ഭാവിയുടെ അടിത്തറയായിരിക്കും എഐ: ഷെയ്ഖ് ഹംദാൻ

ദുബായ് : ദുബായിയുടെ ഭാവിയുടെ അടിത്തറയായി മാറും എഐ എന്ന്‌ ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. എഐയിലൂടെ എല്ലാ മേഖലകളിലും നവീകരണം സാധ്യമാക്കുമെന്നും അഗദ്ദഹം പറഞ്ഞു.

ദുബായ് എഐ വീക്ക് ഔദ്യോഗികമായി ആരംഭിക്കുമ്പോൾ, സർക്കാരുകളും സ്ഥാപനങ്ങളും പൊതു സേവനങ്ങൾ, വിദ്യാഭ്യാസം, സമ്പദ്‌വ്യവസ്ഥ എന്നിവയിലുടനീളം - എഐ-യെ എത്രത്തോളം ഉപയോഗപ്പെടുത്തുന്നു എന്നതിനെ അടിസ്ഥാനമാക്കിയായിരിക്കും ഭാവി നിർവചിക്കപ്പെടുന്നതെന്ന് ഷെയ്ഖ് ഹംദാൻ പറഞ്ഞു.

ഏപ്രിൽ 21 മുതൽ 25 വരെ നടക്കുന്ന ദുബായ് എഐ വീക്കിൽ 100-ലധികം രാജ്യങ്ങളിൽ നിന്ന്‌ ആഗോള വിദഗ്ധർ, സംരംഭകർ, നയരൂപകർത്താക്കൾ, റെഗുലേറ്റർമാർ, നിക്ഷേപകർ, സാങ്കേതിക നവീനർ എന്നിവരുൾപ്പെടെ 10,000-ത്തിലധികം പേർ പങ്കെടുക്കും.

ജീവിത നിലവാരം ഉയർത്തുകയും സാമ്പത്തിക വളർച്ച വർദ്ധിപ്പിക്കുകയും ഭാവിക്ക് തയ്യാറായ സമൂഹങ്ങളെ പ്രാപ്തമാക്കുകയും ചെയ്യുന്നതിനൊപ്പം, മേഖലകളിലുടനീളം എഐ സ്വീകാര്യത ത്വരിതപ്പെടുത്തുക എന്നതാണ് പരിപാടിയുടെ ലക്ഷ്യം.