അക്കാദമിക് സെമസ്റ്റർ അവസാനാഘോഷം: ജലീബിൽ ആഡംബര വാഹനങ്ങളുമായി വിദ്യാർഥികളുടെ അശ്രദ്ധാപരമായ ഡ്രൈവിങ് – നടപടി

കുവൈത്ത് സിറ്റി: അക്കാദമിക് സെമസ്റ്ററിന്റെ അവസാനത്തോടനുബന്ധിച്ച് ജലീബ് മേഖലയിലെ ഒരു സ്വകാര്യ സ്കൂളിന് സമീപം ആഡംബര വാഹനങ്ങളുമായി പ്രവാസി വിദ്യാർഥികൾ സംഘടിപ്പിച്ച ആഘോഷം ഗുരുതര സുരക്ഷാ ഭീഷണി സൃഷ്ടിച്ചതിനെ തുടർന്ന് ആഭ്യന്തര മന്ത്രാലയം കർശന നടപടി സ്വീകരിച്ചു. സംഭവസ്ഥലത്തെത്തിയ സുരക്ഷാ ഉദ്യോഗസ്ഥർ വാഹനങ്ങളും സംഭവത്തിൽ ഉൾപ്പെട്ട വ്യക്തികളെയും കസ്റ്റഡിയിലെടുത്തു.

ജീവനും പൊതുസുരക്ഷയും അപകടത്തിലാക്കുന്ന രീതിയിൽ ആഡംബര വാഹനങ്ങൾ നിയന്ത്രണം വിട്ട് അശ്രദ്ധയോടെയും നിരുത്തരവാദപരമായും ഓടിക്കുന്ന ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചതോടെയാണ് സുരക്ഷാ വിഭാഗം ഇടപെട്ടത്. വീഡിയോ ദൃശ്യങ്ങൾ നിരീക്ഷിച്ചതിന് പിന്നാലെ ഉദ്യോഗസ്ഥർ ഉടൻ തന്നെ സ്ഥലത്തെത്തി അന്വേഷണം ആരംഭിച്ചു.

അന്വേഷണത്തിൽ, ആദ്യ സെമസ്റ്റർ അവസാനാഘോഷത്തിന്റെ ഭാഗമായാണ് പ്രവാസി വിദ്യാർഥികൾ ഒത്തുചേർന്നതെന്ന് വ്യക്തമായി. സംഭവത്തിൽ ഉൾപ്പെട്ട വാഹനങ്ങളുടെ രജിസ്ട്രേഷൻ നമ്പറുകൾ രേഖപ്പെടുത്തി ഡ്രൈവർമാരെ തിരിച്ചറിഞ്ഞതായും, ആഘോഷത്തിനായി ഉപയോഗിച്ച വാഹനങ്ങൾ വാടകയ്ക്ക് എടുത്തതാണെന്നും കണ്ടെത്തിയതായി അധികൃതർ അറിയിച്ചു.

തുടർന്ന് നിയമലംഘനങ്ങളിൽ പങ്കെടുത്ത വാഹനങ്ങളും ബന്ധപ്പെട്ട വ്യക്തികളും പിടിച്ചെടുക്കുകയും, നിലവിലുള്ള ഗതാഗത നിയമങ്ങൾ പ്രകാരം ആവശ്യമായ എല്ലാ നിയമനടപടികളും സ്വീകരിച്ച് ബന്ധപ്പെട്ട അധികാരികൾക്ക് കൈമാറുകയും ചെയ്തു.

പൊതുസുരക്ഷയെ വെല്ലുവിളിക്കുന്ന യാതൊരു പ്രവൃത്തിയോടും ഇളവ് കാണിക്കില്ലെന്ന് ആഭ്യന്തര മന്ത്രാലയം വീണ്ടും വ്യക്തമാക്കി. സോഷ്യൽ മീഡിയയിൽ പ്രചരിക്കുന്ന നിയമലംഘനങ്ങൾ കർശനമായി നിരീക്ഷിക്കുമെന്നും, ജീവനും സ്വത്തും സംരക്ഷിക്കുന്നതിനും നിയമത്തിന്റെ ആധിപത്യം ഉറപ്പാക്കുന്നതിനുമായി കുറ്റക്കാർക്കെതിരെ ഇളവില്ലാത്ത നടപടി തുടരുമെന്നും മന്ത്രാലയം മുന്നറിയിപ്പ് നൽകി.