"ഒരു കൂട്ടത്തിന് എന്റെ പേരിലെ 'കുട്ടി' എന്ന് കേട്ടപ്പോൾ ഹാലിളകി"; മാങ്കൂട്ടത്തിലിന് മന്ത്രി ശിവൻകുട്ടിയുടെ മറുപടി

തിരുവനന്തപുരം: പിഎം ശ്രീ പദ്ധതിയിൽ കേരളം ചേർന്നതിന്റെ പേരിൽ തന്നെ അവഹേളിക്കും വിധം ഫേസ്ബുക്ക് പോസ്റ്റിട്ട, രാഹുൽ മാങ്കൂട്ടത്തിൽ എംഎൽഎയ്ക്ക് മറുപടിയുമായി വിദ്യാഭ്യാസമന്ത്രി വി ശിവൻകുട്ടി. 'സംഘിക്കുട്ടി' എന്നാണ് മന്ത്രിയെ മാങ്കൂട്ടത്തിൽ അധിക്ഷേപിച്ചത്. എന്നാൽ യുവതികളെ ​ഗർഭഛിദ്രത്തിന് വിധേയരാക്കുകയും ​ഗർഭസ്ഥശിശുവിനെയും അമ്മയെയും കൊല്ലുമെന്ന് ഭീഷണിപ്പെടുത്തുകയും ചെയ്തുവെന്നുള്ള, മാങ്കൂട്ടത്തിലിനെതിരായ പരാതി ഓർമിപ്പിക്കുംവിധമാണ് മന്ത്രി മറുപടി നൽകിയത്. "ഒരു കൂട്ടത്തിന് എന്റെ പേരിലെ 'കുട്ടി' എന്ന് കേട്ടപ്പോൾ ആണത്രേ ഹാലിളകിയത്"- ശിവൻകുട്ടി ഫേസ്ബുക്ക് പോസ്റ്റിൽ കുറിച്ചു.

വിവാഹ വാ​ഗ്ദാനം നൽകി പീഡിപ്പിച്ച യുവതിയെ മാങ്കൂട്ടത്തിൽ ​ഗർഭഛിദ്രത്തിന് നിർബന്ധിക്കുന്നതിന്റെയും വധഭീഷണി മുഴക്കുന്നതിന്റെയും ശബ്ദരേഖ പുറത്തുവന്നിരുന്നു. ഇതേക്കുറിച്ച് ഇന്നേവരെ പ്രതികരിക്കാൻ മാങ്കൂട്ടത്തിൽ തയ്യാറായിട്ടില്ല. 18 മുതൽ 60 വയസുവരെ പ്രായമുള്ള നിരവധിപേർ മാങ്കൂട്ടത്തിലിന്റെ ലൈം​ഗിക അതിക്രമങ്ങൾക്ക് ഇരകളായെന്ന് കണ്ടെത്തി ക്രൈംബ്രാഞ്ച് തിരുവനന്തപുരം ജുഡീഷ്യൽ ഫസ്റ്റ്ക്ലാസ് മജിസ്ട്രേറ്റ് കോടതിയിൽ എഫ്‌ഐആർ സമർപ്പിച്ചിട്ടുണ്ട്.