​ഗ്രീൻഫീൽഡിൽ മലപ്പുറത്തിന്റെ കരുത്തുമായി നിഖിൽ തോട്ടത്ത്

തിരുവനന്തപുരം: കെസിഎൽ മൂന്നാം സീസണിലെ ആദ്യ ഫിഫ്റ്റി സ്വന്തം പേരിലാക്കി മലപ്പുറം സ്വദേശിയും തൃശൂർ ടൈറ്റൻസ് താരവുമായ നിഖിൽ തോട്ടത്ത്. കാലിക്കറ്റ് ഗ്ലോബ് സ്റ്റാർസിനെതിരായ ആദ്യ മത്സരത്തിലാണ് നിഖിൽ പുറത്താകാതെ അർദ്ധ സെഞ്ചുറി നേടിയത്. നാലാമനായി ക്രീസിലെത്തി കാലിക്കറ്റ് ബൗളർമാരെ അനായാസം നേരിട്ട നിഖിൽ തന്നെയാണ് പ്ലെയർ ഓഫ് ദി മാച്ച്.

മധ്യനിരയിൽ ബാറ്റേന്തിയ നിഖിൽ 48 പന്തിൽ നിന്നാണ് 59 റൺസ് അടിച്ചുകൂട്ടിയത്. മൂന്ന് സിക്സറുകളും അഞ്ച് ബൗണ്ടറികളും ഉൾപ്പെടുന്നതായിരുന്നു താരത്തിന്റെ ഇന്നിങ്സ്. കാലിക്കറ്റിന്റെ ബൗളർമാർക്കെതിരെ പതറാതെ നിന്ന നിഖിൽ, കിട്ടിയ അവസരങ്ങളിലെല്ലാം പന്ത് അതിർത്തി കടത്തി മികച്ച സ്ട്രൈക്ക് റേറ്റോടെ സ്കോർബോർഡ് ചലിപ്പിച്ചു. നിഖിലിന് പിന്തുണയായി ക്യാപ്റ്റൻ എം എസ് അഖിൽ 27 റൺസുമായി ക്രീസിൽ നിലയുറപ്പിച്ചപ്പോൾ തൃശൂർ ടൈറ്റൻസ് 16.5 ഓവറിൽ വിജയം കണ്ടു.

യുവതാരങ്ങളെ അണിനിരത്തിയിരിക്കുന്ന തൃശൂർ ടീമിൽ ഒരു മാച്ച് വിന്നറുടെ റോളാണ് നിഖിലിനുള്ളത്. മധ്യനിരയിൽ അതിവേ​ഗം സ്കോർ ഉയർത്താൻ കെൽപ്പുള്ള താരം കഴിഞ്ഞ തവണ കൊച്ചി ബ്ലൂ ടൈ​ഗേഴ്സിന്റെ ഭാ​ഗമായിരുന്നു. സെമിയിൽ അർദ്ധസെഞ്ചുറിയുമായി കൊച്ചിക്ക് വിജയമൊരുക്കിയതിൽ നിർണ്ണായകമായത് നിഖിലിൻ്റെ ഇന്നിങ്സായിരുന്നു. ഈ സീസണിൽ ആദ്യ മത്സരത്തിൽ തന്നെ താരത്തിന് മികച്ച ഫോം കണ്ടെത്താനായത് വരും മത്സരങ്ങളിലും തൃശൂർ ടൈറ്റൻസിന് നൽകുന്ന ആത്മവിശ്വാസം ചെറുതല്ല.