കണ്ടങ്കാളി വയലിൽ 
ജപ്പാൻ വയലറ്റ് സമൃദ്ധി

പയ്യന്നൂർ

കണ്ടങ്കാളിയിലെ ഒ നാരായണന്റെ ഒരേക്കർ വയലിലെത്തിയാൽ വയലറ്റ്‌ നിറത്തിൽ വിളഞ്ഞ നെല്ലുകാണാം. ജപ്പാൻ വയലറ്റ് എന്നും നസർബാത്ത് എന്നും അറിയപ്പെടുന്ന ഇ‍ൗ നെല്ലിനത്തിന്‌ ‍അർബുദ പ്രതിരോധം ഉൾപ്പെടെ ഒ‍ൗഷധഗുണം ഏറെയാണ്‌. ‘പാഡി ആർട്ട്’ എന്ന പേരിൽ നെൽപ്പാടങ്ങളിൽ ചിത്രങ്ങളൊരുക്കാനും ഇ‍ൗ നെല്ലിനം ഉപയോഗിക്കും. കിലോഗ്രാമിന്‌ മുന്നൂറ് രൂപയോളമാണ്‌ വില ​പയ്യന്നൂർ റൂറൽ ബാങ്ക്‌ സെക്രട്ടറിയായി വിരമിച്ച ഒ നാരായണന്‌ കൃഷി ലഹരിയാണ്‌. മികച്ച ക്ഷ‍ീര കർഷകനുമാണ് അദ്ദേഹം. വിൽപനയ്‌ക്കല്ല, സ്വന്തം ആവശ്യത്തിനാണ് കൃഷി. രണ്ടര ഏക്കറിലധികം സ്ഥലത്താണ്‌ നെല്ല്‌ കൃഷിചെയ്യുന്നത്‌. കൊയ്ത്തു കഴിഞ്ഞാൽ വയലിൽ ഉഴുന്ന്, മുതിര, ചെറുപയർ, വൻപയർ എന്നിവയും കൃഷിചെയ്യും. വീട്ടാവശ്യത്തിനുള്ള മുഴുവൻ പച്ചക്കറിയും വയലിൽ ഉൽപ്പാദിപ്പിക്കുന്നു. 50 സെന്റ് സ്ഥലത്ത് തെങ്ങുകളുമുണ്ട്. കഴിഞ്ഞ വർഷം ജോലിയിൽനിന്ന്‌ വിരമിച്ചശേഷം മുഴുവൻ സമയ കർഷകനായി . ഭാര്യ കെ കവിതയാണ്‌ കൃഷിയിലെ സഹായി. 32 വർഷത്തോളമായി കിഴക്കെ കണ്ടങ്കാളി പാടശേഖര സമിതി കൺവീനറുമാണ്. 50 ഏക്കറോളം വയലിൽ പാടശേഖര സമിതിയുടെ നേതൃത്വത്തിൽ കൃഷി ചെയ്തുവരുന്നുണ്ട്. അതിന്‌ സർക്കാരിന്റെയും നഗരസഭയുടെയും ധനസഹായമായി ഒരു സെന്റിന് 122 രൂപവരെ ലഭിക്കുന്നതായി നാരായണൻ പറഞ്ഞു.