കർഷക മണ്ണിൽ ചുവടുറപ്പിച്ച്‌ ആന്റണി മാസ്റ്റർ

കൊട്ടിയൂർ

പാവങ്ങളുടെ പടത്തലവൻ എ കെ ജിയുടെ നേതൃത്വത്തിൽ നടന്ന ഐതിഹാസിക കുടിയിറക്ക് സമരത്തിന്റെ ഓർമകൾ ഉറങ്ങുന്ന മണ്ണാണ് കൊട്ടിയൂർ. തെക്കൻ തിരുവിതാംകൂറിൽനിന്നെത്തി, പ്രകൃതിയോടും കാട്ടുമൃഗങ്ങളോടും മല്ലടിച്ചു പൊന്നാക്കിയ മണ്ണ് കൈവിട്ടുപോകുമെന്ന ഘട്ടത്തിൽ ചേർത്തുപിടിച്ച എ കെ ജിയെയും എ കെ ജിയുടെ പ്രസ്ഥാനത്തെയും മറക്കാൻ കുടിയേറ്റ ജനതയ്ക്കാവില്ല. കുടിയിറക്കിനെതിരെ 1960ൽ എ കെ ജിയുടെ നേതൃത്വത്തിൽ കൊട്ടിയൂരിൽനിന്ന് തിരുവനന്തപുരംവരെ നടന്നുപോയി പിഎസ്‌പി മന്ത്രിസഭയ്ക്ക് നിവേദനം കൊടുത്തതും പിന്നീടുവന്ന ഇ എം എസ് മന്ത്രിസഭ കുടിയിറക്ക് നിർത്തിവയ്ക്കാൻ തീരുമാനിച്ചതും കേരള ചരിത്രത്തിൽ സുവർണ ലിപികളാൽ എഴുതിചേർക്കപ്പെട്ട സമര ഏടുകളാണ്. ജില്ലാ പഞ്ചായത്തിൽ പുതുതായി രൂപീകരിച്ചതാണ്‌ കൊട്ടിയൂർ ഡിവിഷൻ. പേരാവൂർ വിഭജിച്ചാണ് ഡിവിഷനുണ്ടാക്കിയത്‌. എൻസിപി (എസ്‌പി) യുടെ എം എ ആന്റണി മാസ്റ്ററാണ് എൽഡിഎഫ് സ്ഥാനാർഥി. അമ്പായത്തോട്, കൊട്ടിയൂർ, കേളകം, അടക്കത്തോട്, കൊളക്കാട്, തുണ്ടിയിൽ ബ്ലോക്ക് പഞ്ചായത്ത് ഡിവിഷൻ, കണിച്ചാർ പഞ്ചായത്തിലെ ഒന്നും രണ്ടും വാർഡ് ഒഴികെയുള്ള 12 വാർഡുകൾ, പേരാവൂർ പഞ്ചായത്തിലെ ബംഗ്ലക്കുന്ന്‌, വളയങ്ങാട്, മണത്തണ, കല്ലടി, തുണ്ടിയിൽ, മഠപ്പുരച്ചാൽ വാർഡുകൾ, കോളയാട് പഞ്ചായത്തിലെ വേക്കളം വാർഡ്‌ എന്നിവ ഉൾപ്പെടുന്നതാണ്‌ ഡിവിഷൻ. ഏറെ മുന്നേ സ്ഥാനാർഥിയെ പ്രഖ്യാപിച്ച്‌ പ്രചാരണം തുടങ്ങിയ എൽഡിഎഫ്‌ സ്ഥാനാർഥി ബഹുദൂരം മുന്നിലാണ്‌. മലയോര ജനതയുടെ ഹൃദയവായ്‌പ്പുകൾ ഏറ്റുവാങ്ങി എൽഡിഎഫ് സ്ഥാനാർഥി പര്യടനം തുടങ്ങി. അഞ്ചുവർഷം ജില്ലാ പഞ്ചായത്ത് നടപ്പാക്കിയ വികസന പ്രവർത്തനങ്ങളുടെ തുടർച്ചയ്‌ക്കായാണ് ഇടതുമുന്നണി സ്ഥാനാർഥി വോട്ടുതേടുന്നത്‌. ‘‘മനുഷ്യ-വന്യജീവി സംഘർഷം നടക്കുന്ന മേഖലയാണിത്. അക്രമകാരികളായ വന്യജീവികളെ കൊല്ലാമെന്ന, കേരള സർക്കാർ പാസാക്കിയ വന്യജീവി സംരക്ഷണം (കേരള ഭേദഗതി) ബിൽ പിണറായി സർക്കാർ കർഷകരെ ചേർത്തുപിടിക്കുന്നതിന്റെ ഉദാഹരണമാണ്‌. റബർ കർഷകർക്ക് ആശ്വാസം പകരാൻ താങ്ങുവില വർധിപ്പിച്ച സർക്കാരിനെ പിന്തുണയ്‌ക്കണം’ സ്വീകരണ കേന്ദ്രങ്ങളിൽ സ്ഥാനാർഥിയുടെ കാച്ചിക്കുറുക്കിയുള്ള പ്രസംഗം കർഷകർ ഹൃദയത്തിലേറ്റുകയാണ്‌. കൊട്ടിയൂർ പഞ്ചായത്തിലെ അമ്പായത്തോടുനിന്നാണ് ഞായറാഴ്ച പര്യടനം ആരംഭിച്ചത്. പ്രിയ സാരഥിക്ക് സ്നേഹോഷ്‌മള സ്വീകരണമാണ് എല്ലാ കേന്ദ്രങ്ങളിലും ലഭിച്ചത്. പൂക്കൾ നൽകിയും ഹാരാർപ്പണം നടത്തിയും സ്ഥാനാർഥിയെ വരവേറ്റു. ഇടതുപക്ഷ വിജയം സുനിശ്ചിതമാണെന്ന് പ്രഖ്യാപിക്കുന്നതായിരുന്നു ഓരോ സ്വീകരണകേന്ദ്രങ്ങളും.