ശിവപ്രിയയുടെ സ്വർണത്തിളക്കം

പെരളശേരി

ജന്മനായുള്ള പരിമിതികളെ മറികടന്നുള്ള ശിവപ്രിയയുടെ നേട്ടങ്ങൾക്ക് വെള്ളിയുടെ തെളിച്ചമുണ്ട്. സ്വർണത്തിന്റെ തിളക്കവും. മൂന്നാമത് ഡൗൺ സിൻഡ്രോം ദേശീയ ഗെയിംസിൽ സ്വർണവും വെള്ളിയും നേടിയാണ്‌ പെരളശേരി ഐവർകുളം ഗ്രാമീണ പാഠശാല യുപി സ്‌കൂളിലെ ശിവപ്രിയ താരമായത്‌. ഡൗൺ സിൻഡ്രോം ഫെഡറേഷൻ ഓഫ് ഇന്ത്യയുടെ നേതൃത്വത്തിൽ കൊച്ചിയിലാണ്‌ മൂന്നാമത് ദേശീയ ഗെയിംസ്‌ സംഘടിപ്പിച്ചത്‌. എട്ടുമുതൽ 11 വയസുവരെയുള്ള കുട്ടികളുടെ വിഭാഗത്തിൽ അമ്പത്‌ മീറ്റർ ഓട്ടത്തിൽ സ്വർണവും സോഫ്റ്റ് ബോൾ ത്രോയിൽ വെള്ളിയുമാണ്‌ നേടിയത്‌. ഗെയിംസിൽ താരമായെങ്കിലും ശിവപ്രിയക്ക് ഇഷ്ടം നൃത്തത്തോടാണ്. നാടോടി നൃത്തമാണ് പ്രിയ ഇനം. നിരവധി മത്സരങ്ങളിൽ നൃത്തം അവതരിപ്പിച്ച് സമ്മാനങ്ങളും നേടി. കേരള സാംസ്കാരിക വകുപ്പ് മഴമിഴി എന്ന പേരിൽ സംഘടിപ്പിച്ച ഭിന്നശേഷി സർഗോത്സവം, 2024ൽ കണ്ണൂരിൽ നടന്ന സംസ്ഥാന സ്പെഷ്യൽ സ്കൂൾ കലോത്സവം, ലോക ഭിന്നശേഷി വാരാഘോഷത്തിൽ ജില്ലാ പഞ്ചായത്തും സാമൂഹ്യനീതി വകുപ്പും സംഘടിപ്പിച്ച ഉണർവ്‌, പെരളശേരി പഞ്ചായത്ത് സ്നേഹോത്സവം എന്നിങ്ങനെ ഏറെയുണ്ട്‌ പട്ടികയിൽ. ഗോപിനാഥ് മുതുകാടിന്റെ മാജിക് പ്ലാനറ്റിലും ശിവപ്രിയ നൃത്തം അവതരിപ്പിച്ചിട്ടുണ്ട്. ചാല ഗവ.ഹയർ സെക്കൻഡറി സ്കൂൾ പ്ലസ് വൺ വിദ്യാർഥിയായ സഹോദരി പാർവണയാണ് ഗുരു. ഡൗൺ സിൻഡ്രോം അഥവാ ട്രൈസോമി 21 എന്ന ജനിതക അവസ്ഥയുമായാണ് ശിവപ്രിയ ജനിച്ചത്. ഹൃദയത്തിലെ നാല്‌ ദ്വാരങ്ങൾ അടയ്‌ക്കാനായി ആറാം മാസത്തിൽ തിരുവനന്തപുരം ശ്രീചിത്രയിൽ ആദ്യ ശസ്‌ത്രക്രിയ. സംസാര വൈകല്യം മാറ്റിയെടുക്കാനും ഓർമക്കുറവ് പരിഹരിക്കാനുമായി ഐആർപിസിയുടെ കണ്ണോത്തുംചാലിലെ സെന്ററിൽനിന്ന്‌ തെറാപ്പി ചികിത്സയും മുടങ്ങാതെ ചെയ്യുന്നു. എഴുതാനും വായിക്കാനും പഠിച്ചുവരുന്നേയുള്ളൂ. സ്വന്തമായി കാര്യങ്ങൾ ചെയ്യാനും മറ്റ് കുട്ടികൾക്കൊപ്പം കൂട്ടുകൂടാനും കളിക്കാനുമൊക്കെ മുന്നിലാണ്. പെരളശേരി ചിരത്തുംകണ്ടിയിലെ ഇലക്‌ട്രീഷ്യൻ രാജേഷിന്റെയും സിലീഷ്യയുടെയും മകളാണ്‌.