കുവൈത്തിൽ വ്യാപക സുരക്ഷാ പരിശോധന; താമസനിയമലംഘകരടക്കം നിരവധി പേർ പിടിയിൽ

കുവൈത്ത് സിറ്റി : തലസ്ഥാന ഗവർണറേറ്റിന്റെ വിവിധ ഭാഗങ്ങളിൽ നടത്തിയ സുരക്ഷാ പരിശോധനയിൽ താമസനിയമലംഘകരും വിവിധ കേസുകളിൽ തിരയുന്നവരുമടക്കം നിരവധി പേർ പിടിയിൽ. നാല് ചെക്ക് പോയിന്റുകൾ കേന്ദ്രീകരിച്ചായിരുന്നു പരിശോധന. ​താമസനിയമം ലംഘിച്ച 46 പേരും വിവിധ കേസുകളിൽ തിരയുന്ന 38 പേരുമാണ്‌ പിടിയിലായത്‌. ഒളിവിൽ കഴിഞ്ഞ 14 പേർ, ക്രിമിനൽ കേസിൽ തിരയുന്ന നാലുപേർ, സിവിൽ കേസിൽ തിരയുന്ന മൂന്നുപേർ, തിരിച്ചറിയൽ രേഖകളില്ലാത്ത രണ്ടുപേർ എന്നിവരും പിടിയിലായി.

പരിശോധനയ-്‌ക്കിടെ മയക്കുമരുന്നുമായി ബന്ധപ്പെട്ട നാല് കേസുകളും കണ്ടെത്തി. മദ്യവുമായി രണ്ടുപേരും ചൂതാട്ടവുമായി ബന്ധപ്പെട്ട് രണ്ടുപേരും പിടിയിലായി. വിവിധ കേസുകളുമായി ബന്ധപ്പെട്ട് പിടിച്ചെടുക്കാൻ ഉത്തരവുള്ള 25 വാഹനവും കസ്റ്റഡിയിലെടുത്തു. ​ഉപേക്ഷിക്കപ്പെട്ട നിലയിലുണ്ടായിരുന്ന 57 വാഹനം നീക്കം ചെയ്തു. 54 ഗതാഗത നിയമലംഘനങ്ങളും രേഖപ്പെടുത്തി. സുരക്ഷയും നിയമപാലനവും ശക്തമാക്കുന്നതിന്റെ ഭാഗമായി പരിശോധന തുടരുമെന്ന് അധികൃതർ അറിയിച്ചു.