കായിക മേഖലയിൽ പെൺകുട്ടികളുടെ പങ്കാളിത്തം; മസ്‌കത്തിൽ കായിക വികസന കേന്ദ്രം

മസ്‌കത്ത് : കായിക മേഖലയിൽ പെൺകുട്ടികളുടെ പങ്കാളിത്തം പിന്തുണയ്ക്കാനും അവരുടെ മത്സര കഴിവുകൾ വികസിപ്പിക്കാനും ഒമാൻ. ഇതിന്റെ ഭാഗമായി ഒമാൻ അത്‌ലറ്റിക്‌സ് അസോസിയേഷൻ മസ്‌കത്ത് ഗവർണറേറ്റിൽ പെൺകുട്ടികൾക്കായി കായിക വികസന കേന്ദ്രം തുറന്നു.

അത്‌ലറ്റിക് കഴിവുകൾ കണ്ടെത്താനും പരിഷ്‌കരിക്കാനും പ്രാദേശിക, അന്തർദേശീയ മത്സരങ്ങൾക്കുള്ള അവരുടെ സന്നദ്ധത വർധിപ്പിക്കാനും ലക്ഷ്യമിട്ടുള്ള സമഗ്ര പരിശീലന വേദിയായി കേന്ദ്രം പ്രവർത്തിക്കും. ഇത് കായിക രംഗത്ത് ഒമാനി പെൺകുട്ടികളുടെ സാന്നിധ്യം ശക്തിപ്പെടുത്തും. അത്‌ലറ്റിക്‌സിൽ സ്ത്രീകൾക്ക് സുസ്ഥിരമായ അടിത്തറ സ്ഥാപിക്കുന്നതിനും സംഭാവന ചെയ്യും.

പെൺകുട്ടികൾക്കായുള്ള കേന്ദ്രം സജീവമാക്കുന്നത് വനിതാ അത്‌ലറ്റുകളുടെ മത്സരാധിഷ്ഠിത തലമുറയെ കെട്ടിപ്പടുക്കാനുള്ള തന്ത്രപരമായ കാഴ്ചപ്പാടിന്റെ ഭാഗമാണെന്ന്‌ ഒമാൻ അത്‌ലറ്റിക്‌സ് അസോസിയേഷൻ ഡയറക്ടർ ബോർഡ് അംഗവും കേന്ദ്രത്തിന്റെ സൂപ്പർവൈസറുമായ നൂറ ബിൻത്‌ സലേം അൽ ബലൂഷി പറഞ്ഞു. കഴിവുള്ള പെൺകുട്ടികളെ തിരിച്ചറിയുക മാത്രമല്ല, സാങ്കേതിക, ശാരീരിക, മാനസിക വശങ്ങൾ ഉൾക്കൊള്ളുന്ന സമഗ്ര പരിശീലന പദ്ധതിയും ഉൾപ്പെടുന്നു. വനിതാ അത്‌ലറ്റിക്‌സിൽ ഒമാന്റെ അഭിലാഷങ്ങൾ നിറവേറ്റാനും അവരുടെ അഭിലാഷങ്ങളെ പിന്തുണയ്ക്കാനും സുരക്ഷിത അന്തരീക്ഷം ഒരുക്കുമെന്നും അൽ ബലൂഷി വ്യക്തമാക്കി.