ഏഴ് മാസത്തിനിടെ രൂപ നേട്ടത്തിൽ, ഡോളറിനെതിരെ 93 എന്ന നിലവാരത്തിൽ

മുംബൈ:യുഎസ് ഡോളറിനെതിരെ തുടർച്ചയായ തിരിച്ചടികള് നേരിട്ട ഇന്ത്യൻ രൂപയ്ക്ക് ആശ്വാസ മുന്നേറ്റം. അഞ്ചാം വ്യാപാര ദിനത്തിലും രൂപ നേട്ടം കൊയ്തു. ഇന്ന് വ്യാപാരം അവസാനിക്കുമ്പോള് 65 പൈസയുടെ നേട്ടത്തോടെ 92.67 എന്ന നിലവാരത്തിലാണ് രൂപ ക്ലോസ് ചെയ്തത്. ഏഴ് മാസത്തിലേറെയുള്ള ഇടവേളയ്ക്ക് ശേഷമാണ് രൂപ 93 എന്ന നിർണ്ണായക നിലവാരത്തിൽ ക്ലോസ് ചെയ്യുന്നത്. അടുത്ത വർഷങ്ങളിലായി മൂല്യ തകര്ച്ചയുടെ തുടര് ഭീഷണികളിലായിരുന്നു.
ഏപ്രിൽ 10-ന് 92.83-ൽ ക്ലോസ് ചെയ്തതിന് ശേഷം ഇതാദ്യമായാണ് രൂപ 93-ന് മുകളിൽ എത്തുന്നത്. വ്യാഴാഴ്ച (നവംബർ 19) 9 പൈസ ഉയർന്ന് 93.32-ലാണ് രൂപ വ്യാപാരം അവസാനിപ്പിച്ചിരുന്നത്. നവംബർ 13-ന് രേഖപ്പെടുത്തിയ 94.19 എന്ന നിലവാരത്തിൽ നിന്ന് കഴിഞ്ഞ അഞ്ച് തുടർച്ചയായ സെഷനുകളിലായി രൂപയുടെ മൂല്യത്തിൽ 1.6 ശതമാനത്തിലധികം വർദ്ധനവുണ്ടായി.
അമേരിക്കൻ കറൻസിയുടെ ദുർബലാവസ്ഥയും, യു.എസ്, തായ്വാൻ, ദക്ഷിണ കൊറിയ തുടങ്ങിയ വിപണികളിലെ നിർമ്മിത ബുദ്ധി അധിഷ്ഠിത ഓഹരികളുടെ മുന്നേറ്റം മങ്ങിയതുമാണ് വിദേശ നിക്ഷേപ സ്ഥാപനങ്ങളെ ഉയർന്ന വരുമാനം തേടി ഇന്ത്യൻ വിപണിയിലേക്ക് ആകർഷിക്കുന്നതെന്ന് ഫോറെക്സ് വിശകലന വിദഗ്ധർ ചൂണ്ടിക്കാട്ടുന്നു. കൂടാതെ, അന്താരാഷ്ട്ര വിപണിയിൽ അസംസ്കൃത എണ്ണവില കുറഞ്ഞതും രൂപയ്ക്ക് കരുത്തായി.
ഓഹരിവിപണിയിൽ കരുത്ത്
ക്രൂഡ് വിപണിയിൽ ആശ്വാസം
ആഭ്യന്തര ഓഹരി വിപണിയിലും വെള്ളിയാഴ്ച വൻ മുന്നേറ്റമുണ്ടായി. സെൻസെക്സ് 897.96 പോയിന്റ് (1.08%) ഉയർന്ന് 83,919.71-ലും, നിഫ്റ്റി 286.30 പോയിന്റ് (1.12%) നേട്ടത്തോടെ 25,800.60-ലും വ്യാപാരം അവസാനിപ്പിച്ചു. തുടർച്ചയായ രണ്ടാം ദിവസമാണ് ഇരു സൂചികകളും ഒരു ശതമാനത്തിലധികം നേട്ടമുണ്ടാക്കുന്നത്.
ആറ് പ്രമുഖ കറൻസികൾക്കെതിരെ ഡോളറിന്റെ കരുത്ത് അളക്കുന്ന ഡോളർ സൂചിക 0.08% താഴ്ന്ന് 103.87-ലാണ്. ആഗോള എണ്ണ മാനദണ്ഡമായ ബ്രെന്റ് ക്രൂഡ് വില ഫ്യൂച്ചേഴ്സ് വ്യാപാരത്തിൽ 1.82% ഇടിഞ്ഞ് ബാരലിന് 90.31 ഡോളറായി.
ക്രൂഡ് ഓയിൽ ഉൾപ്പെടെയുള്ള ചരക്കുകളുടെ വില കുറയുന്നത് രാജ്യത്തിന്റെ ഇറക്കുമതി ബിൽ കുറയ്ക്കാൻ സഹായിക്കുമെന്നതിനാൽ രൂപയ്ക്ക് ഇനിയും ഗുണകരമാവും എന്ന പ്രതീക്ഷ നിലനിൽക്കുന്നു.








0 comments