മനുഷ്യക്കടത്ത് ഇല്ലാതാക്കാൻ യുഎഇ പ്രതിജ്ഞാബദ്ധമാണെന്ന് നീതിന്യായ മന്ത്രി

അബുദാബി > എല്ലാ വർഷവും ജൂലൈ 30ന് മനുഷ്യകടത്തുന്നതിനെതിരായ ലോക ദിനം ആചരിക്കേണ്ടതുണ്ടെന്ന് നീതിന്യായ മന്ത്രി അബ്ദുല്ല ബിൻ സുൽത്താൻ ബിൻ അവദ് അൽ നുഐമി പറഞ്ഞു. മനുഷ്യക്കടത്ത് ഫലപ്രദമായി ചെറുക്കുന്നതിനും ആഗോള തലങ്ങളിൽ അവബോധം വർദ്ധിപ്പിക്കുന്നതിനും മനുഷ്യക്കടത്ത് ചെയ്യുന്നവരെ പിടികൂടുന്നതിനുമായുള്ള ശ്രമങ്ങളെ പ്രോത്സാഹിപ്പിക്കുന്നതിനും വേണ്ടിയാണ് ദിനം ആചരിക്കേണ്ടത്. മനുഷ്യക്കടത്ത് ഇല്ലാതാക്കാൻ യുഎഇ പ്രതിജ്ഞാബദ്ധമാണെന്നും അദ്ദേഹം പറഞ്ഞു.

യുഎഇ ശൈഖ് മുഹമ്മദ് ബിൻ സായിദ് അൽ നഹ്യാന്റെ നേതൃത്വത്തിൽ 2014 മുതൽ എല്ലാ വർഷവും  ഈ ദിനം ആചരിക്കാനും ഈ കുറ്റകൃത്യങ്ങൾ ഉന്മൂലനം ചെയ്യുന്നതിനുള്ള ഗുരുതരമായ നടപടികൾ സ്വീകരിക്കാനും യുഎഇ പ്രതിജ്ഞാബദ്ധമാണെന്ന് അൽ നുഐമി പറഞ്ഞു. വളർന്നുകൊണ്ടിരിക്കുന്ന ഈ കുറ്റകൃത്യത്തിൻ്റെ സ്വഭാവവും ക്രിമിനൽ പാറ്റേണുകളുടെ തുടർച്ചയായ വികാസവും അംഗീകരിച്ചുകൊണ്ട്, മനുഷ്യക്കടത്തിനെതിരായ ദേശീയ സമിതി ഈ കുറ്റകൃത്യത്തെ ചെറുക്കുന്നതുമായി ബന്ധപ്പെട്ട നയങ്ങളും നിയമനിർമ്മാണ ചട്ടക്കൂടുകളും വിലയിരുത്തുകയും അവലോകനം ചെയ്യുകയും ചെയ്തു. കുറ്റകൃത്യത്തെയും അതിൻ്റെ സംഭവവികാസങ്ങളെയും ചെറുക്കാൻ ദേശീയ സംവിധാനത്തെ ശക്തിപ്പെടുത്തുന്നതിനുള്ള വ്യക്തമായ റൂട്ട് മാപ്പ് തയ്യാറാക്കാൻ ഇത് സഹായിച്ചു.

നിരപരാധികൾ, പ്രത്യേകിച്ച് കുട്ടികൾ ഇരകളാകുന്നത് തടയുക, കുറ്റകൃത്യങ്ങൾ നിരീക്ഷിക്കുന്നതിനും ഇരകളിൽ നിന്ന് റിപ്പോർട്ടുകൾ സ്വീകരിക്കുന്നതിനും ആധുനിക സാങ്കേതികവിദ്യ പ്രയോജനപ്പെടുത്തുക എന്നതാണ് ലക്ഷ്യമെന്ന് അദ്ദേഹം പറഞ്ഞു. ഈ അന്തർദേശീയ കുറ്റകൃത്യങ്ങൾ കുറയ്ക്കുന്നതിന് പ്രാദേശിക, അന്തർദേശീയ തലങ്ങളിൽ രാജ്യങ്ങളും പ്രസക്തമായ സംഘടനകളും തമ്മിലുള്ള അന്താരാഷ്ട്ര സഹകരണവും ഐക്യദാർഢ്യവും ശക്തിപ്പെടുത്തേണ്ടത് അത്യാവശ്യമാണെന്ന് അദ്ദേഹം ചൂണ്ടിക്കാട്ടി.