പേരാവൂർ എന്നും 
ഹൃദയപക്ഷത്ത്‌

പേരാവൂർ

കാൽനൂറ്റാണ്ടോളമായി ഇടതുപക്ഷത്തെ മാത്രം നെഞ്ചേറ്റിയ ചരിത്രമാണ്‌ പേരാവൂർ ബ്ലോക്ക്‌ പഞ്ചായത്തിന്‌. മുഴക്കുന്ന്, പേരാവൂർ, മാലൂർ, കോളയാട്, കേളകം, കണിച്ചാൽ, കൊട്ടിയൂർ പഞ്ചായത്തുകൾ ചേർന്നതാണ്‌ പേരാവ‍ൂർ ബ്ലോക്ക്‌. കൊട്ടിയൂരിൽ മാത്രമാണ്‌ യുഡിഎഫ്‌ ഭാരണം. തുല്യത വന്നതിനാൽ നറുക്കെടുപ്പിലൂടെയാണ്‌ കൊട്ടിയൂർ പഞ്ചായത്ത്‌ യുഡിഎഫ്‌ നേടിയത്‌. 1995ൽ രൂപീകരിച്ച ബ്ലോക്ക്‌ പഞ്ചായത്ത് ആദ്യ രണ്ട് തവണയും യുഡിഎഫിനൊപ്പമായിരുന്നു. പിന്നീട്‌ ഇടതുപക്ഷത്തെ മാത്രമാണ്‌ അധികാരത്തിലെത്തിച്ചത്‌. 2020ൽ 13 ബ്ലോക്ക് പഞ്ചായത്ത് ഡിവിഷനിൽ പത്തും വിജയിച്ചാണ് എൽഡിഎഫ് ഭരണം നിലനിർത്തിയത്‌. ഇത്തവണ പുതുതായി രൂപീകരിച്ച തുണ്ടിയിൽ ബ്ലോക്ക് ഡിവിഷൻ അടക്കം 14 ബ്ലോക്ക് പഞ്ചായത്ത് ഡിവിഷനുകളാണുള്ളത്. കഴിഞ്ഞ അഞ്ചു വർഷക്കാലയളവിൽ വൻ വികസനങ്ങളാണ് ബ്ലോക്ക് പഞ്ചായത്തിൽ നടന്നത്. കുടിവെള്ളം ജലസേചനം, കായികം, ഗതാഗതരംഗത്തും, മികച്ച മുന്നേറ്റമുണ്ടാക്കി. പേരാവൂർ താലൂക്ക് ആശുപത്രിയുടെ പ്രവർത്തനങ്ങൾക്ക് ഒരു വർഷം ഒരുകോടി രൂപയാണ് ചെലവഴിക്കുന്നത്. ആശുപത്രിയിൽ ഡയാലിസിസ് സംവിധാനമൊരുക്കി. മുഴക്കുന്ന് നല്ലൂരിൽ 42 ലക്ഷം രൂപയുടെ കുടിവെള്ള പദ്ധതി യാഥാർഥ്യമാക്കി, തുടങ്ങി നിരവധിയായ വികനസപ്രവർത്തനങ്ങളാണ്‌ നടപ്പാക്കിയത്‌. വികസനതുടർച്ചയ്‌ക്കായാണ്‌ എൽഡിഎഫ്‌ സ്ഥാനാർഥികൾ വോട്ടുതേടുന്നത്‌. നിലവിൽ 14 ബ്ലോക്ക് പഞ്ചായത്ത് ഡിവിഷനുകളാണുള്ളത്‌. 11 സീറ്റിൽ സിപിഐ എമ്മും, 2 സീറ്റിൽ സിപിഐയും ഒരു സീറ്റിൽ കേരള കോൺഗ്രസ് (എം) എന്നിങ്ങനെയാണ്‌ മത്സരിക്കുന്നത്‌. ​

കക്ഷിനില ​ സിപിഐ എം -8 സിപിഐ -1 കേരള കോൺഗ്രസ്‌ (എം)- 1 കോൺഗ്രസ്‌ -3