ചില പഫർ മത്സ്യങ്ങളിൽ വിഷബാധയ്‌ക്ക് സാധ്യത; മുന്നറിയിപ്പുമായി ഒമാൻ

മസ്‌കത്ത് : ഗുരുതര ആരോഗ്യപ്രശ്‌നങ്ങൾക്ക് കാരണമാകുന്ന വിഷാംശം അടങ്ങിയിരിക്കാൻ സാധ്യതയുള്ളതിനാൽ ചിലയിനം പഫർ മത്സ്യങ്ങൾ വാങ്ങുകയോ ഭക്ഷിക്കുകയോ ചെയ്യരുതെന്ന് ഒമാൻ ഭക്ഷ്യസുരക്ഷാ ഗുണനിലവാര കേന്ദ്രം. ഇവയുടെ വ്യാപാരം, കൈകാര്യം ചെയ്യൽ, ഉപയോഗം എന്നിവ നിരോധിക്കുകയോ നിയന്ത്രിക്കുകയോ ചെയ-്‌തിട്ടുണ്ടെന്നും കേന്ദ്രം വ്യക്തമാക്കി.

​അറോത്രോൺ ഹിസ-്‌പിഡസ്, അറോത്രോൺ ഇമ്മാക്കുലേറ്റസ്, അറോത്രോൺ മെലിഗ്രിസ്, അറോത്രോൺ നൈഗ്രോപങ്ക്ടാറ്റസ്, ചെലോനോഡോൺ പറ്റോക, ലാഗോസെഫാലസ് ലൂനാരിസ്, ലാഗോസെഫാലസ് സ്‌കെലെറാറ്റസ്, കാന്തിഗാസ്റ്റർ വാലന്റിനി, ഡയോഡോൺ ലിറ്റുറോസസ്, ഡയോഡോൺ ഹൈസ്ട്രിക്‌സ്, ഡയോഡോൺ ഹോളോകാന്തസ് എന്നിവ ഉൾപ്പെടെയുള്ള ഇനങ്ങൾക്കെതിരെയാണ് മുന്നറിയിപ്പ്. ഈ മത്സ്യങ്ങളിൽ ടെട്രോഡോടോക്‌സിൻ എന്ന ശക്തമായ വിഷം അടങ്ങിയിരിക്കാമെന്നും കേന്ദ്രം വ്യക്തമാക്കി.

ഇത് മനുഷ്യന്റെ നാഡീവ്യവസ്ഥയെ ഗുരുതരമായി ബാധിച്ചേക്കാം. മത്സ്യം പാകം ചെയ്യുകയോ തണുപ്പിച്ച് സൂക്ഷിക്കുകയോ ചെയ്താൽ വിഷാംശം ഇല്ലാതാകുമെന്ന് ഉറപ്പില്ല. വിഷബാധയേറ്റാൽ മനംപിരട്ടൽ, ഛർദി, വയറിളക്കം, പേശികൾക്ക് ബലക്കുറവ്, ശരീരഭാഗങ്ങളിൽ മരവിപ്പ്, ശ്വാസതടസം തുടങ്ങിയ ലക്ഷണങ്ങൾ ഉണ്ടാകാം. ഗുരുതരമായ വിഷബാധ മരണത്തിനും കാരണമായേക്കാം. അതിനാൽ സുരക്ഷിതവുമായ ഉറവിടങ്ങളിൽനിന്ന് മാത്രം മത്സ്യം വാങ്ങണം. സംശയമുള്ള പഫർ മത്സ്യങ്ങൾ ഭക്ഷിക്കരുതെന്നും ഭക്ഷ്യസുരക്ഷാ ഗുണനിലവാര കേന്ദ്രം ഉപഭോക്താക്കളോട് നിർദേശിച്ചു.