സ്‌പൈഡർമാൻ ജോഡികളായ ടോം ഹോളണ്ടും സെൻഡയയും വിവാഹിതരായി; സ്ഥിരീകരിച്ച് താരം

ലണ്ടൻ: ഹോളിവുഡ് സിനിമാ ലോകവും ആരാധകരും ഏറെ നാളായി കാത്തിരുന്ന വാർത്ത ഒടുവിൽ പുറത്തുവിട്ടിരിക്കുകയാണ് നടൻ ടോം ഹോളണ്ട്. താനും സെൻഡയയും രഹസ്യമായി വിവാഹിതരായ വിവരം താരം ഔദ്യോഗികമായി സ്ഥിരീകരിച്ചു. പ്രശസ്ത മാഗസിനായ 'എസ്‌ക്വയറിന്' നൽകിയ അഭിമുഖത്തിലാണ് ടോം ഹോളണ്ട് തങ്ങളുടെ വിവാഹം കഴിഞ്ഞ കാര്യം വെളിപ്പെടുത്തിയത്.

കഴിഞ്ഞ കുറച്ചുകാലമായി ഇരുവരുടെയും വിവാഹത്തെക്കുറിച്ച് സോഷ്യൽ മീഡിയയിൽ വലിയ രീതിയിലുള്ള ചർച്ചകളും അഭ്യൂഹങ്ങളും പ്രചരിക്കുന്നുണ്ടായിരുന്നു. എന്നാൽ ഇപ്പോഴാണ് താരം ഇതേക്കുറിച്ച് വ്യക്തമായ ഒരു പ്രതികരണം നടത്തുന്നത്.

അഭിമുഖത്തിനിടയിൽ ഇന്റർനെറ്റിൽ പ്രചരിച്ച ചില വ്യാജ വിവാഹ ചിത്രങ്ങളെക്കുറിച്ചുള്ള ചോദ്യത്തിന് മറുപടി നൽകവേയാണ് താരം യഥാർത്ഥ വിവാഹ വാർത്ത സ്ഥിരീകരിച്ചത്. യഥാർത്ഥത്തിൽ വിവാഹം കഴിഞ്ഞ കാര്യം കുടുംബാംഗങ്ങളെ വിളിച്ച് അറിയിക്കേണ്ടി വന്നോ എന്ന റിപ്പോർട്ടറുടെ ചോദ്യത്തിന്, "ഇല്ല, കാരണം അവരെല്ലാവരും ആ വിവാഹത്തിൽ പങ്കെടുക്കാൻ അവിടെ നേരിട്ടെത്തിയിരുന്നു," എന്നായിരുന്നു ഹോളണ്ടിന്റെ മറുപടി. ഇതോടെയാണ് ഇരുവരുടെയും വിവാഹം അതീവ രഹസ്യമായി കഴിഞ്ഞുവെന്ന കാര്യം ഔദ്യോഗികമായി പുറത്തുവന്നത്. എന്നാൽ വിവാഹം എവിടെ വെച്ചാണ് നടന്നതെന്നോ മറ്റ് കൂടുതൽ വിവരങ്ങളോ പങ്കുവെക്കാൻ താരം തയ്യാറായില്ല.

തങ്ങൾക്കിടയിൽ ശക്തമായ ബന്ധമുണ്ടെന്നും നല്ല സൗഹൃദമാണ് എന്നും ടോം ഹോളണ്ട് പറഞ്ഞു. "സിനിമാ ലോകത്തെ ജീവിതം എന്താണെന്ന് ഞങ്ങൾക്ക് രണ്ടുപേർക്കും കൃത്യമായി അറിയാം. അതുകൊണ്ടുതന്നെ മറ്റാർക്കും തരാൻ കഴിയാത്ത പിന്തുണയും സുരക്ഷിതത്വവുമാണ് അവൾ എനിക്ക് നൽകുന്നത്. ഞാൻ കണ്ടെത്തിയ എന്റെ പ്രിയപ്പെട്ട വ്യക്തിയാണ് അവൾ. എന്റെ ഏറ്റവും നല്ല സുഹൃത്താണ്. അവൾക്കൊപ്പം ആയിരിക്കുമ്പോഴാണ് ഞാൻ ജീവിതത്തിൽ ഏറ്റവും കൂടുതൽ സന്തോഷിക്കുന്നത്," ടോം വികാരാധീനനായി കൂട്ടിച്ചേർത്തു.

2021 മുതൽ പ്രണയത്തിലായ ടോം ഹോളണ്ടും സെൻഡയയും തങ്ങളുടെ സ്വകാര്യ ജീവിതം എപ്പോഴും മാധ്യമങ്ങളിൽ നിന്നും സോഷ്യൽ മീഡിയയിൽ നിന്നും വളരെ രഹസ്യമായി സൂക്ഷിക്കാൻ ആഗ്രഹിച്ചവരാണ്. ടോം ഹോളണ്ട് നായകനാകുന്ന പുതിയ സ്‌പൈഡർമാൻ ചിത്രം 'ബ്രാൻഡ് ന്യൂ ഡേ' (Brand New Day) റിലീസിന് തയ്യാറെടുക്കവെയാണ് ആരാധകരെ ആവേശത്തിലാഴ്ത്തി വിവാഹ വാർത്ത പുറത്തുവന്നിരിക്കുന്നത്.