ഗാസയിലെ യുദ്ധവിരാമം നിലനിർത്താൻ ഖത്തറിന്റെ ശ്രമം തുടരുന്നു: ഖത്തർ വിദേശകാര്യ വക്താവ്

ദോഹ: ഗാസാ മേഖലയിലെ യുദ്ധവിരാമം നിലനിർത്താൻ ഖത്തർ തുടർച്ചയായ ശ്രമങ്ങൾ തുടരുന്നുവെന്ന് പ്രധാനമന്ത്രിയുടെ ഉപദേഷ്ടാവും വിദേശകാര്യ മന്ത്രാലയത്തിന്റെ ഔദ്യോഗിക വക്താവുമായ ഡോ. മാജിദ് മുഹമ്മദ് അൽ ആൻസാരി അറിയിച്ചു. കൈറോയിലെ ജോയിന്റ് മോണിറ്ററിംഗ് റൂമിലൂടെ ആദ്യ ദിവസത്തിൽ നിന്ന് തന്നെ യുദ്ധവിരാമം നടപ്പാക്കൽ ഖത്തർ നിരീക്ഷിച്ചുവരുന്നതായി അദ്ദേഹം പറഞ്ഞു.

യുദ്ധവിരാമ ലംഘനങ്ങൾ ആശങ്കാജനകമാണെന്നും, അത് യുദ്ധവിരാമ തകർച്ചയ്ക്ക് കാരണമായേക്കുമെന്ന് ആൻസാരി മുന്നറിയിപ്പ് നൽകി. രണ്ടാം ഘട്ട കരാറിലേക്ക് കടക്കാൻ മധ്യസ്ഥ രാജ്യങ്ങളുമായി ബന്ധപ്പെടുന്ന ചർച്ചകൾ തുടരുകയാണെന്നും, പുതിയ പുരോഗതി പ്രഖ്യാപിക്കാൻ ഇപ്പോൾ ഒന്നുമില്ലെന്നും അദ്ദേഹം പറഞ്ഞു. യുഎസ് പ്രസിഡന്റിന്റെ പദ്ധതിയും, യുദ്ധവിരാമത്തെ പിന്തുണക്കുന്ന അമേരിക്കയുടെ നിലപാടും ഖത്തർ വിശ്വാസത്തോടെ കാണുന്നതായി അദ്ദേഹം വ്യക്തമാക്കി. യുദ്ധവിരാമം നിലനിൽക്കുന്നുവെങ്കിലും തുടരുന്ന ലംഘനങ്ങൾ സമാധാനത്തിന് വലിയ ഭീഷണിയാണെന്ന് അദ്ദേഹം വീണ്ടും ആവർത്തിച്ചു.

റഷ്യ–ഉക്രെയിൻ യുദ്ധവുമായി ബന്ധപ്പെട്ട് 115 കുട്ടികളെ അവരുടെ കുടുംബങ്ങളുമായി വീണ്ടും ഒന്നിപ്പിക്കാനായത് ഖത്തറിന്റെ വലിയ മാനവിക ഇടപെടലാണെന്ന് അദ്ദേഹം വ്യക്തമാക്കി. വെനിസ്വേലയും യുഎസും തമ്മിലുള്ള ഇപ്പോഴത്തെ സംഘർഷത്തിൽ ഖത്തർ മധ്യസ്ഥത നടത്താൻ തയ്യാറാണെന്നും, ഇരുരാജ്യങ്ങൾക്കിടയിൽ നടന്ന തടവുകാരുടെ മാറ്റത്തിൽ ഖത്തർ പങ്കുവഹിച്ചുവെന്നും അൽ ആൻസാരി പറഞ്ഞു. ബഹ്‌റൈനിൽ നടക്കാനിരിക്കുന്ന 46-ാം ജിസിസി ഉച്ചകോടിയിൽ പ്രാദേശിക പ്രതിസന്ധികൾ ഉൾപ്പെടെ വിവിധ വിഷയങ്ങൾ ചർച്ചചെയ്യുമെന്നും അദ്ദേഹം പറഞ്ഞു.