ജനമനസിൽ നിറഞ്ഞ്‌ സിജ രാജീവൻ
ജില്ലാപഞ്ചായത്ത്‌ കോളയാട്‌ ഡിവിഷൻ എൽഡിഎഫ്‌ സ്ഥാനാർഥി സിജ രാജീവൻ എടയാറിൽ വോട്ടഭ്യർഥിക്കുന്നു
കണ്ണൂർ
നാട്ടുകാരോട്‌ കുശലം പറഞ്ഞും വിശേഷങ്ങൾ ചോദിച്ചുമാണ്‌ സിജ രാജീവന്റെ പര്യടനം. നേരിട്ട്‌ കണ്ടുള്ള വോട്ടഭ്യർഥന കഴിഞ്ഞ്‌ പര്യടനത്തിലേക്കിറങ്ങുന്പോൾ തികഞ്ഞ ആത്മവിശ്വാസമാണ്‌ കോളയാട്‌ ഡിവിഷനിൽ എൽഡിഎഫിന്‌. എൽഡിഎഫ്‌ സർക്കാർ നടത്തിയ വികസന പ്രവത്തനങ്ങളും ക്ഷേമപദ്ധതികളും എണ്ണിപ്പറഞ്ഞാണ്‌ സിജയുടെ വോട്ടഭ്യർഥന. ചിറ്റാരിപ്പറന്പ്‌ പഞ്ചായത്ത്‌ വൈസ്‌ പ്രസിഡന്റായി അഞ്ചുവർഷം പ്രവർത്തിച്ച അനുഭവസന്പത്തുമായാണ്‌ സിജ രാജീവൻ ജില്ലാപഞ്ചായത്ത്‌ കോളയാട്‌ ഡിവിഷനിൽ ജനവിധി തേടുന്നത്‌. വാഹനം കടന്നുപോകുന്പോൾ വഴിയോരത്ത്‌ കാത്തുനിൽക്കുന്നവരെ അഭിവാദ്യം ചെയ്‌തും സ്വീകരണകേന്ദ്രങ്ങളിൽ തടിച്ചുകൂടുന്നവരോട്‌ കുശലാന്വേഷണത്തോടെ വോട്ടഭ്യർഥിച്ചും അവരിലൊരാളാവുകയാണ്‌ സിജ. വനമേഖലയും മലയോര പ്രദേശവും ഉൾപ്പെട്ട ഡിവിഷനിൽ ഏറെയും കർഷകരാണ്‌. വിവിധ പദ്ധതികളിലൂടെ ജന ജീവിതം മെച്ചപ്പെടുത്തിയ എൽഡിഎഫ്‌ സർക്കാരിനോടുള്ള സ്‌നേഹവായ്‌പാണ്‌ ഓരോ സ്വീകരണകേന്ദ്രങ്ങളിലും. സാമൂഹ്യക്ഷേമ പെൻഷൻ വർധിപ്പിച്ചും എല്ലാ മേഖലയിലും തൊട്ടറിയാനാകുന്ന വികസനവും നടത്തിയവരെ ഏറെ സ്‌നേഹത്തോടെയാണ്‌ ജനങ്ങളും ചേർത്തുനിർത്തുന്നത്‌. കൺവൻഷനുകളിലും മറ്റും വോട്ട് അഭ്യർഥിച്ചായിരുന്നു ആദ്യഘട്ട പര്യടനം. ചിറ്റാരിപ്പറന്പ്‌ പഞ്ചായത്ത്‌ വൈസ്‌ പ്രസിഡന്റായി നാടിന്റെ മിടിപ്പ്‌ അറിഞ്ഞുകൊണ്ടുള്ള പ്രവർത്തനം സിജ രാജീവന്‌ തെരഞ്ഞെടുപ്പ്‌ പോരാട്ടത്തിൽ മുൻതൂക്കം നൽകുന്നു. കണ്ണവം, മാനന്തേരി, കോളയാട്‌, കാഞ്ഞിലേരി ഭാഗങ്ങളിൽ വോട്ടർഭ്യർഥിച്ചു. ജനമനസിൽ നിറഞ്ഞുനിൽക്കുന്ന സിജ രാജീവന്‌ ഭൂരിപക്ഷം ഉയർത്തുമെന്ന്‌ ജനം പറയുന്നു. ഇടതുപക്ഷത്തിന്റെ ഉരുക്കുകോട്ടയായ ചിറ്റാരിപ്പറന്പ്‌, മാങ്ങാട്ടിടം, കോളയാട്‌, മാലൂർ, പാട്യം പഞ്ചായത്തുകളിലെ വാർഡുകളാണ്‌ ഡിവിഷനിലുള്ളത്‌. ആകെ 47 വാർഡുകളാണ്‌ പുതിയ കോളയാട്‌ ഡിവിഷനിൽ ഉൾപ്പെട്ടിട്ടുള്ളത്‌. പേരാവൂർ ബ്ലോക്ക്‌ പഞ്ചായത്തിലെ കോളയാട്‌, ആലച്ചേരി, കാഞ്ഞിലേരി ഡിവിഷനുകളും കൂത്തുപറന്പ്‌ ബ്ലോക്ക്‌ പഞ്ചായത്തിലെ കണ്ണവം, മാനന്തേരി, കണ്ടംകുന്ന്‌ ഡിവിഷനുകളും ചേർന്നാണ്‌ കോളയാട്‌ ഡിവിഷൻ.
Tags
0 comments