ഒമാൻ ഹജ്ജ് മിഷൻ; ദൗത്യ സംഘം പുറപ്പെട്ടു

മസ്‌കത്ത് : ഒമാൻ ഹജ്ജ് മിഷൻ പ്രവർത്തകർ പുണ്യഭൂമിയിലേക്ക് ബുധനാഴ്ച പുറപ്പെട്ടു എൻഡോവ്‌മെന്റ്, മതകാര്യ മന്ത്രാലയം അണ്ടർസെക്രട്ടറി അഹമ്മദ് സാലിഹ് അൽ റാഷിദിയാണ് ദൗത്യത്തിന് നേതൃത്വം നൽകുന്നത്. മസ്‌കത്ത് അന്താരാഷ്ട്ര വിമാനത്താവളത്തിൽ മിഷൻ അംഗങ്ങളെ എൻഡോവ്‌മെന്റ്, മതകാര്യ മന്ത്രി ഡോ. മുഹമ്മദ് സെയ്ദ് അൽ മാമാരി, ഒമാനിലെ സൗദി അറേബ്യയുടെ അംബാസഡർ ഇബ്രാഹിം സാദ് ബിഷാൻ, മന്ത്രാലയത്തിലെ നിരവധി ഉദ്യോഗസ്ഥർ എന്നിവർ യാത്രയയപ്പിന് എത്തിയിരുന്നു.

ജിദ്ദയിലെ കിംഗ് അബ്ദുൽ അസീസ് അന്താരാഷ്ട്ര വിമാനത്താവളത്തിൽ എത്തിയ ശേഷം ദൗത്യ സംഘം മക്കയിലേക്ക് പോകും. ​​മിഷനിൽ നിന്നുള്ള ഒരു സംഘം പിന്നീട് മദീനയിലേക്ക് പോകും. മക്കയിലും മദീനയിലും സാന്നിധ്യമുള്ള സമയത്ത്, ഒമാൻ ഹജ്ജ് മിഷൻ വിശുദ്ധ ദേശങ്ങളിലെ ഒമാനി തീർഥാടകർക്ക് സേവനങ്ങൾ നൽകുകയും അവരുടെ ആചാരങ്ങളുടെ നിർവ്വഹണം എളുപ്പത്തിലും സൗകര്യപ്രദമായും മേൽനോട്ടം വഹിക്കുകയും ചെയ്യും.