കൊളവല്ലൂരിന്റെ സ്നേഹവായ്പിൽ രവീന്ദ്രൻ കുന്നോത്ത്

ജില്ലാ പഞ്ചായത്ത് ഡിവിഷൻ എൽഡിഎഫ് സ്ഥാനാർഥി രവീന്ദ്രൻ കുന്നോത്തിന് മൊകേരി പാറേമ്മലിൽ നൽകിയ സ്വീകരണം
റഷീദ് അണിയാരം
Published on Nov 29, 2025, 03:30 AM | 1 min read
പാനൂർ
കലാസാംസ്കാരിക രംഗത്തെ നിറസാന്നിധ്യമായ രവീന്ദ്രൻ കുന്നോത്ത് പ്രചാരണത്തിലും ഏറെ മുന്നിൽ. ജില്ലാ പഞ്ചായത്ത് കൊളവല്ലൂർ ഡിവിഷനിൽ ചിരപരിചിതമായ മുഖം. വോട്ടുചോദിച്ചെത്തുന്ന ഇടങ്ങളിലെല്ലാം സ്നേഹത്തോടെ ഒപ്പം ചേർന്ന് കുശലം ചോദിക്കുന്ന നിരവധിപേർ. വോട്ടുവർത്തമാനവും ഹസ്തദാനവുമായി ആൾക്കൂട്ടത്തിൽ അലിഞ്ഞ് പ്രചരണങ്ങളിൽ നിറഞ്ഞ് രവീന്ദ്രൻ കുന്നോത്ത്. മൊകേരി, കുന്നോത്തുപറമ്പ് പഞ്ചായത്തുകളിലെ പ്രദേശങ്ങളിലെ പൊതുപര്യടനം കൂരാറ കവുങ്ങും വെള്ളിയിൽ പകൽ രണ്ടരയോടെ കെ പി മോഹനൻ എംഎൽഎ ഉദ്ഘാടനംചെയ്തു. വൈകാതെ എത്തിയ സ്ഥാനാർഥിയെ സ്ത്രീകളും വയോധികരുമുൾപ്പെടെയുള്ളവർ ഹാരമണിയിച്ച് സ്വീകരിച്ചു. സംസ്ഥാന സർക്കാരിന്റെ വികസനനേട്ടങ്ങളും ജില്ലാ പഞ്ചായത്തിലും മൊകേരി പഞ്ചായത്തിലും എൽഡിഎഫ് ഭരണസമിതി കൊണ്ടുവന്ന നേട്ടങ്ങളും വിശദീകരിച്ചുള്ള പത്തു മിനിറ്റ് പ്രസംഗവും വോട്ടഭ്യർഥനയും. തുടർന്ന് അടുത്ത സ്വീകരണ കേന്ദ്രത്തിലേക്ക്. പാറേമ്മൽ സ്കൂൾ പരിസരത്ത് തുറന്ന വാഹനത്തിൽ സ്ഥാനാർഥിയെത്തിയപ്പോൾ മുദ്രാവാക്യം വിളിയോടെയാണ് എൽഡിഎഫ് പ്രവർത്തകർ വരവേറ്റത്. പാത്തിപ്പാലത്തും സ്വീകരിക്കാൻ ആളുകൾ കാത്തുനിൽക്കുകയായിരുന്നു. എല്ലാ കേന്ദ്രങ്ങളിലും പഞ്ചായത്ത്, ബ്ലോക്ക് പഞ്ചായത്ത് സ്ഥാനാർഥികളും ഒപ്പമുണ്ടായി. 16 കേന്ദ്രങ്ങളിലെ സ്വീകരണങ്ങൾക്കുശേഷം മീത്തലെ കുന്നോത്തുപറമ്പിൽ പര്യടനം സമാപിച്ചു. രാഷ്ട്രീയ ജനതാദൾ ജില്ലാ ജനറൽ സെക്രട്ടറിയായ രവീന്ദ്രൻ കുന്നോത്ത് വിദ്യാർഥി രാഷ്ട്രീയത്തിലൂടെയാണ് പൊതുരംഗത്തേക്ക് വരുന്നത്. ബ്രണ്ണൻ കോളേജിൽ കേരള വിദ്യാർഥി ജനത യൂണിറ്റ് പ്രസിഡന്റ്, ജില്ലാ സെക്രട്ടറി, യുവജനത സംസ്ഥാന വൈസ് പ്രസിഡന്റ്, കേരള കോ -ഓപ്പറേറ്റീവ് എംപ്ലോയീസ് സെൻട്രൽ സംസ്ഥാന ജനറൽ സെക്രട്ടറി ഉൾപ്പെടെയുള്ള സ്ഥാനങ്ങൾ വഹിച്ചിട്ടുണ്ട്. 2010 -–15 ൽ കൂത്തുപറമ്പ് ബ്ലോക്ക് പഞ്ചായത്തംഗമായിരുന്നു. പാനൂർ കോ -ഓപ്പറേറ്റീവ് ബിൽഡിങ് സൊസൈറ്റി വൈസ് പ്രസിഡന്റാണ്. കാലങ്ങളായി യുഡിഎഫ് ഭരിച്ചിരുന്ന തൃപ്രങ്ങോട്ടൂർ പഞ്ചായത്തിലെ രണ്ടാം വാർഡ് ഒഴികെയുള്ള പതിനെട്ടും മത്സരം തീ പാറുന്ന കുന്നോത്തുപറമ്പിലെ ഇരുപത്തി മൂന്നും എൽഡിഎഫിന്റെ സർവാധിപത്യമുള്ള മൊകേരിയിലെ മൂന്നു ബ്ലോക്ക് ഡിവിഷനുകളിലെ 15 വാർഡുകൾ ഉൾപ്പെടെ 56 വാർഡുകൾ ചേർന്നതാണ് കൊളവല്ലൂർ ഡിവിഷൻ. ഡിവിഷനിൽ വിജയമാവർത്തിക്കാൻ പ്രചരണ രംഗത്ത് ബഹുദൂരം മുന്നിലാണ് എൽഡിഎഫ്.








0 comments