മാറില്ല കതിരൂരിന്റെ 
ഇടതുമനസ്‌

കതിരൂർ

ഇടതുപക്ഷ ശക്തിദുർഗങ്ങൾ ഉൾപ്പെടുന്ന ജില്ലാപഞ്ചായത്ത്‌ കതിരൂർ ഡിവിഷനിൽ ആരും അത്ഭുതം പ്രതീക്ഷിക്കുന്നില്ല. എന്നും ഇടതുപക്ഷം മാത്രം ജയിച്ച മണ്ണിൽ ഇത്തവണയും ചുവപ്പ്‌ പടരും. ഭൂരിപക്ഷം ഉയർത്തിയുള്ള തിളക്കമാർന്ന വിജയം ലക്ഷ്യമാക്കി പടക്കളത്തിൽ എൽഡിഎഫ്‌ മുന്നേറുന്പോൾ നാടാകെ ഒപ്പംചേരുന്നു. എൽഡിഎഫ്‌ സ്ഥാനാർഥി എ കെ ശോഭയുടെ പര്യടനം ജനഹൃദയങ്ങൾ കീഴടക്കി മുന്നേറുന്പോൾ എങ്ങും അലയടിക്കുന്നത്‌ ഇടതുതരംഗമാണ്‌. വികസനം തന്നെയാണ്‌ ഡിവിഷനിലെ പ്രധാന ചർച്ച. മഹിളാ അസോസിയേഷൻ തലശേരി ഏരിയാസെക്രട്ടറിയും ജില്ലാകമ്മിറ്റി അംഗവും സിപിഐ എം കതിരൂർ ലോക്കൽ കമ്മിറ്റി അംഗവുമാണ്‌ കതിരൂർ സ്വദേശിയായ എ കെ ശോഭ. ദിനേശ്‌ബീഡി തൊഴിലാളിയായി ജീവിതം ആരംഭിച്ച എ കെ ശോഭ 2002 മുതൽ റബ്‌കോ തൊഴിലാളിയാണ്‌. ലോയേഴ്‌സ്‌ കോൺഗ്രസ്‌ യൂത്ത്‌ വിങ്‌ തലശേരി യൂണിറ്റ്‌ പ്രസിഡന്റ്‌ അഡ്വ. വീണാ വിശ്വനാഥാണ്‌ യുഡിഎഫ്‌ സ്ഥാനാർഥി. ധർമടം കിഴക്കെ പാലയാട്‌ സ്വദേശി രശ്‌മി ജയരാജൻ ബിജെപി സ്ഥാനാർഥിയായും മത്സരിക്കുന്നു. പ്രതിപക്ഷ മില്ലാത്ത കതിരൂർ പഞ്ചായത്തും ഒരു യുഡിഎഫ്‌ അംഗം മാത്രമുള്ള എരഞ്ഞോളിയും എൽഡിഎഫ്‌ ഭരണമുള്ള പിണറായി പഞ്ചായത്തിലെ ഏഴും ന്യൂമാഹിയിലെ രണ്ടും വാർഡുകൾ ഉൾപ്പെട്ടതാണ്‌ കതിരൂർ ഡിവിഷൻ. ഇടതുപക്ഷ ശക്തികേന്ദ്രങ്ങൾ ഉൾപ്പെടുന്ന ഡിവിഷൻ ഇടതോരം ചേർന്ന്‌ നിൽക്കാനാണ്‌ എന്നും താൽപര്യം പ്രകടിപ്പിച്ചത്‌. കഴിഞ്ഞ തെരഞ്ഞെടുപ്പിൽ സിപിഐ എമ്മിലെ എ മുഹമ്മദ-്‌ അഫ്‌സൽ 20,329 വോട്ടിനാണ്‌ കോൺഗ്രസ്‌ സ്ഥാനാർഥി ഹരിദാസ്‌ മൊകേരിയെ തോൽപിച്ചത്‌. എൽഡിഎഫ്‌ സ്ഥാനാർഥി ഡിവിഷനിൽ പര്യടനം തുടരുന്പോൾ എൽഡിഎഫ്‌ ബഹുദൂരും മുന്നിലാണ്‌.