ദുബായിൽ ഡെലിവറി തൊഴിലാളികൾക്ക്‌ ആശ്വാസം; ബസ്, മെട്രോ സ്റ്റേഷനുകളിൽ പുതിയ വിശ്രമകേന്ദ്രങ്ങൾ

ദുബായ് : ​ഡെലിവറി തൊഴിലാളികൾക്ക്‌ ആശ്വാസമായി നഗരത്തിലെ തെരഞ്ഞെടുത്ത ബസ്, മെട്രോ സ്റ്റേഷനുകളിൽ വിശ്രമകേന്ദ്രങ്ങൾ ഒരുക്കുമെന്ന് ദുബായ് ആർടിഎ. യുഎഇയിലെ മധ്യാഹ്ന വേനൽ ഇടവേള സമയത്ത് റൈഡർമാർക്ക് സുരക്ഷിതമായ വിശ്രമ സൗകര്യം ഉറപ്പാക്കുകയാണ് ലക്ഷ്യം. ​ബസ് സ്റ്റേഷനുകളിൽ ഒരുക്കുന്ന വിശ്രമകേന്ദ്രങ്ങളിൽ യുഎഇ ഫുഡ് ബാങ്കിന്റെ സഹകരണത്തോടെ ചൂടുള്ള ഭക്ഷണവും ലഭ്യമാക്കും. ​ഗോൾഡ് സൂഖ്, അൽ സത്വ , അൽ ഖുസൈസ്, അൽ കരാമ ബസ് സ്റ്റേഷൻ സെന്റർപോയിന്റ്, ബുർജുമാൻ, ഇബ്നു ബത്തൂത്ത മെട്രോ സ്റ്റേഷനുകളും ഉൾപ്പെടെ എട്ട്‌ പുതിയ സ്ഥലങ്ങളാണ് ഈ പദ്ധതിയിൽ ഉൾപ്പെടുത്തിയിരിക്കുന്നത്.

​ഇതോടെ ദുബായിലെ മൊത്തം വിശ്രമകേന്ദ്രങ്ങളുടെ എണ്ണം 23 ആയി ഉയർന്നു. 2025നെ അപേക്ഷിച്ച് 53 ശതമാനത്തിന്റെ വർധനയാണിതെന്ന് അധികൃതർ വ്യക്തമാക്കി. ഡെലിവറി മേഖലയിലെ 18 ശതമാനം വർധനയ്‌ക്കനുസരിച്ച് സൗകര്യങ്ങൾ വിപുലീകരിക്കുന്നതിന്റെ ഭാഗമായാണ് നടപടി. ​കടുത്ത വേനൽച്ചൂടിൽ റൈഡർമാരുടെ സൗകര്യവും റോഡ് സുരക്ഷയും ഉറപ്പാക്കുകയാണ് പദ്ധതിയുടെ ലക്ഷ്യം. ​ജൂൺ 15 മുതൽ സെപ്തംബർ 15 വരെ പ്രാബല്യത്തിലുള്ള മധ്യാഹ്ന ഇടവേള നിയമപ്രകാരം പകൽ 12.30 മുതൽ മൂന്നുവരെ തുറസ്സായ സ്ഥലങ്ങളിലെ ജോലി നിരോധിച്ചിരിക്കുകയാണ്.