ഇസ്രായേലിന്റെ വെസ്റ്റ് ബാങ്ക് നീക്കം അന്താരാഷ്ട്ര നിയമലംഘനം: കുവൈത്ത്

കുവൈത്ത് സിറ്റി : വെസ്റ്റ് ബാങ്ക് പ്രദേശം അനധികൃതമായി പിടിച്ചടക്കാനുള്ള ഇസ്രായേൽ നീക്കത്തിനെതിരെ കുവൈത്തും അറബ്–ഇസ്‌ലാമിക് രാജ്യങ്ങളും കടുത്ത പ്രതിഷേധം രേഖപ്പെടുത്തി. കുവൈത്ത്, ഈജിപ്ത്, ജോർദാൻ, ഇൻഡോനേഷ്യ, പാകിസ്ഥാൻ, തുർക്കിയ, ജിബൂത്തി, സൗദി അറേബ്യ, ഒമാൻ, ഗാംബിയ, പാലസ്തീൻ, ഖത്തർ, ലിബിയ, മലേഷ്യ, നൈജീരിയ എന്നിവയും അറബ് ലീഗും ഓർഗനൈസേഷൻ ഓഫ് ഇസ്‌ലാമിക് കോഓപ്പറേഷനും (ഒഐസി) ചേർന്നാണ് സംയുക്ത പ്രസ്താവന പുറപ്പെടുവിച്ചത്.

പ്രസ്താവനയിൽ ഇസ്രായേലിന്റെ നീക്കം അന്താരാഷ്ട്ര നിയമത്തെയും ഐക്യരാഷ്ട്രസഭാ സുരക്ഷാ കൗൺസിലിന്റെ പ്രമേയങ്ങളെയും ലംഘിക്കുന്നതാണെന്ന് ചൂണ്ടിക്കാട്ടി. വെസ്റ്റ് ബാങ്കിലെ ഇസ്രായേൽ അധിനിവേശവും കുടിയേറ്റനിർമാണവും സംബന്ധിച്ച് അന്താരാഷ്ട്ര നീതിന്യായ കോടതിയുടെ (ഐസിജെ) നിലപാടിനെയും പ്രസ്താവന ഉദ്ധരിച്ചു. അധിനിവേശിത പലസ്തീൻ പ്രദേശങ്ങളിൽ ഇസ്രായേലിന് പരമാധികാരം ഇല്ലെന്നും, അന്താരാഷ്ട്ര മാനുഷികനിയമങ്ങൾ പാലിക്കണമെന്നും പ്രസ്താവനയിൽ വ്യക്തമാക്കി. യുഎൻ ഏജൻസികളിലൂടെ പലസ്തീനിലേക്ക് എത്തുന്ന മനുഷ്യാവകാശ സഹായങ്ങൾ തടയരുതെന്ന് ഐസിജെ ആവശ്യപ്പെട്ടതും പ്രസ്താവനയിൽ ഓർമ്മിപ്പിച്ചു.

പാലസ്തീൻ ജനതയുടെ നിയമാനുസൃതമായ അവകാശങ്ങൾ ഉറപ്പാക്കുമ്പോഴേ നീതിയുക്തവും സമഗ്രവുമായ സമാധാനം കൈവരിക്കാനാകൂവെന്ന് സംയുക്ത പ്രസ്താവന വ്യക്തമാക്കുന്നു. വെസ്റ്റ് ബാങ്ക് പ്രദേശം ഇസ്രയേലിന്റെ നിയന്ത്രണത്തിലാക്കുന്ന ബില്ലിന് കഴിഞ്ഞ ദിവസം ഇസ്രയേൽ പാർലമെന്റ് പ്രാഥമിക അംഗീകാരം നൽകിയിരുന്നു.