ചൈനയുമായുള്ള പങ്കാളിത്തം ശക്തമാക്കി കുവൈത്ത്

കുവൈത്ത് സിറ്റി : ചൈനയുമായുള്ള തന്ത്രപ്രധാന വികസന പങ്കാളിത്തം കൂടുതൽ ശക്തിപ്പെടുത്തുന്നതിന്റെ ഭാഗമായി സുപ്രധാന പദ്ധതികൾ നിർവഹണ ഘട്ടത്തിലേക്ക് കടന്നതായി കുവൈത്ത്‌ സർക്കാർ. 2023ൽ ഇരുരാജ്യങ്ങളും ഒപ്പുവച്ച ധാരണപത്രങ്ങളുടെ അടിസ്ഥാനത്തിലുള്ള പദ്ധതികളാണ്‌ നടപ്പാക്കുന്നത്‌. ​മുബാറക് അൽ കബീർ തുറമുഖ നിർമാണം സഹകരണത്തിലെ ഏറ്റവും വലിയ വികസന പദ്ധതിയായി മുന്നേറുകയാണ്. തുറമുഖത്തിന്റെ എൻജിനിയറിങ്, നിർമാണ കരാറുകൾ പ്രാബല്യത്തിൽ വന്നു. പദ്ധതി പൂർത്തിയാകുന്നതോടെ കുവൈത്തിന്റെ സമുദ്രവ്യാപാരശേഷി വർധിക്കും.

രാജ്യത്തിന്റെ വ്യാപാര- ചരക്ക് ഗതാഗത ശൃംഖലയുമായുള്ള ബന്ധവും കൂടുതൽ ശക്തമാകുമെന്നാണ് പ്രതീക്ഷ. അടുത്തിടെ നിർമാണ - പ്രവർത്തന കരാറിൽ ഒപ്പുവച്ച നോർത്ത് കബ്ദ്‌ ടെക്‌നോളജി സ്റ്റേഷനാണ്‌ പ്രധാന സംയുക്ത പദ്ധതികളിലൊന്ന്‌. മലിനജല ശുദ്ധീകരണ ശേഷി വർധിപ്പിക്കൽ, പരിസ്ഥിതി സംരക്ഷണം ശക്തിപ്പെടുത്തൽ, നഗരവികസനത്തിനും സുസ്ഥിര വളർച്ചയ്ക്കും കരുത്തേകൽ എന്നിവയാണ് പദ്ധതിയുടെ പ്രധാന ലക്ഷ്യം.​ ഷഗായ, അബ്ദലിയ എന്നിവിടങ്ങളിലെ പുനരുപയോഗ ഊർജ പദ്ധതികളും വേഗത്തിലാക്കാൻ നടപടി പുരോഗമിക്കുകയാണ്.

പദ്ധതികളുടെ പുരോഗതി ഏകോപിപ്പിക്കാനുള്ള പ്രത്യേക സമിതി വിവിധ സർക്കാർ വകുപ്പുകളുമായി സഹകരിച്ച്‌ നടപടി വേഗത്തിലാക്കുന്നു. ചൈനയുൾപ്പെടെയുള്ള സൗഹൃദരാജ്യങ്ങളുമായുള്ള സാമ്പത്തിക സഹകരണം വിപുലീകരിക്കാനുള്ള പ്രതിബദ്ധതയും കുവൈത്ത് സർക്കാർ ആവർത്തിച്ചു.