൽ അല്പമെങ്കിലും പ്രതിരോധിച്ചു കളിച്ചത്. നൂർ അഹമ്മദ് (1), മാറ്റ് ഹെൻറി (5) എന്നിവരും പുറത്തായതോടെ ചെന്നൈ ബാറ്റിംഗ് 127 റൺസിൽ അവസാനിച്ചു. വെറും മൂന്ന് ബാറ്റർമാർ മാത്രമാണ് ചെന്നൈ നിരയിൽ രണ്ടക്കം കണ്ടത്.

തിളങ്ങി ജഡേജയും ആർച്ചറും

സ്വന്തം തട്ടകത്തിലേക്ക് മടങ്ങിയെത്തിയ രവീന്ദ്ര ജഡേജയുടെ പ്രകടനം രാജസ്ഥാൻ നിരയിൽ ശ്രദ്ധേയമായി. 3 ഓവറിൽ 18 റൺസ് മാത്രം വഴങ്ങി ജഡേജ രണ്ട് നിർണ്ണായക വിക്കറ്റുകൾ വീഴ്ത്തി. നന്ദ്രെ ബർഗർ, ജോഫ്ര ആർച്ചർ എന്നിവരും രണ്ട് വിക്കറ്റ് വീതം നേടി. ബ്രിജേഷ് ശർമ്മ, സന്ദീപ് ശർമ്മ, രവി ബിഷ്ണോയ് എന്നിവർ ഓരോ വിക്കറ്റ് വീതവും വീഴ്ത്തി.

പരിക്കേറ്റ ധോണിയുടെയും ഡിവാൾഡ് ബ്രെവിസിന്റെയും അഭാവം ചെന്നൈയുടെ ബാറ്റിംഗ് കരുത്തിനെ കാര്യമായി ബാധിച്ചു. 128 റൺസ് എന്ന ചെറിയ ലക്ഷ്യം പിന്തുടരുന്ന റിയാൻ പരാഗും സംഘവും അനായാസ ജയം പ്രതീക്ഷിച്ചാണ് മറുപടി ബാറ്റിംഗിന് ഒരുങ്ങുന്നത്.